ഏറ്റുമാനൂർ ശ്രീമഹാദേവ ക്ഷേത്ര ഉത്സവത്തിന്റെ 8-ാം ദിനത്തോടനുബന്ധിച്ച് അയ്മ്പൊലി സമർപ്പണം 2025 മാർച്ച് 6 വ്യാഴാഴ്ച നടത്തപ്പെടുന്നു.
ശ്രീ മാരിയമ്മൻ കോവിൽ ട്രസ്റ്റിന്റെയും, അഖില കേരള വിശ്വകർമ്മ മഹാസഭ ഏറ്റുമാനൂർ മേഖലാ കമ്മറ്റിയുടെയും, തമിഴ് വിശ്വബ്രഹ്മ സമാജത്തിന്റെയും, കേരള വിശ്വകർമ്മ സഭ, വിശ്വകർമ്മ സർവ്വീസ് സൊസൈറ്റിയുടെയും സംയുക്താഭിമുഖ്യത്തിൽ ശ്രീ മാരിയമ്മൻ കോവിലിൽ നിന്നും വൈകുന്നേരം 6.00 ന്
താലപ്പൊലിയുടെയും വാദ്യമേളങ്ങളുടെയും വിവിധ കലാരൂപ ങ്ങളുടെയും അകമ്പടിയോടുകൂടി മഹാദേവസന്നിധിയിലെത്തിയാണ് അയ്മ്പൊലി സമർപ്പിക്കുന്നത്.
വൈകിട്ട് 6 മണിക്ക് ആരംഭിക്കുന്ന ഉദ്ഘാടന സമ്മേളനത്തിൽ സമർപ്പണ സമിതി രക്ഷാധികാരി ശ്രീ. പ്രമോദ് കുമാർ ഉദ്ഘാടനം നിർവ്വഹിക്കുന്നതും, ചെയർമാൻ ശ്രീ. മുരളി തകടിയേൽ അദ്ധ്യക്ഷത വഹിക്കുന്നതുമാണ്.
തമിഴ് വിശ്വബ്രഹ്മ സമാജം, അഖില കേരള വിശ്വകർമ്മ മഹാസഭ, കേരള വിശ്വകർമ്മ സഭ, വിശ്വകർമ്മ സർവ്വീസ് സൊസൈറ്റി നേതാക്കൾ നേതൃത്വം നൽകുന്ന അയ്മ്പൊലി സമർപ്പണം മാരിയമ്മൻ കോവിൽ ക്ഷേത്ര കോമരങ്ങളുടെ കാർമ്മികത്വത്തിൽ അയ്മ്പൊലി സമർപ്പണ സമിതി ഭാരവാഹികൾ ഭഗവാന് അയ്മ്പൊലി സമർപ്പിക്കും.
ചരിത്രത്തിലേക്ക്:
അയ്മ്പൊലി സവിശേഷത:
പ്രപഞ്ചസൃഷ്ടാവായ വിശ്വകർമ്മാവിന്റെ അവതാരമായ ശ്രീ മഹാദേവനെ വിശ്വബ്രഹ്മമായി ദർശ്ശിച്ച് അഞ്ച് ദിക്കുകളിലായി പ്രശോഭിക്കുന്ന ഭഗവാന്റെ പഞ്ചമുഖങ്ങളായ സദ്ദ്യോജാതം (കിഴക്ക് ദർശനം), വാമദേവം (തെക്ക് ദർശനം) ആഘോരം (പടിഞ്ഞാറ് ദർശനം), തത്പുരുഷം (വടക്ക് ദർശനം), ഈശാന്യം (വടക്ക് കിഴക്ക് ദർശനം) എന്നീ മുഖങ്ങളെ സ്മരിച്ചുകൊണ്ട് അഞ്ച് പറകളിലായി പഞ്ചദ്രവ്യങ്ങളായ നെല്ല്, അരി, അവിൽ, മലർ, ശർക്കര എന്നിവ അഞ്ച് പൊലിവുകളായി നിറച്ച് സമർപ്പിക്കുന്ന ചടങ്ങാണ് അയ്മ്പൊലി സമർപ്പണം.
കാലങ്ങളായി മാരിയമ്മൻ ദേവസ്ഥാനത്തുനിന്നും ഭഗവാന് ഈ ഉപചാരം സമർപ്പിച്ചുവരുന്നു. ദേശത്തിനെയും കുലത്തിനെയും ഗോത്രത്തേയും ഗ്രസിച്ചിരിക്കുന്ന സകല ദോഷങ്ങളും അതുമൂലം നിവാരണം ചെയ്യപ്പെടും എന്നാണ് വിശ്വാസം.
