മുതിർന്ന കോൺഗ്രസ് നേതാവ് കെ. സുധാകരന് ദേഹാസ്വാസ്ഥ്യം; ആശുപത്രിയില്‍ പ്രവേശിപ്പിച്ചു; സംഭവം തൃശൂരിൽ ചടങ്ങിനിടെ
തൃശ്ശൂർ: മുതിർന്ന കോൺഗ്രസ് നേതാവും മുൻ കെപിസിസി അധ്യക്ഷനുമായ കെ. സുധാകരന് ദേഹാസ്വാസ്ഥ്യം അനുഭവപ്പെട്ടതിനെ തുടർന്ന് തൃശ്ശൂരിലെ ഒരു സ്വകാര്യ ആശുപത്രിയിൽ പ്രവേശിപ്പിച്ചു.
കെപിസിസി പ്രസിഡന്റ് സണ്ണി ജോസഫിന്റെ ബന്ധുവിന്റെ വിവാഹച്ചടങ്ങിൽ പങ്കെടുക്കാനായിരുന്നു സുധാകരൻ തൃശ്ശൂരിലെത്തിയത്.
ചടങ്ങിനിടെയാണ് അദ്ദേഹത്തിന് അപ്രതീക്ഷിതമായി തലകറക്കം അനുഭവപ്പെട്ടത്. സഹപ്രവർത്തകരുടെ സഹായത്തോടെ ഉടൻ ആശുപത്രിയിൽ പ്രവേശിപ്പിക്കുകയായിരുന്നു.
ജനറൽ മെഡിസിൻ വിഭാഗത്തിൻറെയും ന്യൂറോളജി വിഭാഗത്തിൻറെയും വിദഗ്ധർ അദ്ദേഹത്തെ പരിശോധിച്ചു.
പ്രാഥമിക പരിശോധനകൾക്ക് ശേഷം എം.ആർ.ഐ സ്കാൻ ഉൾപ്പെടെ കൂടുതൽ പരിശോധനകൾക്ക് നിർദ്ദേശം നൽകിയതായി ആശുപത്രി വൃത്തങ്ങൾ അറിയിച്ചു. പരിശോധനാഫലം ലഭിക്കുന്നതോടെ തുടർചികിത്സ സംബന്ധിച്ച തീരുമാനം എടുക്കുമെന്നും ഡോക്ടർമാർ അറിയിച്ചു.
നിലവിൽ സുധാകരന്റെ ആരോഗ്യനില സ്ഥിരമാണെന്നും, ആശുപത്രി അധികൃതർ അദ്ദേഹത്തെ നിരീക്ഷണത്തിലാക്കിയിട്ടുണ്ടെന്നും അറിയിച്ചിട്ടുണ്ട്.
