മിന്നലടിച്ച് ബുർജ് ഖലീഫ; കാരണം ‘അൽ ബഷായർ’
ദുബായ്∙ ലോകത്തിലെ ഏറ്റവും ഉയരം കൂടിയ കെട്ടിടമായ ബുർജ് ഖലീഫയിൽ മിന്നൽ പിണരുകൾ പതിക്കുന്ന അപൂർവ ദൃശ്യങ്ങൾ ദുബായ് കിരീടാവകാശി ഷെയ്ഖ് ഹംദാൻ ബിൻ മുഹമ്മദ് അൽ മക്തൂം സമൂഹമാധ്യമത്തിൽ പങ്കുവെച്ചു.
യുഎഇയിൽ ‘അൽ ബഷായർ’ ന്യൂനമർദ്ദം ശക്തമായതിനെ തുടർന്നുണ്ടായ കനത്ത മഴയ്ക്കിടെയാണ് വ്യാഴാഴ്ച ബുർജ് ഖലീഫയ്ക്ക് മുകളിൽ അതിശക്തമായ മിന്നൽ പതിച്ചത്.
നീലകലർന്ന ഇരുണ്ട ആകാശത്തിന് നടുവിൽ തലയുയർത്തി നിൽക്കുന്ന ബുർജ് ഖലീഫയുടെ മുകളിൽ മിന്നൽ പിണർ വീഴുന്ന ദൃശ്യങ്ങളാണ് ഷെയ്ഖ് ഹംദാൻ പങ്കുവെച്ചത്.
വരും ദിവസങ്ങളിൽ മഴ കൂടുതൽ ശക്തമാകുമെന്ന് മുന്നറിയിപ്പ് നൽകിക്കൊണ്ട് ബുധനാഴ്ചയും മേഘങ്ങളുടെ സഞ്ചാരപഥം വ്യക്തമാക്കുന്ന കാലാവസ്ഥാ ഭൂപടം അദ്ദേഹം പ്രസിദ്ധീകരിച്ചിരുന്നു.
ദേശീയ കാലാവസ്ഥാ നിരീക്ഷണ കേന്ദ്രം (NCM) അറിയിച്ചു പ്രകാരം, നിലവിൽ യുഎഇയിൽ സജീവമായിരിക്കുന്ന ‘അൽ ബഷായർ’ ന്യൂനമർദ്ദം ഇന്ന് പരമാവധി ശക്തിയിലേക്കെത്തും.
ഷാർജയിലും റാസൽഖൈമയിലും രാവിലെ മുതൽ കനത്ത മഴയും ആലിപ്പഴ വീഴ്ചയും റിപ്പോർട്ട് ചെയ്തിട്ടുണ്ട്. ഇതിന് പിന്നാലെ കൂടുതൽ ശക്തമായ രണ്ടാമത്തെ മഴമേഘങ്ങൾ വൈകിട്ടോടെ അബുദാബിയിലേക്കും ദുബായിലേക്കും നീങ്ങുമെന്നാണ് പ്രവചനം.
റെഡ് സീ മേഖലയിൽ നിന്നുള്ള ഉപരിതല ന്യൂനമർദ്ദത്തിന്റെ സ്വാധീനഫലമായി ഇടിമിന്നലോടും ശക്തമായ കാറ്റോടും കൂടിയ മഴ വരും ദിവസങ്ങളിലും തുടരാൻ സാധ്യതയുണ്ടെന്ന് അധികൃതർ മുന്നറിയിപ്പ് നൽകി.
English Summary
Dubai Crown Prince Sheikh Hamdan bin Mohammed Al Maktoum shared dramatic visuals of lightning striking the Burj Khalifa during heavy rainfall caused by the ‘Al Bashayer’ low-pressure system. According to the UAE’s National Centre of Meteorology, the system is reaching peak intensity, with heavy rain, hailstorms, and thunderstorms expected to continue across several emirates, including Dubai and Abu Dhabi.
Lightning Strikes Burj Khalifa
Dubai, Burj Khalifa, Lightning, Rain, UAE Weather, Al Bashayer, Sheikh Hamdan, Thunderstorm, NCM
