ഹൈദരാബാദ്: നടുറോഡില് തീപിടിച്ച റോയല് എന്ഫീല്ഡ് ബുള്ളറ്റ് പൊട്ടിത്തെറിച്ച് തെരഞ്ഞെടുപ്പ് ഉദ്യോഗസ്ഥനും പൊലീസുകാരനും അടക്കം പത്തോളം പേര്ക്ക് പരുക്ക്. ഞായറാഴ്ച വൈകുന്നേരം ഹൈദരാബാദില് മൊഗല്പുരയിലെ ബിബി ബസാര് റോഡിലാണ് സംഭവം.
ഞായറാഴ്ച വൈകുന്നേരം മൊഗല്പുരയിലേക്ക് പോവുകയായിരുന്ന റോയല് എന്ഫീല്ഡ് ബുള്ളറ്റിന്റെ എഞ്ചിനില് നിന്ന് തീ ഉയരുകയായിരുന്നു. തീ ശ്രദ്ധയില്പ്പെട്ടതോടെ യാത്രികരായ യുവാവും യുവതിയും ബുള്ളറ്റ് നിര്ത്തിയ ശേഷം ഓടി രക്ഷപ്പെട്ടു. വിവരം അറിഞ്ഞെത്തിയവര് വെള്ളം ഒഴിച്ച് തീ അണയ്ക്കാന് ശ്രമിക്കുമ്പോഴാണ് പൊട്ടിത്തെറിച്ചത്.
പരുക്കേറ്റവരെ പ്രിന്സസ് എസ്ര ആശുപത്രിയിലാണ് പ്രവേശിപ്പിച്ചത്. സംഭവത്തില് ഇതുവരെ ആളപായമൊന്നും റിപ്പോര്ട്ട് ചെയ്തിട്ടില്ലെങ്കിലും ശരീരത്തില് 95 ശതമാനത്തിലധികം പൊള്ളലേറ്റ രണ്ട് പേരുടെ നില ഗുരുതരമാണെന്ന് അധികൃതര് അറിയിച്ചു. തെരഞ്ഞെടുപ്പ് ഉദ്യോഗസ്ഥനായ സന്ദീപ്, ഷൗക്കത്ത് അലി, അബ്ദുള് റഹീം, ഹുസൈന് ഖുറേഷി, ഖാദിര്, സൗദ് ഷെയ്ഖ്, ഖാജാ പാഷ, ഷെയ്ഖ് അജീസ് തുടങ്ങിയവര്ക്കാണ് പരുക്കേറ്റത്.
