അനുമതിയില്ല; ഒല, ഊബര് ടാക്സികൾക്കെതിരെ നടപടിയെടുക്കാന് മോട്ടോര് വാഹന വകുപ്പ്
തിരുവനന്തപുരം: സര്ക്കാര് അനുമതിയില്ലാതെ പ്രവര്ത്തിക്കുന്ന ഓണ്ലൈന് ടാക്സി സേവനങ്ങളായ ഊബര്, ഒല എന്നിവയ്ക്കെതിരെ നടപടി സ്വീകരിക്കാന് മോട്ടോര് വാഹന വകുപ്പ് തയ്യാറെടുക്കുന്നു.
നടപടി സംബന്ധിച്ച് നിയമോപദേശം തേടിയതായാണ് ട്രാന്സ്പോര്ട്ട് കമ്മീഷണര് നാഗരാജു ചകിലം അറിയിച്ചത്.
ഉടന് തന്നെ ഈ രണ്ടു സ്ഥാപനങ്ങള്ക്കെതിരെയും കാരണം കാണിക്കല് നോട്ടീസ് നല്കുമെന്ന് വകുപ്പ് വ്യക്തമാക്കി.
സംസ്ഥാന സര്ക്കാര് 2024-ല് നടപ്പിലാക്കിയ ഓണ്ലൈന് അഗ്രിഗേറ്റര് നയം അനുസരിച്ച് രജിസ്ട്രേഷനായി ഇതുവരെ ഒരു കമ്പനിയാണ് അപേക്ഷ നല്കിയിട്ടുള്ളത്.
അത് ബൈക്ക് ടാക്സി സേവനത്തിനായാണ് അപേക്ഷിച്ചത്. എന്നാല്, ആവശ്യമായ രേഖകള് സമര്പ്പിക്കാത്തതിനാല് രജിസ്ട്രേഷന് പൂര്ത്തിയായിട്ടില്ലെന്നാണ് വിവരം.
നിയമപ്രകാരം അംഗീകാരം നേടാന് അപേക്ഷിക്കുന്ന സ്ഥാപനങ്ങള്ക്ക് ഓഫീസ്, കോള് സെന്റര്, കണ്ട്രോള് റൂം തുടങ്ങിയ അടിസ്ഥാന സൗകര്യങ്ങള് ഒരുക്കിയിരിക്കണം.
എന്നാല് നിലവില് പ്രവര്ത്തിക്കുന്ന ഓണ്ലൈന് ടാക്സി സേവനദാതാക്കള് ഇത്തരം സംവിധാനം കേരളത്തില് ഒരുക്കിയിട്ടില്ലെന്ന് മോട്ടോര് വകുപ്പ് വ്യക്തമാക്കുന്നു.
കൂടാതെ, ഈ സ്ഥാപനങ്ങളില് ഭൂരിഭാഗം ജീവനക്കാരും താല്ക്കാലിക അടിസ്ഥാനത്തില് മാത്രമാണ് ജോലി ചെയ്യുന്നത്. ഇവരുടെ പ്രധാന പ്രവര്ത്തനം ഓണ്ലൈനിലൂടെ ടാക്സി വാഹനങ്ങള് ഉപഭോക്താക്കള്ക്ക് ലഭ്യമാക്കുക മാത്രമാണെന്നും റിപ്പോര്ട്ട് പറയുന്നു.
വർഷങ്ങളായി നിരത്തിലോടുന്ന ഊബർ, ഓല തുടങ്ങിയ ഓൺലൈൻ ടാക്സികൾ നിയമവിരുദ്ധമാണെന്ന പ്രസ്താവന, സംസ്ഥാനത്ത് തെരുവ് യുദ്ധമെന്ന നിലയ്ക്ക് സംഘർഷം സൃഷ്ടിച്ചു.
പരമ്പരാഗത ഓട്ടോ-ടാക്സി തൊഴിലാളികളും ഓൺലൈൻ ഓട്ടോ-ടാക്സി തൊഴിലാളികളും തമ്മിലുള്ള ഏറ്റുമുട്ടലുകൾ പല ഇടങ്ങളിലും റിപ്പോർട്ട് ചെയ്യപ്പെട്ടിട്ടുണ്ട്.
“നിയമവിരുദ്ധം” എന്ന പേരിൽ ചിലർ ഓൺലൈൻ ടാക്സികളുടെ പ്രവർത്തനം തടസ്സപ്പെടുത്തുകയും, കയ്യേറ്റം, ഭീഷണി, കയ്യാങ്കളി എന്നിവയും നടക്കുകയാണ്.
സത്യത്തിൽ നിയമം എന്താണ്?
കേന്ദ്ര സർക്കാരിന്റെ റോഡ് ട്രാൻസ്പോർട് ആൻഡ് ഹൈവേയ്സ് മന്ത്രാലയം (MoRTH) 2020-ൽ ഓൺലൈൻ ടാക്സികളുടെ രജിസ്ട്രേഷനും സുതാര്യതയും ഉറപ്പുവരുത്തുന്നതിനായി മോട്ടോർ വാഹന അഗ്രിഗേറ്റർ മാർഗനിർദേശങ്ങൾ പുറത്തിറക്കി.
നവംബർ 27, 2020-ന് ഇത് സംസ്ഥാനങ്ങളിലേക്ക് കൈമാറിയെങ്കിലും, കേരളം ഉൾപ്പെടെ പല സംസ്ഥാനങ്ങളും നടപടികൾ വൈകിച്ചു.
കേരളം 2024 ഏപ്രിൽ 8-ന് ഈ മാർഗനിർദേശങ്ങൾ അടിസ്ഥാനമാക്കി സ്വന്തം സംസ്ഥാന മോട്ടോർ വാഹന അഗ്രിഗേറ്റർ നയം 2024 പ്രഖ്യാപിച്ചു.
അതിന്റെ അടിസ്ഥാനത്തിൽ രജിസ്ട്രേഷൻ നടപടികൾ ഇപ്പോൾ പുരോഗമിക്കുന്നു. എന്നാൽ, കേന്ദ്രം 2025 ജൂലൈ 1-ന് പുതുക്കിയ മാർഗനിർദേശങ്ങൾ ഇറക്കിയപ്പോൾ പോലും, കേരളം ഇപ്പോഴും 2020 മാർഗനിർദേശങ്ങളാണ് പിന്തുടരുന്നത്.
ആരാണ് തെറ്റുകാർ?
നിയന്ത്രണം ആരെയും ആകർഷിക്കുന്നില്ലെങ്കിലും നിയമം നിലവിലുണ്ട്.
അതിനാൽ ഓൺലൈൻ ടാക്സി ഓപ്പറേറ്റർമാർ ഉടൻ രജിസ്ട്രേഷൻ നടപടികളിലേക്ക് കടക്കേണ്ടതുണ്ട്. അതേ സമയം കേന്ദ്രവും സംസ്ഥാനവും തമ്മിലുള്ള നയപരമായ കാലതാമസം “സിസ്റ്റം” തന്നെയാണ് ഈ സംഘർഷത്തിന്റെ വില്ലൻ.
കോടതികൾ പോലും ഓൺലൈൻ ടാക്സികൾക്ക് അക്രമത്തിൽ നിന്ന് സംരക്ഷണം നൽകാനുള്ള നിർദ്ദേശങ്ങൾ നൽകിയിട്ടുണ്ട്. അതിനാൽ നിയമം കയ്യിലെടുക്കുന്നത് യാതൊരു തരത്തിലും ന്യായീകരിക്കാനാകില്ല.
മോട്ടോർ വാഹന അഗ്രിഗേറ്റർ മാർഗനിർദേശങ്ങളുടെ പ്രധാന പകർപ്പ്:
അഗ്രിഗേറ്റർ ലൈസൻസിനായി കമ്പനി ആക്ട് പ്രകാരമുള്ള സ്ഥാപനങ്ങൾക്കും, എൽ.എൽ.പി, ഡ്രൈവർമാരുടെ അസോസിയേഷനുകൾക്കും, സഹകരണ സംഘങ്ങൾക്കും അപേക്ഷിക്കാം.
5 ലക്ഷം രൂപ ലൈസൻസിനും 5 ലക്ഷം രൂപ സെക്യൂരിറ്റി ഡെപ്പോസിറ്റിനും അടക്കണം (10,000-ൽ കൂടുതൽ വാഹനങ്ങൾ ഉള്ളപ്പോൾ).
കഴിഞ്ഞ 3 വർഷത്തിനുള്ളിൽ ക്രിമിനൽ കേസുകൾ ഇല്ലാത്ത ഡ്രൈവർമാർ മാത്രമേ ഉൾപ്പെടുത്താവൂ.
ഡ്രൈവർമാർ നിശ്ചിത പരിശീലനം നേടണം; എല്ലാ വർഷവും റിഫ്രഷർ ട്രെയിനിങ്ങ് നിർബന്ധം.
ആപ്പിൽ മലയാളം ഉൾപ്പെടെ സേവനം ലഭ്യമാക്കണം.
യാത്രക്കാരന് ലൈവ് ലൊക്കേഷൻ ഷെയർ ചെയ്യാനുള്ള സൗകര്യം ഉണ്ടാകണം.
24×7 കൺട്രോൾ റൂമും കോൾ സെന്ററും സജ്ജമാക്കണം.
ഗവൺമെന്റ് നിശ്ചയിക്കുന്ന നിരക്കുകൾ പാലിക്കണം.
ഓരോ യാത്രയിലും ഡ്രൈവർക്ക് കുറഞ്ഞത് 80% കൂലി ലഭിക്കണം.
യാത്രാനന്തരം ഡിജിറ്റൽ രസീത് നൽകണം.
അനാവശ്യ റദ്ദാക്കലുകൾക്ക് പിഴ സംവിധാനം ഏർപ്പെടുത്തണം.
ഭാവി:
നിയമാനുസൃതമായി പ്രവർത്തിക്കുന്ന ഓൺലൈൻ ടാക്സികളും ഓട്ടോറിക്ഷകളും കൂടുതൽ യാത്രക്കാരെ ആകർഷിക്കുമെന്നത് ഉറപ്പ്.
അതേ സമയം പരമ്പരാഗത ഓട്ടോ-ടാക്സി തൊഴിലാളികൾക്കും വെല്ലുവിളികൾ നേരിടേണ്ടി വരും.
അവർ മീറ്റർ പ്രകാരവും മാന്യമായ സേവനത്തോടെയും പ്രവർത്തിച്ചാൽ മത്സരം എളുപ്പത്തിൽ നേരിടാനാവും.
English Summary:
The recent statement declaring online taxis like Uber and Ola “illegal” has led to violent clashes between traditional taxi-auto drivers and online platform drivers across Kerala. However, the legal position is clear: the Motor Vehicle Aggregator Guidelines, 2020, issued by the Ministry of Road Transport and Highways, regulate online taxi services. Kerala implemented its State Motor Vehicle Aggregator Policy 2024, aligning with the 2020 central guidelines, though the Centre has already updated them in July 2025.
online-taxi-legal-status-kerala-policy-2024
ഓൺലൈൻ ടാക്സി, ഓല, ഊബർ, മോട്ടോർ വാഹന അഗ്രിഗേറ്റർ, കേരള സർക്കാർ, ഗതാഗത നയം, ഓട്ടോ ടാക്സി തൊഴിലാളികൾ, റോഡ് ട്രാൻസ്പോർട്, നിയമം, ട്രാൻസ്പോർട് പോളിസി
