ഇലക്ട്രിക് വാഹന വിപണി ലക്ഷ്യമാക്കി മഹീന്ദ്ര ആൻഡ് മഹീന്ദ്ര ഈ വർഷം രണ്ട് പുതിയ മോഡലുകളായ XUV 3XO EV, XUV 7e എന്നിവയുമായാണ് രംഗത്തെത്തിയിരിക്കുന്നത്. ടാറ്റ നെക്സോൺ ഇവിയെ വെല്ലുവിളിക്കാൻ മഹീന്ദ്ര XUV 3XO ഇവി റോഡുകളിൽ എത്തുമ്പോൾ, XUV700 ന്റെ ഇലക്ട്രിക് പതിപ്പായ മഹീന്ദ്ര XUV 7e ഈ വർഷാവസാനത്തോടെ പുറത്തിറക്കും എന്നാണ് പുറത്തുവരുന്ന വിവരങ്ങൾ.
ഇലക്ട്രിക് XUV 3XO യുടെ രൂപകൽപ്പനയും സ്റ്റൈലിംഗും അതിന്റെ നിലവിലെ ഐസിഇ മോഡലിന് സമാനമായിരിക്കും. എങ്കിലും, പുതുതായി രൂപകൽപ്പന ചെയ്ത ഗ്രിൽ ചെറുതായി പരിഷ്കരിച്ച എയർ ഡാം, മുൻവശത്ത് ഒരു ചാർജിംഗ് പോർട്ട് എന്നിവ ഇതിൽ ഉണ്ടാകുമെന്ന് പ്രതീക്ഷിക്കുന്നു.
എയറോ ഇൻസേർട്ടുകൾക്കൊപ്പം പുത്തൻ അലോയ് വീലുകളും കൂടി ചേരും. പിൻ പ്രൊഫൈലിലും ചില മാറ്റങ്ങൾ വരുത്താൻ സാധ്യതയുണ്ട്. ബൈ-എൽഇഡി പ്രൊജക്ടർ ഹെഡ്ലാമ്പുകൾ, ഫ്രണ്ട് ടേൺ ഇൻഡിക്കേറ്ററുകളുള്ള എൽഇഡി ഡിആർഎൽ, റിയർ എൽഇഡി ലൈറ്റ് ബാർ, വിംഗ് മിററുകളിലെ എൽഇഡി ഇൻഡിക്കേറ്ററുകൾ, എൽഇഡി ടെയിൽലാമ്പുകൾ തുടങ്ങിയ ഡിസൈൻ ഘടകങ്ങൾ നിലവിലെ ഐസിഇ XUV 3XO യിൽ നിന്ന് തുടരാനുംസാധ്യതയുണ്ട്.
പുതിയ മഹീന്ദ്ര ഇലക്ട്രിക് എസ്യുവിയുടെ പവർട്രെയിൻ വിശദാംശങ്ങൾ ഇപ്പോഴും വ്യക്തമല്ല. ഈ കോംപാക്റ്റ് ഇവി XUV400 ൽ നിന്ന് 34.5kWh, 39.4kWh ബാറ്ററി പായ്ക്കുകൾ കടമെടുത്തേക്കാൻ സാധ്യതയുണ്ട്. ചെറുതും വലുതുമായ ബാറ്ററികളുള്ള രണ്ടാമത്തേത് യഥാക്രമം 375 കിലോമീറ്ററും 456 കിലോമീറ്ററും അവകാശപ്പെടുന്ന റേഞ്ച് വാഗ്ദാനം ചെയ്യുന്നു.
മഹീന്ദ്ര XUV 3XO EV യുടെ ഇന്റീരിയറും സാധാരണ മോഡലിന്റെ അതേ ലേഔട്ടും സവിശേഷതകളും തന്നെയായിരിക്കും. ബ്ലൈൻഡ് വ്യൂ മോണിറ്ററുള്ള 360 ഡിഗ്രി ക്യാമറ, ലെവൽ 2 ADAS, ഓട്ടോ ഹോൾഡുള്ള ഇലക്ട്രോണിക് പാർക്കിംഗ് ബ്രേക്ക്, ഫ്രണ്ട് പാർക്കിംഗ് സെൻസറുകൾ, ലെതറെറ്റ് അപ്ഹോൾസ്റ്ററി, ഡാഷ്ബോർഡിലും ഡോർ ട്രിമ്മുകളിലും ലെതറെറ്റ്, ഹർമൻ കാർഡൺ സൗണ്ട് സിസ്റ്റം, പനോരമിക് സൺറൂഫ്, യുഎസ്ബി സി ഫാസ്റ്റ് ചാർജിംഗ് തുടങ്ങിയ സവിശേഷതകൾ എന്നിവയും ഉൾപ്പെടും.
