കഴിഞ്ഞ ദിവസം മലയാള സിനിമയിൽ പ്രഖ്യാപിച്ച ചലച്ചിത്ര കൂട്ടായ്മയിൽ നിലവിൽ ഭാഗമല്ലെന്ന് വെളിപ്പെടുത്തി രംഗത്തെത്തിയിരിക്കുകയാണ് ലിജോ ജോസ് പെല്ലിശ്ശേരി. സ്വതന്ത്ര കൂട്ടായ്മ എന്ന ആശയത്തോട് യോജിക്കുന്നുവെന്നും, സ്വാഗതം ചെയ്യുന്നുവെന്നും ഫേസ്ബുക്കിൽ പങ്കുവച്ച കുറിപ്പിൽ ലിജോ ജോസ് പറഞ്ഞു. അതേസമയം, നിലവിൽ പ്രചരിക്കുന്ന വാർത്തകൾ തന്റെ അറിവോടെ അല്ലെന്നും അദ്ദേഹം പറഞ്ഞു. lijo jose pellissery speaks about new film society
ലിജോ ജോസ് പെല്ലിശ്ശേരിയുടെ ഫേസ്ബുക്ക് പോസ്റ്റ്:
“മാധ്യമങ്ങളിൽ പ്രചരിക്കുന്ന ചലച്ചിത്ര കൂട്ടായ്മയിൽ ഞാൻ നിലവിൽ ഭാഗമല്ല. ക്രീയാത്മകമായ ചലച്ചിത്ര സംവിധായക നിർമാതാക്കളുടെ സ്വതന്ത്ര കൂട്ടായ്മ എന്ന ആശയത്തോട് യോജിക്കുന്നു അത്തരത്തിലൊന്നിനെ സ്വാഗതം ചെയ്യുന്നു.
അങ്ങിനെയൊരു കൂട്ടായ്മയുടെ ഭാഗമാവാൻ ഞാൻ ആഗ്രഹിക്കുന്ന പക്ഷം അതൊരു ഔദ്യോഗിക അറിയിപ്പായി എന്റെ ഭാഗത്തു നിന്നും ഉണ്ടാകും. അതുവരെ എന്റെ പേരിൽ പ്രചരിക്കുന്ന ഒന്നും എന്റെ അറിവോടെയല്ല,” ലിജോ ജോസ് പെല്ലിശ്ശേരി പറഞ്ഞു.
തിങ്കളാഴ്ചയാണ് മലയാളം സിനിമയിൽ പ്രോഗ്രസീവ് ഫിലിം മേക്കേഴ്സ് എന്ന പുതിയ സിനിമ സംഘടന വരുന്നുവെന്ന പ്രസ്ഥാവന പുറത്തിറങ്ങിയത്. സംവിധായകരായ ആഷിക്ക് അബു, ലിജോ ജോസ് പെല്ലിശ്ശേരി, രാജീവ് രവി, അഞ്ജലി മേനോൻ, നടി റീമ കല്ലിങ്കൽ തുടങ്ങിയവർ നേതൃനിരയിലുണ്ടെന്നും, സംഘടനയുടെ പ്രാഥമിക ചർച്ചകൾ ആരംഭിച്ചെന്നുമായിരുന്നു വിവരം.
