ആലപ്പുഴ: പ്രതിയെ പിടികൂടുന്നതിനിടെ പൊലീസിന് നേരെ ആക്രമണം. ആലപ്പുഴ മാന്നാർ കുറത്തിക്കാട് ആണ് സംഭവം. ആക്രമണത്തിൽ എസ്ഐ ഉദയകുമാറിന്റെ കൈയ്ക്ക് പരിക്കേറ്റു.
നിരവധി കേസിലെ പ്രതിയായ ഭരണിക്കാവ് സ്വദേശി നന്ദുവിനെ അറസ്റ്റ് ചെയ്യുമ്പോഴാണ് ആക്രമണം ഉണ്ടായത്. പൊലീസിനെ കണ്ട് പ്രതി ഓടി രക്ഷപ്പെടാൻ ശ്രമിക്കുകയായിരുന്നു.
പ്രതിയും ഒപ്പം ഉണ്ടായിരുന്ന സുഹൃത്തുക്കളും ചേർന്നാണ് പൊലീസിനെ ആക്രമിച്ചത്. കുറത്തിക്കാട് സ്വദേശിയായ യുവാവിനെ ആക്രമിച്ച കേസിലാണ് പ്രതിയായ നന്ദുവിനെ അറസ്റ്റ് ചെയ്യാൻ പൊലീസ് എത്തിയത്.
ഇന്ന് രാവിലെ പത്ത് മണിയോടെയാണ് സംഭവം. പരിക്കേറ്റ എസ്ഐ ആശുപത്രിയിൽ ചികിത്സ തേടി. സംഭവത്തിൽ നന്ദു, അരുൺ, വിഷ്‌ണു എന്നിവർക്കെതിരെ വള്ളികുന്നം പൊലീസ് കേസെടുത്തു.
