സർക്കാരിന് പണി കിട്ടി; കൊല്ലം കളക്ടറേറ്റ് ഇനി ‘സ്വകാര്യം’! 12 കോടി നൽകാത്തതിന് ഭരണസിരാകേന്ദ്രം ജപ്തി ചെയ്ത് സബ് കോടതി!
കൊല്ലം:
ഹൈക്കോടതി വിധിച്ച നഷ്ടപരിഹാര തുക സർക്കാർ കെട്ടിവയ്ക്കാത്തതിനെ തുടർന്ന്, കൊല്ലം കളക്ടറേറ്റ് പ്രവർത്തിക്കുന്ന ഏകദേശം രണ്ട് ഏക്കർ ഭൂമി ജപ്തി ചെയ്ത് കൊല്ലം സബ് കോടതി. കളക്ടറേറ്റ് കെട്ടിടത്തിൽ ജപ്തി നോട്ടീസും പതിപ്പിച്ചു.
2003-ൽ സ്വകാര്യ വ്യക്തിയുടെ ഭൂമി ഏറ്റെടുത്തപ്പോൾ മതിയായ നഷ്ടപരിഹാരം നൽകിയില്ലെന്ന പരാതിയെ തുടർന്നാണ് നടപടി.
അന്നത്തെ മുനിസിപ്പാലിറ്റി ഘട്ടത്തിൽ ബസ് ടെർമിനൽ–ഷോപ്പിംഗ് കോംപ്ലക്സ് പദ്ധതി നടപ്പാക്കുന്നതിനായി, ചിന്നക്കട ഉപാസന ആശുപത്രിക്ക് സമീപം കൊല്ലം–തിരുമംഗലം പാതയോരത്ത് സ്ഥിതിചെയ്ത, വിജയലക്ഷ്മി കാഷ്യൂസ് ഉടമയായ പരേതൻ കെ. രവീന്ദ്രനാഥൻ നായരുടെ 1.23 ഏക്കർ ഭൂമിയാണ് കൊല്ലം കോർപ്പറേഷൻ ഏറ്റെടുത്തത്.
ആദ്യഘട്ടത്തിൽ സർക്കാർ നിശ്ചയിച്ച നഷ്ടപരിഹാരം 1.13 കോടി രൂപയായിരുന്നു. ഇത് ചോദ്യം ചെയ്ത് ഭൂവുടമ നൽകിയ ഹർജിയിൽ, കൊല്ലം സബ് കോടതി നഷ്ടപരിഹാരം എട്ട് കോടിയായി ഉയർത്തി.
തുടർന്ന്, ഭൂവുടമയും കോർപ്പറേഷനും അപ്പീൽ നൽകിയതിനെ തുടർന്ന്, കേരള ഹൈക്കോടതി നഷ്ടപരിഹാരത്തുക 12.43 കോടിയായി വർധിപ്പിച്ചു.
ഹൈക്കോടതി വിധി നടപ്പാക്കണമെന്ന് ആവശ്യപ്പെട്ട് ഭൂവുടമ കൊല്ലം സബ് കോടതിയിൽ വിധിനടത്തിപ്പ് ഹർജി നൽകിയിരുന്നു.
എന്നാൽ വിധിച്ച തുക സർക്കാർ കെട്ടിവയ്ക്കാൻ തയ്യാറാകാതിരുന്നതിനെ തുടർന്നാണ്, കൊല്ലം സബ് കോടതി കളക്ടറേറ്റ് ഭൂമി ജപ്തി ചെയ്ത് തുക ഈടാക്കാനുള്ള നടപടി ആരംഭിച്ചത്.
ഭൂവുടമയ്ക്കുവേണ്ടി ചിറ്റയം സതീഷ്കുമാർ, വി. എസ്. തമ്പി, ഐശ്വര്യ എസ്. പ്രസാദ്, ഷീന ബീഗം എന്നിവർ കോടതിയിൽ ഹാജരായി.
അതേസമയം, ജപ്തിനടപടി പിൻവലിക്കാനും ഹൈക്കോടതി വിധി സ്റ്റേ ചെയ്യാനുമായി സർക്കാർ നിയമനടപടികൾ ആരംഭിച്ചതായും അറിയിച്ചു.
English Summary
The Kollam Sub Court has ordered the attachment of about two acres of land where the Kollam Collectorate is functioning, after the state government failed to deposit the compensation amount fixed by the Kerala High Court in a land acquisition case. The High Court had enhanced the compensation to ₹12.43 crore. The government has now initiated legal steps to stay the order and withdraw the attachment.
kollam-collectorate-land-attached-high-court-compensation-not-paid
Kollam, Kollam Sub Court, Kerala High Court, Kollam Corporation, Land Acquisition, Compensation Dispute, Collectorate Attachment, Court Order, Kerala News
