ഓടുന്ന ബസിൽ ചാടി കയറി അസഭ്യവർഷവും തെറി വിളിയുമായി മൈത്രി ബസ് ജീവനക്കാരൻ;ചീത്തവിളി രൂക്ഷമായതോടെ ബസ് നിർത്തി തിരിച്ചടിച്ച് സെൻ്റ് തോമസ് ബസിൻ്റെ ഡ്രൈവർ;കേസെടുത്ത് പെരുമ്പാവൂർ പോലീസ്

പെരുമ്പാവൂർ: ബസ് ഗതാഗത കുരുക്കിൽപ്പെട്ടതിനെ തുടർന്നുള്ള തർക്കം കയ്യാംകളിയിൽ കലാശിച്ചു.പെരുമ്പാവൂരിലാണ് സംഭവം. രണ്ട് ബസുകളിലെ ജീവനക്കാരാണ് തമ്മിലടിച്ചത്. സെന്റ് തോമസ് ബസിലെ ഡ്രൈവർ എൽദോ എന്നയാൾക്കാണ് മർദ്ദനമേറ്റത്. ‘മൈത്രി’ ബസിലെ ജീവനക്കാരനായ അനീഷാണ് എൽദോയെ മർദ്ദിച്ചത്. ഇന്നലെ രാവിലെ കാലടിയിലെ ഗതാഗതക്കുരുക്കുമായി ബന്ധപ്പെട്ട് സമയക്രമത്തെച്ചൊല്ലി തർക്കം ആരംഭിച്ചിരുന്നു. ഈ തർക്കമാണ് വൈകുന്നേരത്തോടെ കയ്യാങ്കളിയിൽ അവസാനിച്ചത്.സെന്റ് തോമസ് ബസിൽ കയറിയ അനീഷ് യാത്രയ്‌ക്കിടെ ഡ്രൈവർ എൽദോയെ അസഭ്യം പറയുന്നതും മർദ്ദിക്കാൻ ശ്രമിക്കുന്നതും ദൃശ്യങ്ങളിൽ കാണാം. ചീത്തവിളി രൂക്ഷമായതോടെ ഡ്രൈവർ ബസ് നിർത്തി തിരിച്ചടിക്കുന്നതും ദൃശ്യങ്ങളിലുണ്ട്. സംഭവവുമായി ബന്ധപ്പെട്ട് പൊലീസ് കേസ് റജിസ്റ്റർ ചെയ്തിട്ടുണ്ട് ബസിലെ ഡാഷ് ക്യാമറയിൽ പതിഞ്ഞ മർദ്ദന ദൃശ്യങ്ങൾ പുറത്തുവന്നു.