കൊച്ചി: മാവോവാദി നേതാവ് സന്തോഷ് അറസ്റ്റിൽ. തമിഴ്നാട്ടിലെ ഹോസൂരിൽ നിന്നാണ് ഇയാളെ പിടികൂടിയത്. രവി, സന്തോഷ് കോയമ്പത്തൂർ, രാജ എന്നീ പേരുകളിലാണ് ഇയാൾ അറിയപ്പെട്ടിരുന്നത്.
തമിഴ്നാട് ക്യൂബ്രാഞ്ചിന്റെ സഹായത്തോടെയും നൂതന സാങ്കേതിക വിദ്യകളുടെ സഹായത്തോടെ കേരള ആന്റി ടെററിസ്റ്റ് സ്ക്വാഡ് ആണ് ഇയാളെ പിടികൂടിയതെന്ന് പോലീസ് അറിയിച്ചു. 2013 മുതൽ മാവോവാദി സാന്നിധ്യം ഉണ്ടായിരുന്ന കേരളം, തമിഴ്നാട്, കർണാടക സംസ്ഥാനങ്ങളുടെ അതിര്ത്തി മേഖലയിലെ മാവോവാദി പ്രവർത്തനങ്ങളിൽ പ്രധാന കണ്ണിയായിരുന്നു സന്തോഷ്.
2013 മുതൽ ഈ പ്രദേശങ്ങളിൽ നടന്ന സായുധവിപ്ലവ പ്രവർത്തനങ്ങളിലും ഇയാൾ സജീവമായിരുന്നു. നാടുകാണി, കബനി സ്ക്വാഡുകളിൽ പ്രവർത്തിച്ച സന്തോഷ്, കേരളത്തിലെ വിവിധ പൊലീസ് സ്റ്റേഷനുകളിൽ രജിസ്റ്റർ ചെയ്ത 45-ഓളം യു.എ.പിഎ കേസുകളിൽ പ്രതിയാണ് ഇയാൾ.
