ഒരിക്കൽ പോലും ജോലി ചെയ്തിട്ടില്ലാത്ത സ്ഥാപനത്തിൽ നിന്നു പിരിച്ചുവിടൽ നോട്ടീസ് ലഭിച്ച് യുവതി
ഒരിക്കൽ പോലും ജോലി ചെയ്തിട്ടില്ലാത്ത ഒരു സ്ഥാപനത്തിൽ നിന്നു പിരിച്ചുവിടൽ നോട്ടീസ് ലഭിച്ചാൽ എന്തായിരിക്കും അവസ്ഥ?
അത്തരത്തിലൊരു വിചിത്രവും ആശങ്കാജനകവുമായ അനുഭവമാണ് കരിയർ കൗൺസിലറായ സൈമൺ ഇംഗാരി സോഷ്യൽ മീഡിയയിലൂടെ പങ്കുവെച്ചിരിക്കുന്നത്.
തന്റെ ഭാര്യയ്ക്കുണ്ടായ അനുഭവമാണ് അദ്ദേഹം എക്സ് (മുൻ ട്വിറ്റർ) പ്ലാറ്റ്ഫോമിൽ കുറിച്ചത്. സംഭവം വായിച്ചവരെ ഒരുപോലെ അമ്പരപ്പിക്കുകയും ചിരിപ്പിക്കുകയും ചെയ്തിരിക്കുകയാണ്.
ഒരു ദിവസം പതിവുപോലെ ഇമെയിൽ പരിശോധിക്കുന്നതിനിടെയാണ് തന്റെ ഭാര്യയ്ക്ക് ഒരു അപ്രതീക്ഷിത സന്ദേശം ലഭിച്ചത്. ഒരു കമ്പനിയിൽ നിന്നുള്ള ഔദ്യോഗിക ഇമെയിലായിരുന്നു അത്.
ഇമെയിൽ തുറന്നതോടെ അവരെ ഞെട്ടിച്ചത്, ജോലിയിൽ നിന്നു പിരിച്ചുവിട്ടതായി അറിയിക്കുന്ന നോട്ടീസായിരുന്നു. ഇതു കണ്ട നിമിഷം തന്നെ അവർ പരിഭ്രാന്തിയിലായി.
“എന്താണ് തെറ്റ് ചെയ്തത്?”, “ഡെഡ്ലൈനുകൾ തെറ്റിയോ?”, “ജോലിയിൽ എന്തെങ്കിലും വലിയ വീഴ്ച സംഭവിച്ചോ?” എന്നിങ്ങനെ നിരവധി ചോദ്യങ്ങൾ മനസ്സിലൂടെ കടന്നുപോയതായി സൈമൺ ഇംഗാരി കുറിക്കുന്നു.
എന്നാൽ, ഇമെയിൽ കൂടുതൽ ശ്രദ്ധയോടെ വായിച്ചപ്പോഴാണ് സത്യം വ്യക്തമായത്. അവർക്ക് ആ സ്ഥാപനത്തിൽ ഒരിക്കൽ പോലും ജോലി ചെയ്തിട്ടേയില്ല.
ഒരിക്കലും അപേക്ഷ നൽകിയിട്ടില്ലാത്ത, അഭിമുഖത്തിൽ പോലും പങ്കെടുത്തിട്ടില്ലാത്ത ഒരു കമ്പനിയിൽ നിന്നാണ് പിരിച്ചുവിടൽ നോട്ടീസ് എത്തിയിരിക്കുന്നത്. ഇതോടെയാണ് സംഭവം മറ്റൊരു തലത്തിലേക്ക് മാറിയത്.
പിന്നീട് നടത്തിയ അന്വേഷണത്തിലാണ് ഇമെയിൽ അയച്ചത് എച്ച്ആർ വിഭാഗത്തിലെ ഒരു പിഴവാണെന്ന് വ്യക്തമായത്.
മറ്റൊരു ജീവനക്കാരന് അയക്കേണ്ട പിരിച്ചുവിടൽ ഇമെയിൽ അബദ്ധത്തിൽ തെറ്റായ വിലാസത്തിലേക്കാണ് അയച്ചതെന്ന് കണ്ടെത്തി.
ഒരിക്കൽ പോലും ജോലി ചെയ്തിട്ടില്ലാത്ത സ്ഥാപനത്തിൽ നിന്നു പിരിച്ചുവിടൽ നോട്ടീസ് ലഭിച്ച് യുവതി
ഈ അശ്രദ്ധയെയാണ് സൈമൺ ഇംഗാരി രൂക്ഷമായി വിമർശിക്കുന്നത്. എച്ച്ആർ വിഭാഗങ്ങൾ കൂടുതൽ ഉത്തരവാദിത്തത്തോടെയും ജാഗ്രതയോടെയും പ്രവർത്തിക്കേണ്ടതിന്റെ ആവശ്യകത അദ്ദേഹം പോസ്റ്റിലൂടെ ചൂണ്ടിക്കാട്ടുന്നു.
ഇത്തരത്തിലുള്ള അശ്രദ്ധമായ ഇമെയിലുകൾ ആളുകളിൽ വലിയ മാനസിക സമ്മർദ്ദം സൃഷ്ടിക്കുമെന്നും, ചിലപ്പോൾ ഹൃദയാഘാതം വരെ ഉണ്ടാകാൻ സാധ്യതയുണ്ടെന്നും സൈമൺ മുന്നറിയിപ്പ് നൽകുന്നു.
ഒരു നിമിഷം കൊണ്ട് ഒരാളുടെ മാനസികാവസ്ഥ തകർക്കാൻ ഇത്തരം തെറ്റായ ആശയവിനിമയങ്ങൾക്കാവുമെന്ന് അദ്ദേഹം പറയുന്നു.
പോസ്റ്റ് വൈറലായതോടെ നിരവധി രസകരവും ഗൗരവമുള്ളതുമായ പ്രതികരണങ്ങളാണ് കമന്റുകളായി എത്തുന്നത്.
“കമ്പനിയിൽ നിന്ന് സെറ്റിൽമെന്റ് തുക ആവശ്യപ്പെട്ട് തിരിച്ച് മെയിൽ അയയ്ക്കൂ” എന്നാണ് ഒരാൾ തമാശയായി കുറിച്ചത്.
മറ്റുചിലർ, ഇത്തരം പിഴവുകൾ ഒരാളുടെ ആത്മവിശ്വാസത്തെയും മാനസികാരോഗ്യത്തെയും ദോഷകരമായി ബാധിക്കുമെന്നും, കോർപ്പറേറ്റ് ലോകത്ത് ആശയവിനിമയത്തിൽ കൂടുതൽ സൂക്ഷ്മത അനിവാര്യമാണെന്നും അഭിപ്രായപ്പെട്ടു.
