തുണിത്തൊട്ടിൽ കണ്ടപ്പോൾ മനസലിഞ്ഞു; തെരുവിലെ കുഞ്ഞിന് പുതിയ തൊട്ടിൽ സമ്മാനിച്ച് പൊലീസ് ഉദ്യോഗസ്ഥൻ
സോഷ്യൽ മീഡിയയിൽ സ്ക്രോൾ ചെയ്യുമ്പോൾ ചിരിപ്പിക്കുന്നതും കണ്ണുനനയിക്കുന്നതുമായ അനവധി വിഡിയോകൾ നാം കാണാറുണ്ട്.
ഭാഷയും ദേശവും അതിജീവിച്ച് ഹൃദയത്തിലേക്ക് എത്തുന്ന ചില ദൃശ്യങ്ങൾ സോഷ്യൽ മീഡിയയെ മുഴുവൻ ഒരുപോലെ സ്പർശിക്കാറുമുണ്ട്.
ഇപ്പോൾ അത്തരത്തിൽ സമൂഹമാധ്യമങ്ങളുടെ മനസ്സ് കീഴടക്കുകയാണ് മുംബൈയിൽ നിന്നുള്ള ഒരു ഹൃദയസ്പർശിയായ വിഡിയോ.
മുംബൈയിലെ പൊലീസ് ഉദ്യോഗസ്ഥനായ സുശീൽ ശിഖരെ പങ്കുവച്ച ഈ വിഡിയോയിൽ, തെരുവിൽ കഴിയുന്ന ഒരു അമ്മയ്ക്കും അവളുടെ കുഞ്ഞിനും അദ്ദേഹം ഒരു പുതിയ തൊട്ടിൽ സമ്മാനമായി നൽകുന്നതാണ് കാണുന്നത്.
ഇതിനോടകം തന്നെ പത്ത് മില്യണിലധികം ആളുകൾ ഈ വിഡിയോ കണ്ടുകഴിഞ്ഞു.
വിഡിയോയുടെ തുടക്കത്തിൽ, കുഞ്ഞിനെ കിടത്താൻ അമ്മ ഒരു തുണിത്തൊട്ടിൽ താൽക്കാലികമായി ഒരുക്കിയിരിക്കുന്നതാണ് കാണുന്നത്.
അത് കണ്ട ഉദ്യോഗസ്ഥൻ ആ തുണിത്തൊട്ടിൽ മാറ്റി, സമീപത്തുനിന്ന് തന്നെ ഒരു പുതിയ ഉറപ്പുള്ള തൊട്ടിൽ വാങ്ങി നൽകുകയാണ്.
പൊലീസുകാരന്റെ അപ്രതീക്ഷിത സ്നേഹപ്രവർത്തിയിൽ അമ്മ വികാരാധീനയാകുന്ന ദൃശ്യങ്ങൾ ഏറെ ഹൃദയസ്പർശിയാണ്.
മറാത്തിയിൽ എഴുതിയ അടിക്കുറിപ്പിൽ, ഡ്യൂട്ടി കഴിഞ്ഞ് വീട്ടിലേക്ക് മടങ്ങുന്നതിനിടെയാണ് വഴിയരികിലുണ്ടായിരുന്ന അമ്മയെയും കുഞ്ഞിനെയും ശ്രദ്ധിച്ചതെന്ന് സുശീൽ ശിഖരെ പറയുന്നു.
മരത്തടിയിൽ കെട്ടിയ തുണിത്തൊട്ടിലിൽ കുഞ്ഞിനെ കിടത്തിയിരിക്കുന്ന ദൃശ്യം തന്നെ വല്ലാതെ അലട്ടിയതായും, കുഞ്ഞ് കരഞ്ഞപ്പോൾ അമ്മയുടെ നിസ്സഹായത തന്നെ പുതിയൊരു തൊട്ടിൽ വാങ്ങിക്കൊടുക്കാൻ പ്രേരിപ്പിച്ചതായും അദ്ദേഹം കുറിച്ചു.
ആദ്യഘട്ടത്തിൽ തുണിത്തൊട്ടിൽ മാറ്റുമ്പോൾ അമ്മ വേദനയോടെ നോക്കിനിൽക്കുന്നുണ്ടെങ്കിലും, പിന്നീട് പുതിയ തൊട്ടിലിൽ കുഞ്ഞിനെ കിടത്തുമ്പോൾ നന്ദിയോടെ നിറഞ്ഞ കണ്ണുകളോടെ അവർ ഉദ്യോഗസ്ഥനെ നോക്കുന്നതും വിഡിയോയിൽ കാണാം.
സാമൂഹ്യമാധ്യമങ്ങളിൽ നിരവധിപ്പേരാണ് ഈ പ്രവൃത്തിയെ പ്രശംസിച്ച് കമന്റുകളുമായി എത്തിയിരിക്കുന്നത്.
“ഒരു പൊലീസുകാരനേക്കാൾ മുമ്പ് അദ്ദേഹം നല്ലൊരു അച്ഛനാണ്” എന്നതാണ് ശ്രദ്ധേയമായ ഒരു കമന്റ്.
ഇത്തരത്തിലുള്ള മനുഷ്യർ ലോകത്ത് കൂടുതൽ വേണമെന്നുമാണ് പലരും അഭിപ്രായപ്പെടുന്നത്.
English Summary
A heartwarming video from Mumbai has taken social media by storm, garnering over 10 million views. The video features Mumbai police officer Sushil Shikhare gifting a new cradle to a homeless mother and her baby.
While returning home after duty, the officer noticed the baby sleeping in a makeshift cloth cradle tied to a tree. Moved by the mother’s helplessness when the baby cried, he decided to buy a proper cradle on the spot. The emotional reaction of the mother and the officer’s kind gesture have touched millions online, with users praising him not just as a policeman, but as a compassionate human being.
mumbai-police-officer-gifts-cradle-viral-video
Mumbai police, viral video, social media, humanity, kindness, homeless mother, police officer, heartwarming news
