വീടുകൾക്ക് മുന്നിലെ വൈദ്യുതി തൂണുകളിൽ ചുവന്ന അടയാളങ്ങൾ; പരിഭ്രാന്തിയിൽ നാട്ടുകാർ
തിരുവനന്തപുരം: വീടുകൾക്ക് മുന്നിലെ വൈദ്യുതി തൂണുകളിൽ ചുവന്ന അടയാളങ്ങൾ പ്രത്യക്ഷപ്പെട്ടതോടെ നേമം മേഖലയിൽ നാട്ടുകാർ ആശങ്കയിലായി.
മുഖംമൂടി ധരിച്ച ആളുകൾ രാത്രികാലങ്ങളിൽ തൂണുകളിൽ അടയാളം പതിപ്പിക്കുന്ന ദൃശ്യങ്ങൾ സിസിടിവിയിൽ പതിഞ്ഞതോടെയാണ് പരിഭ്രാന്തി വ്യാപിച്ചത്.
കോർപ്പറേഷൻ സോണൽ ഓഫീസ് ലെയിൻ, ജെ.പി. ലെയിൻ തുടങ്ങിയ ഉൾറോഡുകളിലെ ചില വീടുകൾക്ക് മുന്നിലാണ് ചുവപ്പ് നിറത്തിലുള്ള അടയാളങ്ങൾ കണ്ടെത്തിയത്.
നാല് വർഷം മുമ്പ് വീടുകൾക്ക് മുന്നിൽ കറുത്ത സ്റ്റിക്കറുകൾ പതിപ്പിച്ചതിന് പിന്നാലെ പ്രദേശത്ത് മോഷണങ്ങൾ നടന്ന അനുഭവം ഉണ്ടായതിനാൽ, കവർച്ചാ സംഘങ്ങളുടെ നീക്കമാണെന്ന സംശയം നാട്ടുകാർക്കുണ്ടായി.
ഇതിനെ തുടർന്ന് റസിഡന്റ്സ് അസോസിയേഷൻ ഭാരവാഹികൾ സിസിടിവി ദൃശ്യങ്ങളുമായി നേമം പൊലീസിനെ സമീപിച്ചു. പൊലീസ് അന്വേഷണം ആരംഭിച്ചതിന് പിന്നാലെ രണ്ട് പേർ സ്റ്റേഷനിലെത്തി വിശദീകരണം നൽകി.
തങ്ങൾ ഒരു സ്വകാര്യ ഫൈബർ നെറ്റ്വർക്ക് കമ്പനിയിലെ ജീവനക്കാരാണെന്നും, പുതിയ കണക്ഷൻ നൽകേണ്ട വീടുകൾ തിരിച്ചറിയുന്നതിനായി തൂണുകളിൽ ചുവന്ന അടയാളം പതിപ്പിച്ചതാണെന്നും അവർ അറിയിച്ചു.
സ്പ്രേ പെയിന്റ് ഉപയോഗിച്ചതിനാൽ സുരക്ഷാ മുൻകരുതലായി മുഖം മറച്ചതാണെന്നും ഇവർ പൊലീസിനോട് പറഞ്ഞു. ഇതോടെ സംഭവത്തെക്കുറിച്ചുള്ള തെറ്റിദ്ധാരണ നീങ്ങിയതായി പൊലീസ് വ്യക്തമാക്കി.
തുടർന്ന് റസിഡന്റ്സ് അസോസിയേഷൻ ഭാരവാഹികൾക്കും നാട്ടുകാർക്കും യഥാർത്ഥ വിവരം പൊലീസ് കൈമാറി ഭീതിയകറ്റി.
അതേസമയം, സംശയാസ്പദമായ പ്രവർത്തനങ്ങൾ ശ്രദ്ധയിൽപ്പെട്ടാൽ ഉടൻ പൊലീസിനെ അറിയിക്കണമെന്ന് അധികൃതർ മുന്നറിയിപ്പ് നൽകി.
English Summary
Residents in Nemmam, Thiruvananthapuram, were alarmed after red markings appeared on electric poles in front of houses. CCTV footage showing masked individuals placing the marks raised fears of possible theft attempts. Police investigation later revealed that the markings were made by private fiber network workers to identify houses for new connections. The misunderstanding was cleared, and residents were reassured, though police advised continued vigilance.
Red markings on electric poles trigger panic in Nemmam; police clarify fiber network work
Nemmam, Thiruvananthapuram, CCTV, Police Investigation, Public Panic, Fiber Network, Kerala News
