കൊച്ചി: മലയാളിക്ക് മദ്യപിക്കാൻ പ്രത്യേകിച്ച് കാരണമൊന്നും വേണ്ട. സന്തോഷം വന്നാലും കുടിക്കും സങ്കടം വന്നാലും കുടിക്കും. ഇനി പ്രത്യേകിച്ച് കാരണം ഒന്നുമില്ലെങ്കിൽ, വെറുതെ ഇരുന്ന് ബോറടിക്കുന്നു എന്ന് പറഞ്ഞ് ബാറിലേക്ക് പോകും. മദ്യം വാങ്ങാനുള്ള തിരക്കും ക്യൂവും വളരെ പ്രശസ്തമാണ്. ഏത് ആഘോഷം വന്നാലും മദ്യത്തിന്റെ വില്പ്പനയില് റെക്കോഡ് സൃഷ്ടിക്കുന്നത് മലയാളിയുടെ പതിവ് ശൈലിയാണ്. ഓണം, ക്രിസ്മസ്, പുതുവത്സര ആഘോഷങ്ങള്ക്ക് ശേഷമുള്ള കണക്കുകളും പുറത്ത് വരാറുണ്ട്.
കേരളത്തില് മദ്യം വാങ്ങാനുള്ള നീണ്ട നിര റോഡുകളിലേക്ക് എത്തുന്നതിലെ ബുദ്ധിമുട്ടുകളില് കോടതി പോലും ഇടപെട്ടിട്ടുണ്ട്.വര്ഷങ്ങള് നീണ്ട കാത്തിരുപ്പിന് ഒടുവിലാണ് ഉപഭോക്താക്കള്ക്ക് മാര്ജിന് ഫ്രീ മാര്ക്കറ്റ് സംവിധാനത്തില് മദ്യം വാങ്ങാനുള്ള പ്രീമിയം കൗണ്ടറുകള് നിലവില് വന്നത്. നിശ്ചിത വിലയ്ക്ക് മുകളിലുള്ള മദ്യമാണ് പ്രീമിയം കൗണ്ടറുകളില് ലഭിക്കുന്നത്.
വിദേശ രാജ്യങ്ങളുടെ മാതൃകയില് പുത്തന് സംവിധാനത്തില് മദ്യവില്പ്പന സാദ്ധ്യമാക്കിയിരിക്കുകയാണ് കൊച്ചി അന്താരാഷ്ട്ര വിമാനത്താവളത്തില്. ഡ്യൂട്ടി ഫ്രീ ഷോപ്പിന്റെ മൊബൈല് സ്റ്റോര് സംവിധാനത്തില് മദ്യം അടക്കമുള്ള സാധനങ്ങള് വാഹനത്തില് കയറ്റി ആവശ്യക്കാരുടെ അടുത്തേക്ക് എത്തിക്കും.വിമാനത്താവളത്തിലെ ഷോപ്പുകളില് തിരക്ക് കൂടുതലായി അനുഭവപ്പെടുന്ന സമയങ്ങളില് ക്യൂ നില്ക്കാതെ ആവശ്യമുള്ള മദ്യം ഈ വാഹനത്തില് നിന്ന് വാങ്ങാന് കഴിയുമെന്നതാണ് പ്രത്യേകത.
