സ്കൂളിൽ നിന്ന് മോഷ്ടിച്ച മുതൽ തിരികെവച്ചു; കുളത്തൂപ്പുഴയിൽ യുവാക്കൾ കുടുങ്ങി
കൊല്ലം: കുളത്തൂപ്പുഴ ഗ്രാമപഞ്ചായത്തിന്റെ നിയന്ത്രണത്തിൽ പ്രവർത്തിക്കുന്ന പട്ടികവർഗ്ഗ സ്കൂളിൽ മോഷണം നടത്തിയ രണ്ട് യുവാക്കളെ പൊലീസ് പിടികൂടി.
ചെറുകര ആർജിഎം എൽപി സ്കൂളിലെ സ്മാർട്ട് ക്ലാസ് റൂമിൽ സ്ഥാപിച്ചിരുന്ന സ്പീക്കറുകൾ, മിക്സർ തുടങ്ങിയ ഉപകരണങ്ങളാണ് മോഷണം പോയത്.
പെരുമ്പാവൂർ ഭായി കോളനിയിലെ ലഹരി കച്ചവടത്തിൽ പങ്ക്; പോലീസുകാരന് സസ്പെൻഷൻ
പ്രദേശവാസികളായ രണ്ടുപേർ അറസ്റ്റിൽ
ചെറുകര അനന്തു ഭവനിൽ അനന്തു രാജ് (29), പൊൻപാതിര മുകളിൽ ബിനു (36) എന്നിവരെയാണ് കുളത്തൂപ്പുഴ പൊലീസ് അറസ്റ്റ് ചെയ്തത്.
കഴിഞ്ഞ മാസം 28-നായിരുന്നു മോഷണം നടന്നത്.
മോഷണമുതൽ തിരികെവച്ചു, പക്ഷേ രക്ഷയില്ല
പരാതിയുടെ അടിസ്ഥാനത്തിൽ പൊലീസ് അന്വേഷണം ആരംഭിച്ചതിന് പിന്നാലെ, മോഷണ സാധനങ്ങൾ ആരുമറിയാതെ പ്രതികൾ തന്നെ സ്കൂളിൽ തിരികെ എത്തിച്ചിരുന്നു.
എന്നിരുന്നാലും പ്രതികളെ കണ്ടെത്താനുള്ള അന്വേഷണം പൊലീസ് ശക്തമാക്കി.
പ്രഥമാധ്യാപികയുടെ മൊഴി വഴിത്തിരിവായി
സ്കൂളിനെ കുറിച്ച് കൃത്യമായ അറിവുള്ളവർക്ക് മാത്രമേ ഇത്തരമൊരു മോഷണം നടത്താൻ കഴിയൂ എന്ന് പ്രഥമാധ്യാപിക മൊഴി നൽകിയിരുന്നു.
ഇതിന്റെ അടിസ്ഥാനത്തിൽ പ്രദേശവാസികളായ നിരവധി പേരെ പൊലീസ് ചോദ്യം ചെയ്തു.
ഫോൺ പരിശോധനയിൽ നിർണായക തെളിവുകൾ
പ്രതികളുടെ ഫോൺ പരിശോധിച്ചപ്പോൾ മൈക്ക് സെറ്റിന്റെ വില വിവരങ്ങൾ അന്വേഷിച്ചതടക്കമുള്ള കാര്യങ്ങൾ പൊലീസ് കണ്ടെത്തി.
മൊഴികളിലെ വൈരുദ്ധ്യവും സംഭവദിവസം സ്കൂൾ പരിസരത്ത് ഇവരെ കണ്ടതായി ലഭിച്ച വിവരങ്ങളും കേസിൽ നിർണായകമായി.
കൂടുതൽ പേർ ഉണ്ടോയെന്ന് അന്വേഷണം
മോഷണം നടത്തിയ രീതി, മോഷണമുതൽ സൂക്ഷിച്ച സ്ഥലം എന്നിവ പ്രതികൾ പൊലീസിന് വിശദീകരിച്ചു.
ഇതിന് മുമ്പ് സ്കൂളിൽ നടന്ന മോഷണങ്ങൾക്ക് പിന്നിലും ഇവർ തന്നെയാണോ എന്നും പൊലീസ് പരിശോധിക്കുന്നു.
പ്രതികളെ കോടതിയിൽ ഹാജരാക്കി റിമാൻഡ് ചെയ്തു.
English Summary:
Police arrested two men for stealing smart classroom equipment from a tribal school run by the Kulathupuzha grama panchayat in Kollam district. Although the accused secretly returned the stolen items during the investigation, police continued the probe and traced them using witness statements and mobile phone evidence. Further investigation is underway to check their involvement in earlier thefts.
