കൊല്ലം ആയിരവല്ലി പാറയിലെത്തിയ കോളേജ് വിദ്യാർഥികളോട് അപമര്യാദയായി പെരുമാറുകയും സദാചാര ഗുണ്ടായിസം കാട്ടുകയും ചെയ്ത സംഭവത്തിൽ രണ്ടുപേർ അറസ്റ്റിലായി. സുഹൃത്തിന്റെ ജന്മദിനാഘോഷത്തിനായി എത്തിയ പെൺകുട്ടികൾ ഉൾപ്പെടെയുള്ള വിദ്യാർത്ഥികളോടാണ് ഇവർ അക്രമം കാട്ടിയത്.
ജന്മദിനം ആഘോഷിക്കാനായി പെൺകുട്ടികൾ ഉൾപ്പെടെ വിദ്യാർത്ഥി സംഘം ആയിരവല്ലിപ്പാറ സന്ദർശിക്കാൻ എത്തിയതായിരുന്നു. ഈ സമയത്ത് പ്രദേശത്ത് മദ്യപിച്ചുകൊണ്ടിരിക്കുകയായിരുന്നു പ്രതികൾ വിദ്യാർത്ഥികളെ കണ്ട് അസഭ്യം പറയുകയും മർദ്ദിക്കുകയും ആയിരുന്നു. കൂടെയുള്ള ആൺകുട്ടികളെ മരക്കമ്പ് ഉൾപ്പെടെ ഉപയോഗിച്ചാണ് ഇവർ മർദിച്ചത്. അക്രമം തുടർന്നതോടെ പെൺകുട്ടികൾ നിലവിളിച്ചു. ഇത് കേട്ട് നാട്ടുകാർ എത്തിയതോടെ പ്രതികൾ രക്ഷപ്പെടുകയായിരുന്നു. പോലീസ് നടത്തിയ അന്വേഷണത്തിൽ ആയുർ സ്വദേശികളായ അൻവർ സാദത്ത്, മഞ്ഞപ്പാറ ബൈജു എന്നിവർ പിടിയിലായി. ഇവർക്കെതിരെ സ്ത്രീത്വത്തെ അപമാനിച്ചതിന് ഉൾപ്പെടെ ജാമ്യമില്ലാ വകുപ്പ് പ്രകാരം കേസെടുത്തു. മീൻ കച്ചവടക്കാരാണ് പ്രതികൾ ഇവർ സഞ്ചരിച്ച വാഹനവും പിടിച്ചെടുത്തു. കോടതിയിൽ ഹാജരാക്കിയ പ്രതികളെ റിമാൻഡ് ചെയ്തു.
