ഇസ്ലാമബാദ്: ഡോക്ടര്‍മാരും നേഴ്സുമാരും എഞ്ചിനീയര്‍മാരും കൂട്ടത്തോടെ
രാജ്യം വിടുന്നു. ഉയര്‍ന്ന വൈദഗ്ധ്യമുള്ള പ്രൊഫഷണല്‍ ജോലിക്ക് ആളെ കിട്ടാത്ത പ്രതിസന്ധിയില്‍ ഉലഞ്ഞ് പാകിസ്താന്‍. 2023 ന്റെ ആദ്യ പകുതിയില്‍ എട്ട് ലക്ഷം പാകിസ്താനികളാണ് രാജ്യം വിട്ടുപോയത്., അവരില്‍ ഒരു ലക്ഷം പേരെങ്കിലും ഡോക്ടര്‍മാര്‍, നഴ്‌സുമാര്‍, എഞ്ചിനീയര്‍മാര്‍, ഐടി വിദഗ്ധര്‍, അക്കൗണ്ടന്റുമാര്‍ എന്നിവരുള്‍പ്പെടെ ഉയര്‍ന്ന വൈദഗ്ധ്യമുള്ള പ്രൊഫഷണലുകളാണ്.
പാകിസ്താന്‍ എമിഗ്രേഷന്‍ ബ്യൂറോയില്‍ നിന്നുള്ള വിവരങ്ങളാണ് പുറത്ത് വന്നിരിക്കുന്ന്. കുടിയേറ്റക്കാരില്‍ പകുതിയിലധികം പേരും പാകിസ്താനിലെ പഞ്ചാബ് മേഖലയില്‍ നിന്നാണ്, ഏകദേശം 27,000 പേര്‍ പാക് അധീന കശ്മീരില്‍ നിന്ന് (പിഒകെ) വന്നവരാണ്. ഇത്രയധികം ആളുകളുടെ, പ്രത്യേകിച്ച് വൈദഗ്ധ്യമുള്ള പ്രൊഫഷണലുകളുടെ കുടിയേറ്റം പാക് സമ്പദ്വ്യവസ്ഥയ്ക്കും തൊഴില്‍ ശക്തിക്കും കാര്യമായ വെല്ലുവിളിയാണ് ഉയര്‍ത്തുന്നത്.
സാമ്പത്തിക പ്രതിസന്ധിയും അരാജകത്വവും കൊടികുത്തി വാഴുന്ന പാകിസ്താനില്‍ നിന്ന് വിദേശ രാജ്യങ്ങളിലേക്ക് കുടിയേറുന്നത് സമീപ വര്‍ഷങ്ങളില്‍ ക്രമാതീതമായി വര്‍ദ്ധിച്ചിട്ടുണ്ട്. 2022-ല്‍, ഇത് 2021-ന്റെ മൂന്നിരട്ടിയിലെത്തി, എക്സ്പ്രസ് ട്രിബ്യൂണലിന്റെ ലേഖനമനുസരിച്ച്, സൗദി അറേബ്യ, യുഎഇ എന്നിവിടങ്ങളിലേക്കാണ് പാകിസ്താനികള്‍ ഒഴുകുന്നത്. യൂറോപ്പിലാകട്ടെ റൊമാനിയയിലേക്കാണ് പാകിസ്താനികള്‍ തിരഞ്ഞെടുക്കുന്നത്.
