ആയത്തുല്ല അലി ഖമനയി കൊല്ലപ്പെട്ടു!

ആയത്തുല്ല അലി ഖമനയി കൊല്ലപ്പെട്ടു!
ജറുസലം:
ഇസ്രായേലും അമേരിക്കയും ചേർന്ന് ഇറാനിൽ നടത്തിയ സംയുക്ത ആക്രമണത്തിൽ, ഇറാന്റെ പരമോന്നത നേതാവായ ആയത്തുല്ല അലി ഖമനയി കൊല്ലപ്പെട്ടെന്ന സൂചനകളുണ്ടെന്ന് ഇസ്രായേൽ പ്രധാനമന്ത്രി ബെന്യാമിൻ നെതന്യാഹു പറഞ്ഞു.

ഖമനയി “ഇനിയില്ല” എന്ന് സൂചിപ്പിക്കുന്ന നിരവധി വിവരങ്ങൾ ലഭിച്ചിട്ടുണ്ടെന്നും, എന്നാൽ മരണം ഔദ്യോഗികമായി സ്ഥിരീകരിക്കുന്നില്ലെന്നും നെതന്യാഹു വ്യക്തമാക്കി.

ഖമനയിയുടെ താമസസ്ഥലവും, ഇസ്‌ലാമിക് റെവല്യൂഷണറി ഗാർഡ് കോർപ്സ്യിലെ കമാൻഡർമാരും മുതിർന്ന ആണവ ഉദ്യോഗസ്ഥരും ആക്രമണത്തിൽ കൊല്ലപ്പെട്ടതായും അദ്ദേഹം അവകാശപ്പെട്ടു.

‘തെരുവിലിറങ്ങി ജോലി പൂർത്തിയാക്കണം’ എന്ന് ആവശ്യപ്പെട്ട് ഇറാൻ ജനതയോടും നെതന്യാഹു ആഹ്വാനം നടത്തി. ഖമനയിയുടെ മകളും മരുമകനും ചെറുമകനും കൊല്ലപ്പെട്ടതായി റിപ്പോർട്ടുകളുണ്ടെന്നും അദ്ദേഹം പറഞ്ഞു.

അതേസമയം, നെതന്യാഹുവിന്റെ അവകാശവാദങ്ങൾ ഇസ്രായേൽ ഭരണകൂടത്തിന്റെ ശ്രമമെന്ന് ആരോപിച്ച് ഇറാൻ മാധ്യമങ്ങൾ ശക്തമായി നിഷേധവുമായി രംഗത്തെത്തി.

ഇറാൻ ഭരണകൂടത്തെ അട്ടിമറിക്കാനുള്ള നീക്കമാണിതെന്നും, തിരിച്ചടികൾക്ക് ഖമനയി തന്നെ നേതൃത്വം നൽകുന്നുണ്ടെന്നും മാധ്യമങ്ങൾ വ്യക്തമാക്കി.

ഖമനയി രാജ്യത്തെ അഭിസംബോധന ചെയ്യുമെന്ന് അൽ-ആലം ടെലിവിഷൻ നേരത്തെ അറിയിച്ചിരുന്നെങ്കിലും ശനിയാഴ്ച വൈകിയും പ്രസംഗം സംപ്രേഷണം ചെയ്തിരുന്നില്ല.

ഇതിനിടെ, ഇറാൻ പ്രതിരോധമന്ത്രി അമീർ നാസിർസാദെ കൊല്ലപ്പെട്ടതായി ഇസ്രായേൽ സൈന്യമായ ഇസ്രായേൽ ഡിഫൻസ് ഫോഴ്സ് അറിയിച്ചു.

റെവല്യൂഷണറി ഗാർഡിലെ ഒരു കമാൻഡറും കൊല്ലപ്പെട്ടതായി സൈന്യം വ്യക്തമാക്കി. എന്നാൽ ഖമനയിയെക്കുറിച്ച് ഔദ്യോഗിക വാർത്താസമ്മേളനത്തിൽ പരാമർശമുണ്ടായില്ല.

അതേസമയം, ഗൾഫ് മേഖലയിൽ ഇറാൻ ആക്രമണം ശക്തമാക്കി. ഒമാൻ ഒഴികെയുള്ള അഞ്ച് ഗൾഫ് രാജ്യങ്ങളിലേക്കാണ് മിസൈൽ ആക്രമണമുണ്ടായത്.

അബുദാബി, ദുബായ് വിമാനത്താവളങ്ങൾ ലക്ഷ്യമിട്ട് ആക്രമണം നടന്നു. ദുബായ് അന്താരാഷ്ട്ര വിമാനത്താവളം നേരെ നടന്ന ഡ്രോൺ ആക്രമണത്തിൽ 14 ഡ്രോണുകൾ പതിക്കുകയും നാല് പേർക്ക് പരുക്കേൽക്കുകയും ചെയ്തു.

ഇറാന്റെ ഡ്രോൺ ആക്രമണത്തിൽ ദുബായിയുടെ അഭിമാന സ്തംഭമായ ബുർജ് അൽ അറബ് കെട്ടിടത്തിൽ തീപിടിത്തമുണ്ടായതായും റിപ്പോർട്ടുണ്ട്.
ഇറാനിലെ ആക്രമണങ്ങളിൽ ഇതുവരെ 201 പേർ കൊല്ലപ്പെടുകയും 747 പേർക്ക് പരുക്കേൽക്കുകയും ചെയ്തതായും റിപ്പോർട്ടുകൾ പറയുന്നു.

English Summary
Israeli Prime Minister Benjamin Netanyahu claimed there are strong indications that Iran’s Supreme Leader Ayatollah Ali Khamenei was killed in joint Israeli-US strikes, though he stopped short of confirming it officially. Iran rejected the claim and accused Israel of attempting regime change. Meanwhile, Iran intensified missile and drone attacks across the Gulf region, including strikes near Dubai and Abu Dhabi, causing casualties and damage.

netanyahu-claims-khamenei-killed-iran-denies-gulf-drone-attacks-dubai

ആയത്തുല്ല അലി ഖമനയി, ബെന്യാമിൻ നെതന്യാഹു, ഇറാൻ, ഇസ്രായേൽ, അമേരിക്ക, ഗൾഫ് മേഖല, ദുബായ് വിമാനത്താവളം, ബുർജ് അൽ അറബ്, ഐഡിഎഫ്, അന്താരാഷ്ട്ര വാർത്ത