ഫെയ്സ്ബുക്ക് കുറിപ്പിന് പിന്നാലെ ദുരൂഹ മരണം; അജിത്‌കുമാർ കേസിൽ പ്രത്യേക അന്വേഷണം

പോത്തൻകോട് :തദ്ദേശ തിരഞ്ഞെടുപ്പുമായി ബന്ധപ്പെട്ട കുടുംബ–രാഷ്ട്രീയ സംഘർഷങ്ങൾക്കിടയിൽ ദുരൂഹ സാഹചര്യത്തിൽ മരിച്ച

വെമ്പായം വേറ്റിനാട് സ്വദേശി എം. അജിത്‌കുമാറിന്റെ (53) മരണത്തിൽ പ്രത്യേക അന്വേഷണ സംഘം രൂപീകരിക്കാൻ സർക്കാർ തീരുമാനിക്കുന്നു.

ദുരൂഹ സാഹചര്യത്തിൽ മരിച്ച അജിത്‌കുമാറിന്റെ മരണത്തിൽ സർക്കാർ ഇടപെടൽ

സംഭവത്തിൽ സമഗ്രവും നിഷ്പക്ഷവുമായ അന്വേഷണം ആവശ്യപ്പെട്ട് മന്ത്രി ജി.ആർ. അനിൽ മുഖ്യമന്ത്രിക്ക് കത്ത് നൽകിയതിനെ തുടർന്നാണ് നടപടി.

വട്ടപ്പാറ പൊലീസിൽ നിന്നുള്ള അന്വേഷണം മാറ്റണമെന്നാവശ്യപ്പെട്ട് അജിത്തിന്റെ മാതാപിതാക്കൾ നൽകിയ പരാതിയും മന്ത്രിയുടെ കത്തിൽ ഉൾപ്പെടുത്തിയിട്ടുണ്ട്.

അജിത്തിന്റെ കുടുംബവീട്ടിലെത്തി അമ്മ രാധാദേവിയെയും അച്ഛൻ മാധവൻ നായരെയും മന്ത്രി ജി.ആർ. അനിലും സിപിഎം ജില്ലാ സെക്രട്ടറി വി.

ജോയിയും സന്ദർശിച്ചു. കുടുംബത്തിന്റെ ആശങ്കകൾ സർക്കാർ ഗൗരവമായി കാണുമെന്നും നീതി ഉറപ്പാക്കുമെന്നും നേതാക്കൾ അറിയിച്ചു.

കഴിഞ്ഞ ഒക്ടോബർ 19-ന് രാവിലെ 5 മണിയോടെയാണ് അജിത്തിനെ വീട്ടിലെ ഓഫിസ് മുറിയിൽ മരിച്ച നിലയിൽ കണ്ടെത്തിയത്.

തുടക്കത്തിൽ കുടുംബപ്രശ്നങ്ങളെ തുടർന്ന് അജിത് ആത്മഹത്യ ചെയ്തതെന്നായിരുന്നു മകൻ വിനായക് ശങ്കറിന്റെ മൊഴി.

ബൈക്കിൽ പോകുന്നതിനിടെ തലയിൽ തേങ്ങ വീണു, നിയന്ത്രണം വിട്ട ബൈക്ക് താഴ്ചയിലേക്ക് മറിഞ്ഞു; യുവാവിന് ദാരുണാന്ത്യം

60 ദിവസം കഴിഞ്ഞ് പുറത്ത് വന്ന പോസ്റ്റ്മോർട്ടം റിപ്പോർട്ട് നിർണായകം

എന്നാൽ സംഭവം നടന്ന് 60 ദിവസം കഴിഞ്ഞ് പുറത്തുവന്ന പോസ്റ്റ്മോർട്ടം റിപ്പോർട്ട് മരണകാരണം തലക്കേറ്റ ഗുരുതര പരുക്കാണെന്ന് വ്യക്തമാക്കിയതോടെ കേസ് പുതിയ വഴിത്തിരിവിലെത്തി.

സംഭവ ദിവസം അജിത്തും മകനും തമ്മിൽ വാക്കുതർക്കവും തുടർന്ന് ഏറ്റുമുട്ടലും ഉണ്ടായിരുന്നുവെന്ന് വിനായക് പിന്നീട് മൊഴി നൽകി.

വടിയെടുത്ത് അച്ഛനെ അടിച്ചതായും മകൻ സമ്മതിച്ചിട്ടുണ്ട്. ഇതിന്റെ അടിസ്ഥാനത്തിൽ അജിത്തിന്റെ മാതാപിതാക്കളുടെ മൊഴി രേഖപ്പെടുത്തി പൊലീസ് ഭാര്യ ബീനയെയും മകൻ വിനായകിനെയും ചോദ്യം ചെയ്തിരുന്നു.

അതേസമയം, ഭർത്താവിന്റെ മരണത്തിൽ തനിക്ക് സംശയമുണ്ടായിരുന്നില്ലെന്ന് ഭാര്യ ബീന പ്രതികരിച്ചു.

വാഹനത്തിന്റെ താക്കോൽ ആവശ്യപ്പെട്ട് അജിത്തും മകനും തമ്മിൽ പിടിവലി നടന്നതായും, താക്കോൽ നൽകാത്തതിനെ തുടർന്ന് ടോർച്ച് ഉപയോഗിച്ച് അടിക്കാൻ അജിത് ശ്രമിച്ചപ്പോൾ

ചെമ്പരത്തി കമ്പെടുത്ത് മകൻ തിരിച്ചടിക്കുകയായിരുന്നുവെന്നും ബീനയുടെ മൊഴി പൊലീസ് സ്ഥിരീകരിച്ചു.

ഭാര്യക്ക് സീറ്റ് നൽകിയാൽ എതിർക്കുമെന്ന് അജിത്തിന്റെ ഫെയ്സ്ബുക്ക് കുറിപ്പ്

ബ്ലോക്ക് പഞ്ചായത്ത് മുൻ അംഗമായ ബീന, കോൺഗ്രസ് സ്ഥാനാർഥിയായി വെമ്പായം പഞ്ചായത്തിൽ മത്സരിച്ചെങ്കിലും പരാജയപ്പെട്ടിരുന്നു.

തദ്ദേശ തിരഞ്ഞെടുപ്പിൽ ഭാര്യയ്ക്ക് സീറ്റ് നൽകിയാൽ എതിർത്ത് രംഗത്തിറങ്ങുമെന്ന അജിത്തിന്റെ ഫെയ്സ്ബുക്ക് കുറിപ്പും സംഭവവുമായി ബന്ധപ്പെട്ട് വീണ്ടും ചർച്ചയാകുകയാണ്.

പ്രത്യേക അന്വേഷണ സംഘത്തിന്റെ കണ്ടെത്തലുകളിലേക്കാണ് ഇപ്പോൾ പൊതുസമൂഹത്തിന്റെ ശ്രദ്ധ.

കുടുംബത്തിനകത്തെ സംഘർഷങ്ങളും തദ്ദേശ തിരഞ്ഞെടുപ്പ് പശ്ചാത്തലത്തിലുള്ള രാഷ്ട്രീയ വിവാദങ്ങളും ചേർന്ന ഈ കേസിൽ പ്രത്യേക അന്വേഷണ സംഘം നടത്തുന്ന കണ്ടെത്തലുകളാണ് ഇനി നിർണായകം.

നീതിയും സത്യവും പുറത്തുവരണമെന്ന കുടുംബത്തിന്റെയും പൊതുസമൂഹത്തിന്റെയും ആവശ്യം സർക്കാർ നടപടി വഴി എത്രത്തോളം സാധ്യമാകുമെന്ന് വരാനിരിക്കുന്ന ദിവസങ്ങൾ വ്യക്തമാക്കും.

English Summary

The Kerala government will appoint a special investigation team to probe the mysterious death of Pothencode native M. Ajith Kumar. Initially reported as suicide, the case took a dramatic turn after the postmortem revealed death due to head injuries.