റെയിൽവേ പ്ലാറ്റ്ഫോമിൽ കാൽവഴുതി വീഴാനാഞ്ഞ ഡിജിപിക്ക് രക്ഷകനായി എസ്ഐ ! നന്ദി പറഞ്ഞ് പോലീസ് മേധാവി

ആലപ്പുഴ റെയില്‍വേ സ്റ്റേഷനില്‍ കാല്‍വഴുതി വീഴാനാഞ്ഞ സംസ്ഥാന പൊലീസ് മേധാവി ഷെയ്ഖ് ദര്‍വേഷ് സാഹേബിനു രക്ഷകനായത് എസ്‌ഐ.SI came to the rescue of DGP who could not slip on the railway platform.

ഇന്ന് ഉച്ചയ്ക്ക് പന്ത്രണ്ട് മണിയോടെ ആലപ്പുഴ റെയില്‍വേ സ്റ്റേഷനിലാണ് സംഭവം. ആലപ്പുഴ സൗത്ത് സ്റ്റേഷനിലെ സ്‌പെഷ്യല്‍ ബ്രാഞ്ച് എസ്‌ഐ കെ പ്രതാപനാണ് ഡിജിപിയെ വീഴാതെ താങ്ങിയത്.

സംഭവം ഇങ്ങനെ:

ഡിജിപി വരുന്നതിന്റെ ഭാഗമായിട്ടായിരുന്നു എസ്‌ഐ കെ പ്രതാപന്‍ റെയില്‍വേ സ്റ്റേഷനില്‍ എത്തിയത്. ആലപ്പുഴയില്‍ സ്വകാര്യ സന്ദര്‍ശനത്തിനായിരുന്നു ഡിജിപിയും കുടുംബവും എത്തിയത്.

ഡിജിപി എത്തുമ്പോൾ ചെറിയ മഴയില്‍ പ്ലാറ്റ്‌ഫോം വെള്ളംകെട്ടി നനഞ്ഞു കിടക്കുകയായിരുന്നു. ട്രെയിനിൽ നിന്നും ഡിജിപിയും കുടുംബവും പുറത്തേയ്ക്കിറങ്ങി.

പ്ലാറ്റ്‌ഫോമില്‍ കാല്‍ വഴുതി ഡിജിപി വീഴാന്‍ തുടങ്ങിയതും എസ്‌ഐ ഓടി വന്ന് താങ്ങി. ഷോട്‌സും ടീ ഷര്‍ട്ടുമായിരുന്നു ഡിജിപിയുടെ വേഷം. അതുകൊണ്ടുതന്നെ എസ്‌ഐക്ക് ആളെ മനസിലായില്ല.

ഡിജിപി നന്ദി പറഞ്ഞപ്പോഴാണ് പ്രതാപന്‍ മുഖത്തേയ്ക്ക് നോക്കിയത്. ഡിജിപിയെയാണ് താൻ താങ്ങി രക്ഷിച്ചതെന്ന് അപ്പോഴാണ് മനസ്സിലായത്.

ഡിജിപിയാണെന്ന് മനസിലായതോടെ എസ്‌ഐ അമ്പരന്നു. ഇതിന് പിന്നാലെ എസ്‌ഐ ഡിജിപിയെ അനുഗമിക്കുകയും ചെയ്തു. സംഭവം പൊലീസുകാരുടെ സോഷ്യല്‍ മീഡിയ ഗ്രൂപ്പുകളില്‍ വ്യാപകമായി പ്രചരിച്ചതോടെ നിരവധി ആളുകളാണ് എസ്ഐയെ അഭിനന്ദിച്ച് രംഗത്തെത്തിയിരിക്കുന്നത്.

English Summary: SI came to the rescue of DGP who could not slip on the railway platform.