ഓൺലൈൻ തട്ടിപ്പിലൂടെ ലക്ഷക്കണക്കിന് രൂപ തട്ടിയെടുത്ത യുവാവ് അറസ്റ്റിൽ. അബ്ദുൽ റോഷൻ എന്ന തട്ടിപ്പു വീരനാണ് അറസ്റ്റിലായത്. കർണാടകയിലെ മടിക്കേരിയിൽ വച്ചാണ് പോലീസ് ഇയാളെ അറസ്റ്റ് ചെയ്തത്. ഇയാളുടെ പക്കൽ നിന്നും 40000 സിം കാർഡുകൾ, 150ലേറെ മൊബൈൽ ഫോണുകൾ, മറ്റു ഉപകരണങ്ങൾ എന്നിവ പിടിച്ചെടുത്തിട്ടുണ്ട്. മൊബൈൽ കമ്പനിയുടെ വിതരണക്കാരനായ പ്രതി ഓൺലൈൻ തട്ടിപ്പ് നടത്തുന്ന സംഘത്തിന് സിംകാർഡുകൾ വിതരണം ചെയ്യുകയായിരുന്നു.
ഒരു സിമ്മിന് 50 രൂപ വീതമാണ് ഇയാൾ വാങ്ങുന്നത്. ഈ സിം കാർഡുകൾ ഫോണിൽ ഇട്ടാൽ ഐഎംഇ ഐ നമ്പറുകൾ വരെ മാറ്റാൻ കഴിയുന്ന തരത്തിലുള്ള ചൈനീസ് ഫോണുകളും ഇയാളുടെ പക്കൽ നിന്നും പിടിച്ചെടുത്തിട്ടുണ്ട്. പിടിച്ചെടുത്ത സിം കാർഡുകളിൽ നിലവിൽ 1500 എണ്ണം ആക്റ്റീവ് ആണ്. ആക്ടീവാക്കാനുള്ള 2000 സിം കാർഡുകളും ഇയാളിൽ നിന്നും പിടിച്ചെടുത്തു.
