ബെർലിൻ: 71കാരിയായ പൈലറ്റ് ഓടിച്ച വിമാനം വീടിന്റെ ടെറസിലേക്ക് ഇടിച്ചു കയറി അപകടം. രണ്ട് പേർ കൊല്ലപ്പെട്ടു. ജർമനിയിലാണ് സംഭവം.
അപകടത്തിൽ നിരവധിപ്പേർക്ക് പരിക്കേറ്റിട്ടുണ്ട്. പശ്ചിമ ജർമനിയിലെ നോർത്ത് റൈൻ വെസ്റ്റ്ഫാലിയയിലാണ് അപകടം നടന്നത്. ശനിയാഴ്ച ഉച്ചകഴിഞ്ഞാണ് ചെറുയാത്രാ വിമാനം അപകടത്തിൽപ്പെട്ടത്.
മോൻചെൻഗ്ലാഡ്ബാച്ച് എയർ പോർട്ടിലേക്ക് എത്താൻ രണ്ട് മിനിറ്റ് ദൂരം മാത്രം ഉള്ളപ്പോഴാണ് സംഭവം. സാങ്കേതിക തകരാർ വിമാനം നേരിട്ടതായാണ് ജർമൻ മാധ്യമങ്ങൾ റിപ്പോർട്ട് ചെയ്യുന്നത്.
വീടിന്റെ ടെറസിലേക്ക് ഇടിച്ച് കയറിയതിന് പിന്നാലെ വിമാനത്തിന് തീ പിടിക്കുകയായിരുന്നു. അപകടത്തിൽ വീടിനും സാരമായ തകരാറുണ്ടായിട്ടുണ്ട്. 71കാരിയായ വനിതാ പൈലറ്റ് അടക്കം രണ്ട് പേരാണ് അപകടത്തിൽ കൊല്ലപ്പെട്ടിട്ടുള്ളതെന്നാണ് അന്തർ ദേശീയ മാധ്യമങ്ങൾ റിപ്പോർട്ട് ചെയ്തിട്ടുള്ളത്.
അഗ്നിരക്ഷാ സേന ഉടനെ സ്ഥലത്ത് എത്തിയാണ് തീ നിയന്ത്രണ വിധേയമാക്കിയത്. അപകടത്തിൽ മരിച്ച രണ്ടാമത്തെ ആളെ ഇനിയും തിരിച്ചറിഞ്ഞിട്ടില്ല. വീട്ടിലുണ്ടായിരുന്ന മൂന്ന് പേർക്കും പരിക്കേറ്റതായാണ് വിവരം.
കിഴക്കൻ ജർമ്മനിയിലെ അൽകെർസ്ലെബെനിൽ നിന്ന് ശനിയാഴ്ചയാണ് വിമാനം പറന്നുയർന്നത്. ജർമൻ നഗരമാ എർഫർട്ടിലേക്ക് പുറപ്പെട്ട വിമാനമാണ് അപകടത്തിൽപ്പെട്ടത്. സംഭവത്തിൽ അധികൃതർ അന്വേഷണം ആരംഭിച്ചു.
