കെഎസ്ഇബി പിഴയിട്ടത് 57,005 രൂപ; ഒപ്പം പോലീസ് കേസും; ഒടുവിൽ രക്ഷയ്ക്കെത്തിയത് സ്ഥലം എംഎല്എ; പുഷ്പലതയ്ക്ക് ആശ്വാസം
റാന്നി: അറിവില്ലായ്മയെ തുടർന്ന് കെ.എസ്.ഇ.ബി ചുമത്തിയ കനത്ത പിഴയും പൊലീസ് കേസും മൂലം സമാധാനം നഷ്ടപ്പെട്ട ക്രിസ്മസ് കാലമായിരുന്നു വിധവയായ പുഷ്പലതയ്ക്ക്.
എന്നാൽ അഡ്വ. പ്രമോദ് നാരായൺ എം.എൽ.എ ഇടപെട്ടതോടെ പ്രശ്നത്തിന് ശുഭകരമായ പരിഹാരം ലഭിച്ചു.
ഡിസംബർ 15നാണ് സംഭവങ്ങളുടെ തുടക്കം. പ്ലാങ്കമൺ കരിംപ്ലാനിൽ ലൈഫ് പദ്ധതിയിൽ നിർമ്മിച്ച പുഷ്പലതയുടെ വീട്ടിലെ വർക്ക് ഏരിയയ്ക്ക് കമ്പിവല സ്ഥാപിക്കാനായി എത്തിയ തൊഴിലാളികൾ സമീപത്തെ വീട്ടിൽ നിന്ന് വൈദ്യുതി എടുത്തു.
തൊഴിലാളികൾ പുറത്തുനിന്ന് കരണ്ട് എടുത്തുകൊള്ളാമെന്ന് പറഞ്ഞതോടെ പുഷ്പലത അത് അംഗീകരിച്ചു.
ഈ സമയത്ത് മീറ്റർ റീഡിംഗ് എടുക്കാനെത്തിയ കെ.എസ്.ഇ.ബി ജീവനക്കാരൻ അനുമതിയില്ലാതെ ഗാർഹിക കണക്ഷനിൽ നിന്ന് വൈദ്യുതി ഉപയോഗിച്ചതായി റിപ്പോർട്ട് ചെയ്തു.
തുടർന്ന് കെ.എസ്.ഇ.ബി 57,005 രൂപ പിഴ ഈടാക്കണമെന്ന് നോട്ടീസ് നൽകി, വൈദ്യുതി മോഷണക്കേസായി പൊലീസിൽ പരാതി നൽകുകയും ചെയ്തു.
അന്നുതന്നെ വീട്ടിലെ മീറ്റർ നീക്കം ചെയ്ത് വൈദ്യുതി ബന്ധം വിച്ഛേദിച്ചു. തൊഴിലാളികളുടെ തെറ്റാണെന്നും തനിക്ക് നിയമനടപടികളെക്കുറിച്ച് അറിവില്ലായിരുന്നുവെന്നും പറഞ്ഞ് പുഷ്പലത അപേക്ഷ നൽകിയെങ്കിലും അധികൃതർ നിലപാട് മാറ്റിയില്ല.
ദിവസം 600 രൂപ മാത്രം വരുമാനമുള്ള തനിക്ക് ഇത്രയും വലിയ പിഴ അടയ്ക്കാൻ കഴിയില്ലെന്ന് പറഞ്ഞ് പുഷ്പലത എം.എൽ.എയെ സമീപിച്ചു. പിഴ കുറയ്ക്കണമെന്ന് എം.എൽ.എ ആവശ്യപ്പെട്ടെങ്കിലും ആദ്യം കെ.എസ്.ഇ.ബി തയ്യാറായില്ല.
പിന്നീട് വൈദ്യുതിമന്ത്രി കെ. കൃഷ്ണൻകുട്ടിയെയും മുതിർന്ന ഉദ്യോഗസ്ഥരെയും തുടർച്ചയായി ബന്ധപ്പെട്ടതിന്റെ ഫലമായി പിഴ 57,005 രൂപയിൽ നിന്ന് 1,425 രൂപയായി കുറച്ചു. തുടർന്ന് തിങ്കളാഴ്ച രാവിലെ വീട്ടിലെ വൈദ്യുതി ബന്ധം പുനഃസ്ഥാപിച്ചു.
English Summary:
A widowed woman in Ranni, Pushpalatha, faced severe distress after KSEB imposed a ₹57,005 fine and filed a police case over unauthorized electricity use by workers without her knowledge. Following intervention by MLA Pramod Narayan and discussions with the Power Minister, the fine was reduced to ₹1,425 and electricity supply was restored.
ranni-kseb-fine-reduced-after-mla-intervention
Ranni, KSEB, Electricity Theft Case, Kerala News, MLA Intervention, Human Interest, Power Department, Pushpalatha
