കൊച്ചി: എറണാകുളത്ത് സ്കൂളിൽ വിദ്യാർഥിനിക്ക് നേരെ നായ്ക്കുരണപ്പൊടി എറിഞ്ഞ സംഭവത്തിൽ പോലീസ് കേസെടുത്തു. സഹപാഠികളെയും രണ്ട് അധ്യാപകരെയും പ്രതികളാക്കിയാണ് പോലീസിന്റെ നടപടി. വിദ്യാർഥിനിക്ക് മാനസിക പിന്തുണ നൽകിയില്ലെന്നു ആരോപിച്ചാണ് അധ്യാപകരെ പ്രതി ചേർത്തത്.
സഹപാഠികളായ രണ്ട് പെൺകുട്ടികളെയും കേസിൽ പ്രതിചേർത്തത്. തെങ്ങോട് ഗവ. ഹൈസ്‌കൂളിലെ പത്താം ക്ലാസ് വിദ്യാർഥിനിക്ക് നേരേയാണ് സഹപാഠികൾ നായ്ക്കുരണ പൊടി വിതറിയത്. സ്വകാര്യ ഭാഗത്ത് പൊടി വീണ് മൂത്രം പോലും ഒഴിക്കാൻ ആവാത്ത നിലയിലായിരുന്നു പെൺകുട്ടി. മാനസികമായി തകർന്ന പെൺകുട്ടി സൈക്യാട്രിസ്റ്റിന്റെ ചികിത്സയിൽ തുടരുകയാണ്.
സഹപാഠികളിൽ നിന്നും നേരത്തെയും മോശം അനുഭവം കുട്ടി നേരിട്ടിരുന്നതായയാണ് വിവരം. ഇൻഫോപാർക്ക് സിഐ ജെഎസ് സജീവ് കുമാറിന്റെ നിർദേശപ്രകാരം വനിതാ പൊലീസ് വീട്ടിലെത്തി പെൺകുട്ടിയുടെയും അമ്മയുടെയും മൊഴിയെടുത്തിരുന്നു.
