അത്ഭുതം ഈ വനിതാ ഡ്രൈവറിന്റെ രക്ഷപ്പെടൽ
സിംഗപ്പൂർ∙ റോഡിലൂടെ പോകുന്നതിനിടെ, റോഡ് തകർന്ന് വീണ് വലിയ ഗർത്തത്തിലേക്ക് വീണ വാഹനത്തിലുണ്ടായിരുന്ന വനിതാ ഡ്രൈവർക്ക് അദ്ഭുതരക്ഷപ്പെടൽ.
ശനിയാഴ്ച സിംഗപ്പൂരിലെ ടാൻജോങ് കാടോങ് റോഡിലൂടെ സഞ്ചരിക്കവേയാണ് പെട്ടെന്ന് റോഡ് തകർന്ന് വാഹനം വലിയ ഗർത്തത്തിലേക്ക് പതിച്ചത്.
തലകീഴായി വീണ കാറിൽ നിന്ന് വനിതാ ഡ്രൈവറെ സമീപത്തുണ്ടായിരുന്ന നിർമാണ തൊഴിലാളികൾ സുരക്ഷിതമായി പുറത്തെത്തിക്കുകയായിരുന്നു. നൈലോൺ കയർ ഉപയോഗിച്ചാണ് കാറിനുള്ളിൽ നിന്ന് വനിതയെ പുറത്തെത്തിച്ചത്.
തിരക്കേറിയ റോഡിലൂടെ സഞ്ചരിക്കവേ അപ്രതീക്ഷിതമായി റോഡിന്റെ ഒരു വശം തകർന്ന് വീഴുകയായിരുന്നു. ഇതേത്തുടർന്നാണ് അപകടവും നടന്നത്.
സമീപത്ത് ജോലി ചെയ്തു കൊണ്ടിരുന്ന നാല് നിർമാണ തൊഴിലാളികൾ ഉടനടി ഓടിയെത്തി രക്ഷാപ്രവർത്തനം നടത്തിയതാണ് വനിതാ ഡ്രൈവറുടെ ജീവൻ രക്ഷിച്ചത്.
കാറിനുള്ളിൽ ഡ്രൈവർ ആയ വനിത മാത്രമേ ഉണ്ടായിരുന്നുള്ളൂ. കുഴിയിൽ വെള്ളം നിറയുന്നതിന് മുൻപേ തന്നെ തൊഴിലാളികൾ ഡ്രൈവറെ രക്ഷപ്പെടുത്തുകയായിരുന്നു.
എമർജൻസി സർവീസ് സംഘം എത്തുന്നതിന് മുൻപേ തന്നെ വനിതാ ഡ്രൈവറെ തൊഴിലാളികൾ ചേർന്ന് രക്ഷപ്പെടുത്തുകയായിരുന്നു. വനിതയെ വിശദമായ പരിശോധനക്കായി ഉടൻ തന്നെ ആശുപത്രിയിൽ എത്തിക്കുകയും ചെയ്തു.
റോഡിൽ വലിയ കുഴിയുണ്ടാകാൻ കാരണമായത് സംബന്ധിച്ച് അന്വേഷണം നടത്തുമെന്ന് സിംഗപ്പൂർ ലാൻഡ് ട്രാൻസ്പോർട്ട് അതോറിറ്റി വ്യക്തമാക്കി. തൊഴിലാളികളുടെ പെട്ടെന്നുള്ള രക്ഷാപ്രവർത്തനത്തിനും ധൈര്യത്തിനും കയ്യടിച്ച് സൈബർ ലോകം.
Summary:
A woman driver had a miraculous escape after her vehicle fell into a large sinkhole caused by a sudden road collapse in Singapore. The incident occurred on Saturday while she was traveling along Tanjong Katong
