മലബാർ എക്സ്പ്രസിൽ അക്രമാസക്തമായി യാത്രക്കാരൻ; കത്തിവീശി
കോട്ടയം: ട്രെയിനിനുള്ളിൽ യാത്രക്കാരൻ കത്തി വീശിയ സംഭവത്തിൽ ഒരു പൊലീസുകാരന് പരിക്കേറ്റു. തിരുവനന്തപുരത്ത് നിന്ന് മംഗളൂരുവിലേക്ക് പോയ മലബാർ എക്സ്പ്രസിലാണ് സംഭവം.
ബുധനാഴ്ച രാത്രി പത്ത് മണിയോടെ ആണ് അക്രമം നടന്നത്. ചങ്ങനാശ്ശേരി സ്റ്റേഷൻ കടന്നതിന് പിന്നാലെയാണ് യാത്രക്കാരിൽ ഭീതി പടർത്തിയ സംഭവം അരങ്ങേറിയത്.
പത്തനംതിട്ട ജില്ലയിലെ കൊടുമൺ സ്വദേശിയായ അനിൽകുമാറാണ് ട്രെയിനിനുള്ളിൽ കത്തി വീശിയതെന്ന് പൊലീസ് സ്ഥിരീകരിച്ചു.
യാത്രയ്ക്കിടെ ഇയാളുടെ പെരുമാറ്റം സംശയാസ്പദമായതിനെ തുടർന്ന് റെയിൽവേ പൊലീസ് ഇയാളെ സമീപിച്ചപ്പോഴാണ് അക്രമം ഉണ്ടായത് എന്നാണ് പ്രാഥമിക വിവരം.
കയ്യിൽ കരുതിയിരുന്ന കത്തി ഉപയോഗിച്ച് ഇയാൾ പെട്ടെന്ന് ആക്രമണം നടത്തുകയായിരുന്നു.
സംഭവത്തിൽ ഒരു റെയിൽവേ പൊലീസുകാരന് പരിക്കേറ്റു. പരിക്ക് ഗുരുതരമല്ലെന്നാണ് അധികൃതർ അറിയിച്ചിരിക്കുന്നത്.
പരിക്കേറ്റ പൊലീസുകാരനെ ഉടൻ തന്നെ പ്രാഥമിക ചികിത്സയ്ക്കായി സമീപത്തെ ആശുപത്രിയിൽ പ്രവേശിപ്പിച്ചു. യാത്രക്കാരുടെ ഇടപെടലും മറ്റ് സുരക്ഷാ ഉദ്യോഗസ്ഥരുടെ സമയോചിതമായ പ്രതികരണവും മൂലം കൂടുതൽ അപകടങ്ങൾ ഒഴിവാക്കാനായി.
മലബാർ എക്സ്പ്രസിൽ അക്രമാസക്തമായി യാത്രക്കാരൻ; കത്തിവീശി
സംഭവം നടന്നതോടെ ട്രെയിനിനുള്ളിൽ പരിഭ്രാന്തി പടർന്നു. പല യാത്രക്കാരും കോച്ചിനുള്ളിൽ നിന്ന് മാറിനിൽക്കുകയും ചിലർ സുരക്ഷിത സ്ഥലങ്ങളിലേക്ക് മാറുകയും ചെയ്തു.
എന്നാൽ റെയിൽവേ പൊലീസിന്റെ ഇടപെടലിലൂടെ സ്ഥിതിഗതികൾ വേഗത്തിൽ നിയന്ത്രണവിധേയമാക്കി. ആക്രമണം നടത്തിയ അനിൽകുമാറിനെ റെയിൽവേ പൊലീസ് കസ്റ്റഡിയിലെടുത്തു.
ചങ്ങനാശ്ശേരി സ്റ്റേഷൻ കഴിഞ്ഞ ഉടൻ ട്രെയിൻ നിർത്തി, തുടർ നടപടികൾ സ്വീകരിച്ചതായാണ് വിവരം. പിടിയിലായ പ്രതിയെ ചോദ്യം ചെയ്യുന്നതടക്കമുള്ള നടപടികൾ പുരോഗമിക്കുകയാണ്.
അക്രമത്തിന് പിന്നിലെ കാരണം വ്യക്തമല്ലെങ്കിലും, മാനസിക അസ്വാസ്ഥ്യമോ മദ്യലഹരിയോ ഉണ്ടായിരുന്നോയെന്ന് പരിശോധിച്ചുവരികയാണെന്ന് പൊലീസ് അറിയിച്ചു.
