പാലക്കാട്: പാലക്കാട് സ്വന്തം നിലയ്ക്കുള്ള പ്രചാരണം ഷാഫി പറമ്പില് അവസാനിപ്പിക്കണമെന്ന് കെപിസിസി നേതൃത്വം. പ്രചാരണം ജില്ലാ നേതൃത്വവുമായി കൂടിയാലോചിച്ച് മാത്രം മതിയെന്നും സ്വന്തം നിലയിൽ പ്രചാരണം വേണ്ടെന്നുമാണ് നിർദേശം നൽകിയത്. ഷാഫിയുടെ പ്രവർത്തന ശൈലി സംബന്ധിച്ച നേതാക്കളുടെ വ്യാപക പരാതിയെ തുടർന്നാണ് കോണ്ഗ്രസ് നേതൃത്വത്തിന്റെ ഇടപെടൽ.(KPCC Against Shafi Parambil)
എന്നാൽ ആരോപണം നിഷേധിച്ച് ഷാഫി പറമ്പിൽ രംഗത്തെത്തി. തന്നെ ആരും താക്കീത് ചെയ്തിട്ടില്ലെന്നാണ് ഷാഫി പറമ്പിൽ പറയുന്നത്. ആരോപണങ്ങളിൽ തളരില്ല, കൂടുതൽ ഊർജത്തോടെ മുന്നോട്ട് പോകുമെന്നും ഷാഫി പറഞ്ഞു. പാലക്കാട്ട് കോണ്ഗ്രസിനുള്ളിൽ ഷാഫി പറമ്പിനെതിരെ കടുത്ത അതൃപ്തി പുകയുകയാണ്.
ഷാഫി പറമ്പിൽ പ്രവർത്തന രീതിയിൽ മാറ്റം വരുത്തണമെന്ന ആവശ്യവുമായി കോൺഗ്രസിൻ്റെ മുതിർന്ന നേതാവ് വി എസ് വിജയരാഘവൻ ഇന്ന് രംഗത്തുവന്നിരുന്നു. അതിനിടെ, ഷാഫി പറമ്പിൽ എംപിയെ വിമര്ശിച്ചും പി സരിനെ അനുകൂലിച്ചും ഫേയ്സ്ബുക്കിൽ പോസ്റ്റിട്ട യൂത്ത് കോണ്ഗ്രസ് നേതാവിനെ മര്ദ്ദിച്ചെന്ന പരാതിയും വന്നിട്ടുണ്ട്.
