ഇടുക്കി വണ്ടിപ്പെരിയാറിൽ ഓട്ടത്തിനിടെ ഓട്ടോറിക്ഷയിൽ റോഡിന് കുറുകെച്ചാടിയ മ്ലാവ് വന്നിടിച്ചു. തുടർന്ന് പുറത്തേക്ക് തെറിച്ചു വീണ ഡ്രൈവർക്കും യാത്രക്കാരിക്കും പരിക്ക്. മ്ലാവ് ഇടിച്ച് മറിഞ്ഞ ഓട്ടോഡ്രൈവർ എച്ച്.പി .സി. സ്വദേശി മാരി മുത്തു (42) മൂലക്കയം സ്വദേശി കലൈവാണി (30) എന്നിവർക്കാണ് പരിക്കേറ്റത്. ഇവരെ പരിക്കുകളോടെ വണ്ടിപ്പെരിയാർ സ്വകാര്യ ആശുപത്രിയിൽ പ്രവേശിപ്പിച്ചു. Mlav collided with an autorickshaw running on Vandiperiyar in Idukki
കഴിഞ്ഞ ദിവസം രാത്രി വണ്ടിപ്പെരിയാറിൽ നിന്നും കറുപ്പ് പാലം എച്ച്.പി.സി. മൂലക്കയത്തിലേക്ക് പോകുകയായിരുന്നു. ഓട്ടോറിക്ഷ കറുപ്പ് പാലത്തിന് സമീപം എത്തിയപ്പോൾ തേയിലക്കാട്ടിൽ നിന്നും മ്ലാവ് റോഡിന് കുറുകെ ചാടുകയും ഓട്ടോയിൽ ഇടിക്കുകയും ഇടിയുടെ ആഘാതത്തിൽ ഡ്രൈവർ വാഹനത്തിൽ നിന്ന് തെറിച്ച് വീഴുകയായിരുന്നു.
നിയന്ത്രണം വിട്ട ഓട്ടോറിക്ഷാ തലകീഴായി മറിയുകയും ചെയ്തു. ഇതിൽ ഓട്ടോറിക്ഷ ഡ്രൈവർ മാരി മുത്തുവിന്റെ തലയ്ക്കും കൈയ്ക്കും കാലിനും പരിക്കേറ്റു. യാത്രക്കാരിയായിരുന്ന കലൈവാണിക്ക് കൈക്കും വയറിനും ആണ് പരിക്കേറ്റത്. ഈ ഭാഗത്ത് മ്ലാവ് കുറുകെ ചാടി ഉണ്ടാകുന്ന നാലാമത്തെ അപകടമാണ് ഇത്. മുൻപ് മ്ലാവ് ഇടിച്ച് ബൈക്ക് യാത്രികന് പരിക്കേറ്റിരുന്നു.
