‘എരഞ്ഞിപ്പാലത്തെ അവ്വൈ ഷൺമുഖി’…വണ്ടി ഫുട്പാത്തിൽ കയറ്റാൻ പ്ലാൻ ഉണ്ടെങ്കിൽ സൂക്ഷിക്കുക; അവിടെ ‘ക്ലോസ് സർക്യൂട്ട് ക്യാമറയെക്കാൾ’ പവർഫുൾ ആയ പ്രഭാവതിയമ്മ കാവലുണ്ട്…50സ് കിഡിന് അഭിനന്ദനപ്രവാഹം
കോഴിക്കോട് ∙ ഫുട്പാത്തിലൂടെ സ്കൂട്ടർ ഓടിച്ചെത്തിയ യുവാവിനെ തടഞ്ഞ വയോധികയുടെ വീഡിയോ വൈറലായതോടെ സമൂഹമാധ്യമങ്ങളിൽ അഭിനന്ദന പ്രവാഹം.
‘സൂപ്പർ’, ‘അമ്മച്ചി പൊളി’, ‘ഇങ്ങനെ പ്രതികരിക്കണം’ തുടങ്ങിയ നിരവധിപേർ പ്രശംസാപരമായ കമന്റുകളാണ് പങ്കുവെക്കുന്നത്. ഫുട്പാത്തിലൂടെ വാഹനങ്ങൾ ഓടിക്കുന്നത് പതിവാണെന്നും നാട്ടുകാർ അഭിപ്രായപ്പെട്ടു.
എരഞ്ഞിപ്പാലം ട്രാഫിക് സിഗ്നലിന് സമീപം നടന്ന സംഭവത്തിലാണ് കൊയ്യേരി പ്രഭാവതിയമ്മ ശ്രദ്ധേയയായത്. ഫുട്പാത്തിലൂടെ നടന്നുവരുന്നതിനിടെ സിഗ്നൽ മറികടക്കാൻ സ്കൂട്ടർ ഫുട്പാത്തിലേക്ക് കയറ്റിയ യുവാവിനെ അവർ തടഞ്ഞു.
യാത്രക്കാരൻ മുന്നോട്ടുപോകാൻ ശ്രമിച്ചെങ്കിലും പ്രഭാവതിയമ്മ പിന്മാറിയില്ല. കാലുകൊണ്ട് വാഹനം തടഞ്ഞ അവർ, വീണ്ടും നീങ്ങാൻ ശ്രമിച്ചതോടെ മൊബൈൽ ഫോൺ എടുത്ത് ദൃശ്യം പകർത്താൻ തുടങ്ങി.
ഇതോടെ യുവാവ് പിൻവാങ്ങി. സമീപത്തെ കെട്ടിടത്തിൽനിന്ന് പകർത്തിയ വീഡിയോ പിന്നീട് സോഷ്യൽ മീഡിയയിൽ വ്യാപകമായി പ്രചരിച്ചു.
“ഈ വഴി ഞാൻ നടക്കുമ്പോൾ ഫുട്പാത്തിലൂടെ വാഹനങ്ങൾ കയറിവന്നാൽ ഞാൻ തടയും. ഫുട്പാത്ത് കാൽനടയാത്രക്കാരുടേതാണ്,” എന്നാണ് പ്രഭാവതിയമ്മയുടെ പ്രതികരണം.
മുമ്പും ഇത്തരത്തിൽ വാഹനം തടഞ്ഞപ്പോൾ ഒരു യുവാവ് തന്നെ മർദ്ദിച്ചതായും തുടർന്ന് എസിപിക്ക് പരാതി നൽകിയതോടെ ഇയാളെ വിളിപ്പിച്ച് താക്കീത് ചെയ്തതായും അവർ പറഞ്ഞു.
വളരെ നല്ല കാര്യമാണ് ചെയ്തതെന്നാണ് ആളുകൾ അഭിപ്രായപ്പെടുന്നത്. ‘സൂപ്പർ’, ‘ആ അമ്മ ചെയ്തതു ഏറ്റവും നല്ല കാര്യം… സ്ത്രീകൾ ഇങ്ങനെ പ്രതികരിക്കണം’, ‘ഇന്ന് അമ്മമ്മക്കാവട്ടെ ബിഗ് സല്യൂട്ട്’, ‘50സ് കിഡ് ഡാ’, ‘അമ്മച്ചി പൊളിയാണ്’,
‘ഡിജിറ്റൽ കേരള വെല്ലിമ്മിച്ചി ലാസ്റ്റ് ഫോൺ എടുത്തു’ തുടങ്ങി നിരവധി കമന്റുകളാണ് വിഡിയോയ്ക്ക് താഴെ ആളുകൾ രേഖപ്പെടുത്തിയിരിക്കുന്നത്.
‘എരഞ്ഞിപ്പാലത്തെ അവ്വൈ ഷൺമുഖി’ എന്ന കമന്റിനും നിരവധി പേർ ‘ലൈക്ക’ടിച്ചു. ഫുട്പാത്തിലൂടെ വാഹനം ഓടിക്കുന്നത് ഒരു സ്ഥിരം പരിപാടിയാണെന്നും നാട്ടുകാർ അഭിപ്രായപ്പെടുന്നുണ്ട്.
English Summary:
An elderly woman in Kozhikode went viral after a video showed her stopping a scooter rider who tried to drive along a footpath. Identified as Prabhavathi Amma, she firmly blocked the vehicle and even began recording it, forcing the rider to back off. Social media users praised her for standing up for pedestrian rights.
kozhikode-elderly-woman-stops-scooter-footpath
Kozhikode, Viral Video, Traffic Rules, Pedestrian Rights, Kerala News, Social Media
