ബെംഗളൂരു: കാറിന് മുകളിലേക്ക് കണ്ടെയ്നര് ലോറി മറിഞ്ഞ് ആറുപേര് മരിച്ചു. കർണാടകയിൽഇന്ന് രാവിലെ 11 മണിക്കായിരുന്നു അപകടം. ബെംഗളൂരു റൂറലിലെ നീലമംഗലയ്ക്ക് സമീപം ദേശീയപാത 48-ലാണ് അപകടമുണ്ടായത്.
ബെംഗളൂരുവില് നിന്ന് തുമകുരുവിലേക്ക് പോകുകയായിരുന്നു കണ്ടെയ്നര് ലോറി. വിജയപുരയിലേക്ക് അവധിക്കാലം ചെലവഴിക്കാൻ കാറിൽ പോയവരാണ് അപകടത്തിൽ പെട്ടത്. രണ്ടു കുട്ടികൾ ഉൾപ്പെടെ ആറു പേരാണ് കാറിൽ ഉണ്ടായിരുന്നത്.
ആറുപേരും സംഭവ സ്ഥലത്ത് വെച്ചു തന്നെ മരണപ്പട്ടു. കാറും ലോറിയും ഒരേ ദിശയിലായിരുന്നു സഞ്ചരിച്ചിരുന്നത്. ഇതിനിടെ മറ്റൊരു ട്രക്കുമായി കണ്ടെയ്നര് ലോറി കൂട്ടിയിടിക്കുകയായിരുന്നു. രണ്ടു വാഹനങ്ങളും മറിഞ്ഞു. എന്നാല് കണ്ടെയ്നര് ലോറി കാറിന് മുകളിലേക്കാണ് മറിഞ്ഞതെന്നു ദൃക്സാക്ഷികൾ പറഞ്ഞു. പിന്നീട് ക്രയിൻ എത്തിച്ചാണ് കണ്ടെയ്നര് ലോറി കാറിന് മുകളില് നിന്ന് മാറ്റിയത്. മൃതദേഹങ്ങള് നീലമംഗല സര്ക്കാര് ആശുപത്രിയിലെ മോര്ച്ചറിയിലേക്ക് മാറ്റി.”
