ബിനു പുളിക്കകണ്ടവും കുടുംബവും നേടിയ വിജയം; ജോസ് കെ മാണിയുടെ വാർഡിൽ പോലും തോറ്റു; കേരള കോൺഗ്രസ് എമ്മിന് ഇക്കുറി സന്തോഷിക്കാൻ വകയൊന്നുമില്ല
കോട്ടയം: കേരള കോൺഗ്രസ് (എം)നെ മുന്നിൽ നിർത്തി എൽഡിഎഫ് ആവിഷ്കരിച്ച തെരഞ്ഞെടുപ്പ് തന്ത്രങ്ങൾ ഇത്തവണത്തെ തദ്ദേശ സ്വയംഭരണ തെരഞ്ഞെടുപ്പിൽ ഫലം കണ്ടില്ല.
കോട്ടയം, ഇടുക്കി ജില്ലകളിൽ ഇടതുപക്ഷത്തിന് കരുത്തായി കണക്കാക്കിയിരുന്ന കേരള കോൺഗ്രസ് (എം) ശക്തമായ യുഡിഎഫ് തരംഗത്തിൽ കാലിടറുന്ന കാഴ്ചയാണ് കണ്ടത്.
കഴിഞ്ഞ തെരഞ്ഞെടുപ്പിലെ തിളക്കം നഷ്ടമായതോടെ പാർട്ടിക്ക് വലിയ അവകാശവാദങ്ങൾ ഉന്നയിക്കാനാകാത്ത അവസ്ഥയിലായി.
കേരള കോൺഗ്രസിന്റെ ശക്തികേന്ദ്രമായ പാലാ നഗരസഭയിലെ തിരിച്ചടി പാർട്ടിക്ക് കനത്ത ആഘാതമായി. ദീർഘകാല എതിരാളിയായ ബിനു പുളിക്കകണ്ടവും കുടുംബവും നേടിയ വിജയം പാർട്ടിയെ പ്രതിരോധത്തിലാക്കി.
ഇതോടെ കോട്ടയം ജില്ലയിലെ ചില പ്രധാന ശക്തികേന്ദ്രങ്ങളിൽ നിന്ന് വിജയസാധ്യതയും സ്വാധീനവും നഷ്ടമായി.
പാർട്ടി ചെയർമാൻ ജോസ് കെ. മാണിയുടെ സ്വന്തം വാർഡ് എൽഡിഎഫിൽ നിന്ന് കോൺഗ്രസ് കൈവശപ്പെടുത്തിയത് കേരള കോൺഗ്രസ് (എം)ക്ക് വലിയ രാഷ്ട്രീയ നാണക്കേടായാണ് വിലയിരുത്തപ്പെടുന്നത്.
കോട്ടയം ജില്ലയിൽ ഇത്തവണ വർധിച്ച 88 വാർഡുകളിൽ 40 എണ്ണം കേരള കോൺഗ്രസ് (എം)ക്ക് സിപിഎം വിട്ടുനൽകിയിരുന്നു. മൊത്തത്തിൽ 48 സീറ്റുകൾ പാർട്ടിക്ക് ലഭിച്ചു.
ചില പരമ്പരാഗത കേരള കോൺഗ്രസ് (എം) മേഖലകളിൽ പാർട്ടി ചിഹ്നത്തിൽ മത്സരിപ്പിക്കാതെ ഇടതു സ്വതന്ത്രരെ നിർത്തിയതും തിരിച്ചടിയായി. ഫലം നിരാശാജനകമായിരുന്നു.
ജില്ലാ പഞ്ചായത്തിൽ കഴിഞ്ഞ തെരഞ്ഞെടുപ്പിൽ അഞ്ചു ഡിവിഷനുകളിൽ കേരള കോൺഗ്രസ് (എം) വിജയിച്ചിരുന്നുവെങ്കിൽ, ഇത്തവണ അത് നാലായി കുറഞ്ഞു.
ശക്തമായ യുഡിഎഫ് തരംഗത്തിനിടയിലും കഴിഞ്ഞ തവണത്തെ സീറ്റുകൾ ഭൂരിഭാഗവും നിലനിർത്താനായെന്നതാണ് പാർട്ടി നേതൃത്വത്തിന്റെ വാദം.
ഒരു ഡിവിഷൻ നഷ്ടപ്പെട്ടെങ്കിലും പാലായടക്കം കഴിഞ്ഞ തവണത്തെ സീറ്റുകൾ സംരക്ഷിക്കാനും കിഴക്കൻ മേഖലയിൽ കൂടുതൽ വാർഡുകൾ നേടാനും കഴിഞ്ഞുവെന്ന് നേതൃത്വം അവകാശപ്പെടുന്നു.
അതേസമയം, യുഡിഎഫിൽ പി.ജെ. ജോസഫ് നയിക്കുന്ന കേരള കോൺഗ്രസ് മെച്ചപ്പെട്ട പ്രകടനമാണ് കാഴ്ചവെച്ചത്. ഇടുക്കി ജില്ലാ പഞ്ചായത്തിൽ നാല് ഡിവിഷനുകളിൽ പാർട്ടി വിജയം നേടി;
കഴിഞ്ഞ തവണ ഇത് രണ്ടായിരുന്നു. മുൻ തെരഞ്ഞെടുപ്പിൽ യുഡിഎഫിൽ നിന്ന് ഇടുക്കി ജില്ലാ പഞ്ചായത്ത് എൽഡിഎഫ് പിടിച്ചെടുത്തത് കേരള കോൺഗ്രസ് (എം)യുടെ വരവോടെയായിരുന്നു.
തുടർന്ന് ഇടുക്കി നിയമസഭാ മണ്ഡലത്തിൽ റോഷി അഗസ്റ്റിന് ലഭിച്ച വമ്പൻ വിജയം ജില്ലയിൽ പാർട്ടിയുടെ ശക്തി തെളിയിച്ചെങ്കിലും, ഇത്തവണ ജില്ലാ പഞ്ചായത്തിൽ മത്സരിച്ച നാല് ഡിവിഷനുകളിലും വിജയം നേടാൻ പാർട്ടിക്ക് സാധിച്ചില്ല.
ശക്തികേന്ദ്രമായ കട്ടപ്പന നഗരസഭയിൽ ഭരണമാറ്റമെന്ന പ്രതീക്ഷയും അപ്രത്യക്ഷമായി. എങ്കിലും, ലഭിച്ച സീറ്റുകളിൽ മികച്ച പ്രകടനം കാഴ്ചവെച്ചുവെന്നാണ് കേരള കോൺഗ്രസ് (എം) നേതാക്കളുടെ വിശദീകരണം.
അതേസമയം, പി.ജെ. ജോസഫ് നയിക്കുന്ന കേരള കോൺഗ്രസ് തെരഞ്ഞെടുപ്പിൽ വ്യക്തമായ മുന്നേറ്റം നടത്തി. ജില്ലാ പഞ്ചായത്തിൽ അഞ്ചിടത്ത് മത്സരിച്ച പാർട്ടി നാലു സീറ്റുകൾ നേടി.
വിവിധ കേരള കോൺഗ്രസ് വിഭാഗങ്ങൾക്കിടയിൽ പി.ജെ. ജോസഫിന്റെ നേതൃത്വത്തിലുള്ള പാർട്ടി കൂടുതൽ കരുത്തനാകുന്നതായാണ് രാഷ്ട്രീയ വിലയിരുത്തൽ.
English Summary
LDF’s strategy of projecting Kerala Congress (M) failed to deliver results in the local body elections, particularly in Kottayam and Idukki. The party suffered notable setbacks, including defeats in its traditional strongholds such as Pala municipality and the ward of party chairman Jose K. Mani. While KC(M) leadership claims it largely retained its previous seats despite a strong UDF wave, its overall influence declined. In contrast, P.J. Joseph-led Kerala Congress, aligned with the UDF, recorded significant gains, emerging stronger than other Kerala Congress factions.
ldf-strategy-fails-kerala-congress-m-local-elections
Kerala local body elections, Kerala Congress M, LDF, UDF, Jose K Mani, P J Joseph, Kottayam, Idukki, Palai municipality
