ന്യൂയോർക്ക്: ട്വന്റി 20 ലോകകപ്പിൽ ഇന്ത്യയ്ക്ക് വിജയത്തുടക്കം. ആദ്യ മത്സരത്തിൽ അയർലൻഡിനെ എട്ട് വിക്കറ്റിനാണ് രോഹിത് ശർമ്മയും സംഘവും തകർത്തെറിഞ്ഞത്.
മത്സരത്തിൽ ആദ്യം ബാറ്റ് ചെയ്ത അയർലൻഡ് വെറും 96 റൺസിന് പുറത്തായി. മറുപടി ബാറ്റിംഗിൽ ക്യാപ്റ്റൻ രോഹിത് ശർമ്മ മുന്നിൽ നിന്ന് നയിച്ചപ്പോൾ 12.2 ഓവറിൽ ഇന്ത്യ വിജയത്തിലെത്തി.
അർദ്ധ സെഞ്ച്വറി നേടിയ രോഹിത് ശർമ്മ പരിക്കേറ്റ് കളം വിട്ടത് ഇന്ത്യക്ക് ആശങ്കയായി. താരത്തിന് തോളിന് പരിക്കേറ്റെന്നാണ് സൂചന.
37 പന്തിൽ മൂന്ന് സിക്സും നാല് ഫോറും സഹിതം 52 റൺസാണ് ക്യപ്റ്റൻ നേടിയത്. സഹ ഓപ്പണറായി ക്രീസിലെത്തിയ കോലിയാണ്(1) ആദ്യം വീണത്.
തുടർന്ന് ക്രീസിലെത്തിയ പന്ത് കരുതലോടെ ഇന്നിംഗ്സ് മുന്നോട്ട് നയിച്ചു. പന്തും രോഹിത് ശർമ്മയും ചേർന്ന് 54 റൺസിന്റെ കൂട്ടുക്കെട്ടാണ് പടുത്തുയർത്തിയത്.
രോഹിത് റിട്ട.ഹർട്ടായി മടങ്ങിയതിന് പിന്നാലെയെത്തിയ സൂര്യകുമാർ യാദവ് 4 പന്തിൽ രണ്ടു റൺസുമായി ഉടൻ മടങ്ങി.
ശിവം ദുബെയ്ക്കൊപ്പം ചേർന്ന് പന്ത് ഇന്ത്യയെ വിജയവര കടത്തുകയായിരുന്നു. 26 പന്തിൽ 36 റൺസാണ് പന്തിന്റെ സമ്പാദ്യം. മാർക് അഡയർ, ബെൻ വൈറ്റ് എന്നിവർക്ക് ഓരോ വിക്കറ്റ് വീതം ലഭിച്ചു
