ആർ.എസ്.എസ് അജണ്ടയ്ക്ക് റെയിൽവേ കുടപിടിക്കുന്നു
എറണാകുളം–ബെംഗളൂരു വന്ദേഭാരത് എക്സ്പ്രസിന്റെ ഉദ്ഘാടനച്ചടങ്ങിനിടെ വിദ്യാർത്ഥികളോട് ആർ.എസ്.എസ് ഗണഗീതം പാടിപ്പിച്ചതിനെതിരെ മുഖ്യമന്ത്രി പിണറായി വിജയൻ ശക്തമായി പ്രതികരിച്ചു.
രാജ്യത്തെ ഏറ്റവും വലിയ പൊതുമേഖലാ സ്ഥാപനമായ ഇന്ത്യൻ റെയിൽവേയെ വർഗീയ പ്രചരണത്തിനായി ഉപയോഗിക്കാൻ നടത്തിയ സംഘപരിവാർ നീക്കമാണ് ഇതിലൂടെ വെളിവായതെന്നും ഇത് ഭരണഘടനാ തത്വങ്ങളുടെ പരസ്യ ലംഘനമാണെന്നും മുഖ്യമന്ത്രി ആരോപിച്ചു.
ദക്ഷിണ റെയിൽവേയുടെ നടപടി അങ്ങേയറ്റം പ്രതിഷേധാർഹമാണെന്നും, മതവിദ്വേഷവും വർഗീയ രാഷ്ട്രീയവും പ്രചരിപ്പിക്കുന്ന ആർ.എസ്.എസ് ഗാനം സർക്കാർ ചടങ്ങിൽ ഉൾപ്പെടുത്തിയതിലൂടെ ഭരണഘടനാ മൂല്യങ്ങളെ അവഹേളിച്ചതാണെന്നും അദ്ദേഹം പറഞ്ഞു.
സ്വാതന്ത്ര്യസമരത്തെ എതിർത്ത ആർ.എസ്.എസ് അജണ്ടയ്ക്ക് റെയിൽവേ കുടപിടിക്കുന്നുവെന്നതും അതീവ അപകടകരമാണെന്നും മുഖ്യമന്ത്രി അഭിപ്രായപ്പെട്ടു.
“ദേശഭക്തിഗാനമെന്ന പേരിൽ ഗണഗീതം സോഷ്യൽ മീഡിയയിൽ പങ്കുവെച്ചത് ദക്ഷിണ റെയിൽവേയെ പരിഹാസ്യരാക്കി, ഇന്ത്യൻ ദേശീയ പ്രസ്ഥാനത്തെയും അവഹേളിച്ചു,” — മുഖ്യമന്ത്രി ആരോപിച്ചു.
വന്ദേഭാരത് ഉദ്ഘാടനം ചടങ്ങിൽ കണ്ടത് തീവ്ര ഹിന്ദുത്വ രാഷ്ട്രീയത്തിന്റെ ഒളിച്ചുകടത്തലാണെന്നും, മതനിരപേക്ഷതയെ തകർക്കാനുള്ള സങ്കുചിത മനോഭാവമാണ് ഇതിന് പിന്നിലെന്നും അദ്ദേഹം വ്യക്തമാക്കി.
ഇത്തരം നീക്കങ്ങൾക്കെതിരെ മുഴുവൻ ജനങ്ങളും ഒന്നിച്ച് പ്രതിഷേധിക്കണമെന്ന് മുഖ്യമന്ത്രിയുടെ ആഹ്വാനം. എറണാകുളം സൗത്ത്–ബെംഗളൂരു വന്ദേഭാരത് എക്സ്പ്രസ് ഉദ്ഘാടനത്തിന് ശേഷം വിദ്യാർത്ഥികൾ ട്രെയിനിനുള്ളിൽ ഗണഗീതം പാടുന്ന വീഡിയോ ദക്ഷിണ റെയിൽവേയുടെ എക്സ് പ്ലാറ്റ്ഫോമിൽ പങ്കുവെച്ചിരുന്നു.
വിവാദങ്ങൾ ഉയർന്നതിനെ തുടർന്ന് വീഡിയോ പിന്നീട് നീക്കം ചെയ്തിരുന്നു. പ്രധാനമന്ത്രി നരേന്ദ്ര മോദിയാണ് കേരളത്തിന് അനുവദിച്ച മൂന്നാം വന്ദേഭാരത് സർവീസ് ഫ്ലാഗ് ഓഫ് ചെയ്തത്.
English Summary:
Kerala Chief Minister Pinarayi Vijayan condemned the singing of the RSS “Ganageetam” by students during the inauguration of the Ernakulam–Bengaluru Vande Bharat Express. He alleged that the event exposed an attempt by the Sangh Parivar to use Indian Railways — the country’s largest public sector institution — for communal propaganda, calling it a violation of the Constitution.
pinarayi-vijayan-condemns-rss-song-vande-bharat-event
Pinarayi Vijayan, Vande Bharat, RSS, Ganageetam, Southern Railway, Kerala News, Ernakulam Bengaluru Train, Secularism, Constitution, Narendra Modi, Sangh Parivar
