ആലപ്പുഴ: കയറുഫാക്ടറിക്കെതിരെ സമരം നടത്തിയതിന് കസ്റ്റഡിയിലെടുത്ത പ്രതിയെ നഗ്നനാക്കി ചൊറിയണം തേച്ച ഡിവൈഎസ്പിക്ക് ഒരു മാസം തടവും ആയിരം രൂപ പിഴയും.
ആലപ്പുഴ ഡിവൈഎസ്പി മധുബാബുവിനെയാണ് ചേര്ത്തല ഫസ്റ്റ് ക്ലാസ് ജുഡീഷ്യല് മജിസ്ട്രേറ്റ് കോടതി ഒരു മാസം തടവും ആയിരം രൂപ പിഴയും ശിക്ഷ വിധിച്ചത്.
18 വര്ഷം മുന്പ് നടന്ന കേസിലാണ് ഇപ്പോള് വിധി വന്നിരിക്കുന്നത്. അന്ന് ചേര്ത്തല എസ് ഐ ആയിരുന്നു മധുബാബുവിനോടൊപ്പം ഹെഡ് കോണ്സ്റ്റബിളിനേയും കോടതി ശിക്ഷിച്ചിട്ടുണ്ട്.
2006 ഓഗസ്റ്റിലായിരുന്നു സംഭവം നടന്നത്. സിദ്ധാര്ഥന് എന്നയാളെ മധുബാബു കസ്റ്റഡിയിലെടുത്ത് ചൊറിയണം പ്രയോഗം നടത്തിയെന്നായിരുന്നു പരാതി.
കയറുഫാക്ടറിയുടെ പ്രവര്ത്തനം സമീപ പ്രദേശങ്ങളെ മലിനീകരിക്കുന്നുവെന്ന പരാതി നല്കുകയും ഇതിനെതിരേ സമരം ചെയ്യുകയും ചെയ്ത ആളാണ് സിദ്ധാര്ഥന്.
ഈ സമരവുമായി ബന്ധപ്പെട്ടാണ് സിദ്ധാര്ഥനെ പൊലീസ് കസ്റ്റഡിയിലെടുത്തത്. ചേര്ത്തല എസ് ഐ ആയിരുന്ന മധുബാബുവും ഹെഡ് കോണ്സ്റ്റബിളും ചേര്ന്ന് നഗ്നനാക്കി ചൊറിയണം തേച്ചെന്ന് സിദ്ധാര്ഥന് പിന്നീട് പരാതി നല്കുകയായിരുന്നു. 2007ലാണ് പരാതിയില് പൊലീസ് കേസെടുക്കുന്നത്.
