രാഹുൽ ഈശ്വറിന് പുതിയ നിയമക്കുരുക്ക്; ഹർജിയിൽ നോട്ടീസയച്ച് കോടതി

രാഹുൽ ഈശ്വറിന് പുതിയ നിയമക്കുരുക്ക്; ഹർജിയിൽ നോട്ടീസയച്ച് കോടതി

തിരുവനന്തപുരം ∙ രാഹുൽ മാങ്കൂട്ടത്തിലിനെതിരായ ബലാത്സംഗ കേസിലെ പരാതിക്കാരിയെ വീണ്ടും അധിക്ഷേപിച്ചെന്ന പരാതിയിൽ രാഹുൽ ഈശ്വറിന് പുതിയ നിയമക്കുരുക്ക്.

കേസിൽ നേരത്തെ അറസ്റ്റിലായി ജാമ്യത്തിലിറങ്ങിയ ശേഷവും യുവതിക്കെതിരെ അപകീർത്തികരമായ പരാമർശങ്ങൾ നടത്തിയതോടെയാണ് ജാമ്യം റദ്ദാക്കണമെന്നാവശ്യപ്പെട്ട് അന്വേഷണ സംഘം കോടതിയെ സമീപിച്ചത്.

പൊലീസിന്റെ ഹർജി പരിഗണിച്ച തിരുവനന്തപുരം അഡീഷണൽ സി ജെ എം കോടതി രാഹുൽ ഈശ്വറിന് നോട്ടീസ് അയച്ചു. ഈ മാസം 19ന് നേരിട്ടോ അഭിഭാഷകൻ മുഖേനയോ ഹാജരാകണമെന്നാണ് കോടതി നിർദ്ദേശം.

ജാമ്യം അനുവദിച്ചപ്പോൾ പരാതിക്കാരിക്കെതിരെ മോശം പരാമർശങ്ങൾ നടത്തരുതെന്ന് കോടതി കർശന വ്യവസ്ഥ വെച്ചിരുന്നുവെന്നും, ഇത് ലംഘിച്ചുവെന്നുമാണ് പൊലീസ് കോടതിയെ അറിയിച്ചത്.

ജാമ്യം റദ്ദാക്കണമെന്ന് ആവശ്യപ്പെട്ട് പത്താം തീയതിയാണ് പൊലീസ് കോടതിയെ സമീപിച്ചത്.

രാഹുൽ മാങ്കൂട്ടത്തിൽ ഉൾപ്പെട്ട കേസിലെ പരാതിക്കാരിയെ രാഹുൽ ഈശ്വർ തന്റെ യൂട്യൂബ് ചാനലിലൂടെ വീണ്ടും അധിക്ഷേപിച്ചതാണ് ജാമ്യവ്യവസ്ഥ ലംഘിച്ചതായി പൊലീസ് ചൂണ്ടിക്കാട്ടുന്നത്.

ഇതിന് മുമ്പും സമാനമായ പരാമർശങ്ങളെത്തുടർന്നാണ് രാഹുൽ ഈശ്വറിനെതിരെ കേസ് രജിസ്റ്റർ ചെയ്യുകയും അറസ്റ്റ് രേഖപ്പെടുത്തുകയും ചെയ്തത്.

ജാമ്യത്തിലിറങ്ങിയ ശേഷവും നടത്തിയ പരാമർശങ്ങൾ അതിജീവിതയുടെ അന്തസ്സിനെ ബാധിക്കുന്നതും അന്വേഷണത്തെ സ്വാധീനിക്കാൻ സാധ്യതയുള്ളതുമാണെന്ന് അന്വേഷണ സംഘം കോടതിയിൽ വ്യക്തമാക്കി.

ജാമ്യം അനുവദിച്ച അതേ അഡീഷണൽ സി ജെ എം കോടതിയിലാണ് പൊലീസ് റിപ്പോർട്ട് സമർപ്പിച്ചിരിക്കുന്നത്.

ജാമ്യവ്യവസ്ഥകൾ ലംഘിച്ചാൽ ജാമ്യം റദ്ദാക്കാനുള്ള അധികാരം കോടതിക്കുണ്ടെന്നും, നോട്ടീസ് നൽകിയ സാഹചര്യത്തിൽ തുടർനടപടികളാണ് ഇനി നിർണായകമെന്നും നിയമവൃത്തങ്ങൾ ചൂണ്ടിക്കാട്ടുന്നു.

English Summary:

Rahul Easwar has landed in fresh legal trouble after allegedly insulting the survivor in the Rahul Mankootathil rape case even after being released on bail. Police have approached the court seeking cancellation of his bail, citing violation of bail conditions. The Thiruvananthapuram Additional CJM Court has issued a notice asking him to appear on the 19th, raising the possibility of bail cancellation.

rahul-easwar-bail-cancellation-notice-rape-case

Rahul Easwar, Rahul Mankootathil Case, Bail Cancellation, Kerala News, Thiruvananthapuram, Sexual Assault Case