കൊല്ലം: കരുനാഗപ്പള്ളി സ്വദേശിനിയുടെ പത്ത് ലക്ഷത്തിലധികം രൂപ സൈബര് തട്ടിപ്പിലൂടെ കവര്ന്ന സംഘത്തിലെ പ്രധാനി പിടിയിൽ. ജാര്ഖണ്ഡ് കര്മ്മതാര് സ്വദേശിയായ അക്തര് അന്സാരിയെയാണ് കരുനാഗപ്പള്ളി പൊലീസ് ജാര്ഖണ്ഡിൽ എത്തി അറസ്റ്റ് ചെയ്തത്. 13 ദിവസം നീണ്ട തിരച്ചിലിലൂടെയാണ് പ്രതിയെ കണ്ടെത്തിയതെന്നും മറ്റ് പ്രതികൾക്കായും അന്വേഷണം ഊർജിതമാക്കിയതായും പോലീസ് പറഞ്ഞു.
ഓണ്ലൈന് പേയ്മെന്റ് നടത്താന് കഴിയാതെ വന്നപ്പോള് ഗൂഗിളില് തിരഞ്ഞ് കണ്ടെത്തിയ കസ്റ്റമര് കെയര് നമ്പറില് കരുനാഗപ്പള്ളി മാരാരിതോട്ടം സ്വദേശിനി ബന്ധപ്പെടുകയായിരുന്നു. സൈബർ തട്ടിപ്പ് സംഘം നല്കിയിരുന്ന വ്യാജ നമ്പറിലാണ് ഇയാൾ ബന്ധപ്പെട്ടത്. സഹായിക്കാമെന്ന വ്യാജേന നിര്ദ്ദേശങ്ങള് നൽകിയ ശേഷം 10 ലക്ഷത്തിൽ അധികം രൂപ സംഘം കൈക്കലാക്കി. കരുനാഗപ്പള്ളി പൊലീസിന് ലഭിച്ച പരാതിയുടെ അടിസ്ഥാനത്തിൽ അന്വേഷണം ജാർഖണ്ഡിലേക്ക് എത്തി.
13 ദിവസം പൊലീസ് ജാർഖണ്ഡിലെ പലയിടങ്ങളിൽ തിരച്ചിൽ നടത്തിയ ശേഷം ഒടുവിൽ ജാമ്താരാ ജില്ലയിലെ കര്മ്മതാര് ഗ്രാമത്തിൽ നിന്നും തട്ടിപ്പ് സംഘത്തിലെ പ്രധാനിയായ അക്തര് അന്സാരിയെ പിടികൂടുകയായിരുന്നു. പ്രതിയെ കേരളത്തിൽ എത്തിച്ച് അറസ്റ്റ് രേഖപ്പെടുത്തി. 15 പേരടങ്ങുന്ന സംഘമാണ് തട്ടിപ്പുകള് നടത്തുന്നതെന്നും അന്വേഷണ സംഘം കണ്ടെത്തി. തട്ടിപ്പ് സംഘത്തിന് വെബ്സൈറ്റ് നിർമ്മിച്ചു നല്കിയ റാഞ്ചി സ്വദേശിയായ ആശിഷ് കുമാര്, സംഘത്തലവൻ ഹര്ഷാദ്, വ്യാജ സിമ്മുകള്, വ്യാജ ഐഡി കാര്ഡുകള് എന്നിവ നിര്മ്മിച്ചു നല്കുന്ന ബംഗാള് സ്വദേശി ബബ്ലു എന്നിവരെ കുറിച്ചും കൃത്യമായ വിവരങ്ങൾ ലഭിച്ചിട്ടുണ്ട്.
ഇതുകൂടാതെ ജാര്ഖണ്ഡിന് പുറത്ത് എ.ടി.എമ്മില് നിന്ന് പണം പിന്വലിക്കാന് തട്ടിപ്പ് സംഘത്തെ സഹായിക്കുന്ന സല്മാനെയും ഇയാളുടെ സഹായികളെയും തിരിച്ചറിഞ്ഞതായാണ് വിവരം. തട്ടിപ്പിലൂടെ ലഭിക്കുന്ന പണം കൃത്യമായി വീതിച്ച് എടുക്കുന്നതാണ് പ്രതികളുടെ രീതി. പണം ബാങ്ക് അക്കൗണ്ടുകളില് നിക്ഷേപിച്ചാല് അന്വേഷണ ഏജന്സികള് കണ്ടുപിടിക്കാൻ സാധ്യതയുള്ളതിനാൽ ഗ്രാമീണരുടെ പേരില് എന്.എസ്.ഡി.എല് അക്കൗണ്ട് തുടങ്ങിയാണ് കൈമാറ്റം ചെയ്തിരുന്നത്.
