തായ്ലൻഡിൽ അപൂർവ വിവാഹം: ഒരേസമയം രണ്ട് സുഹൃത്തുക്കളെ വിവാഹം ചെയ്ത് യുവതി
ബാങ്കോക്ക്: ഒരേസമയം രണ്ട് പേരെ പ്രണയിച്ച് പരസ്പര സമ്മതത്തോടെ വിവാഹിതരാകുന്നത് അപൂർവമാണ്. തായ്ലൻഡിൽ നിന്നുള്ള ഒരു വിവാഹവാർത്ത ഇപ്പോൾ സാമൂഹിക മാധ്യമങ്ങളിലും പ്രാദേശിക മാധ്യമങ്ങളിലും ശ്രദ്ധ നേടുകയാണ്.
37 കാരിയായ ദുവാങ്ദുവാൻ കെത്സാരോയാണ് രണ്ട് ഓസ്ട്രിയൻ സ്വദേശികളെ ഒരേ ചടങ്ങിൽ വിവാഹം കഴിച്ചത്.
വർഷങ്ങളായി ഇരുവരുമായും പ്രണയത്തിലായിരുന്ന ദുവാങ്ദുവാൻ കുടുംബത്തിന്റെ അനുമതിയോടെയും മൂവർക്കും തമ്മിലുള്ള ധാരണയോടെയുമാണ് ഈ പുതിയ ജീവിതത്തിന് തുടക്കമിട്ടത്.
മുൻപ് സ്വതന്ത്ര സംഗീതജ്ഞയായിരുന്ന അവർ പട്ടായയിൽ ജോലി ചെയ്യുന്നതിനിടെയാണ് ഓസ്ട്രിയൻ മുൻ പൊലീസ് ഉദ്യോഗസ്ഥനായ റോമനെ പരിചയപ്പെടുന്നത്. അഞ്ച് വർഷത്തോളം ഇരുവരും ഒരുമിച്ച് ജീവിച്ചു.
തുടർന്ന് റോമന്റെ സുഹൃത്തായ മറ്റൊരു ഓസ്ട്രിയൻ മുൻ പൊലീസ് ഉദ്യോഗസ്ഥനായ മാക്കി ഇവരുടെ ജീവിതത്തിലേക്ക് എത്തി. പരിചയം പ്രണയത്തിലേക്ക് വഴിമാറിയതോടെ, മൂവരും തമ്മിൽ തുറന്ന ചർച്ചകൾ നടത്തി ഒരുമിച്ച് ജീവിക്കാൻ തീരുമാനിക്കുകയായിരുന്നു.
ഫെബ്രുവരി 28-ന് തായ്ലൻഡിലെ പ്രഖോൺ ചായ് ജില്ലയിൽ അടുത്ത ബന്ധുക്കളുടെയും സുഹൃത്തുക്കളുടെയും സാന്നിധ്യത്തിൽ ലളിതമായ ചടങ്ങുകളോടെയായിരുന്നു വിവാഹം.
ദുവാങ്ദുവാനിന്റെ ആദ്യ വിവാഹബന്ധം പിരിഞ്ഞിരുന്നു. മൂന്ന് മക്കളും രണ്ട് കൊച്ചുമക്കളും ഉൾപ്പെടുന്ന കുടുംബത്തിന്റെ ചുമതല അവർക്ക് തന്നെയായിരുന്നു.
മാതാപിതാക്കളെയും മക്കളെയും സംരക്ഷിക്കാൻ കഠിനാധ്വാനം ചെയ്തുവരുന്നതിനിടയിലാണ് റോമനും മാക്കിയും അവരുടെ ജീവിതത്തിലേക്ക് കടന്നുവന്നത്. ഈ ബന്ധത്തെക്കുറിച്ച് കുടുംബാംഗങ്ങളോട് സംസാരിച്ചപ്പോൾ പൂർണ്ണ പിന്തുണ ലഭിച്ചതായും അവർ വ്യക്തമാക്കി.
രണ്ട് വരന്മാരും ചേർന്ന് വിവാഹസമ്മാനമായി ഏകദേശം 20 ലക്ഷം തായ് ബാറ്റ് (ഏകദേശം 50 ലക്ഷം രൂപ) നൽകി. തന്റെ മകൾ വർഷങ്ങളോളം കഷ്ടപ്പെട്ടത് കണ്ടിട്ടുണ്ടെന്നും, ഇപ്പോൾ അവൾ സന്തോഷവതിയായി കഴിയുന്നതാണ് ഏറ്റവും പ്രധാനമെന്നും 61 കാരിയായ അമ്മ പ്രതികരിച്ചു.
മകളെയും കുടുംബത്തെയും ഇരുവരും സ്നേഹത്തോടെ സംരക്ഷിക്കുമെന്ന് തനിക്ക് വിശ്വാസമുണ്ടെന്നും അവർ കൂട്ടിച്ചേർത്തു.
പ്രാദേശിക മാധ്യമങ്ങൾ റിപ്പോർട്ട് ചെയ്തതോടെയാണ് ഈ അപൂർവ വിവാഹം കൂടുതൽ ശ്രദ്ധ നേടിയത്.
English Summary
A 37-year-old Thai woman, Duangduan Ketsaro, married two Austrian men in a consensual ceremony held in Thailand. She had been in long-term relationships with both men, Roman and Macky, who are former Austrian police officers. After open discussions and with family approval, the trio decided to live together and formalized their relationship in a simple ceremony on February 28. Duangduan, a mother of three, said her family fully supports the decision. The unusual marriage gained attention after being reported by local Thai media.
