തിരുവനന്തപുരം: കേരളത്തിന്റെ പുതിയ പൊലീസ് മേധാവി ആരെന്ന് ഇന്നറിയാം. ഇന്നു രാവിലെ ചേരുന്ന മന്ത്രിസഭാ യോഗത്തിലാകും പുതിയ പൊലീസ് മേധാവിയെ തീരുമാനിക്കുന്നത്.
കേന്ദ്രം നിർദ്ദേശിച്ച മൂന്നുപേരിൽ റാവാഡ ചന്ദ്രശേഖറിന്റെ പേരിനാണു മുൻതൂക്കമെന്നാണ് നിലവിൽപുറത്തുവരുന്ന റിപ്പോർട്ടുകൾ.
നിലവിൽ കേന്ദ്ര കാബിനറ്റ് സെക്രട്ടേറിയറ്റിൽ സെക്രട്ടറി (സെക്യൂരിറ്റി) പദവിയിലാണ്. റാവാഡ, പ്രധാനമന്ത്രിയുടെ സുരക്ഷയുടെ ചുമതലയുള്ള എസ്പിജിയുടെയും രാജ്യത്തെ സുപ്രധാന സ്ഥാപനങ്ങളുടെയും ഉൾപ്പെടെ സുരക്ഷാ ചുമതലയുള്ള സെക്രട്ടറിയാണ്.
ഇദ്ദേഹം കേരളത്തിന്റെ ഡിജിപിയായി എത്തണമെങ്കിൽ പ്രധാനമന്ത്രിയുടെ പ്രത്യേക അനുമതിയും തേടേണ്ടി വരും.
റാവാഡയെയാണ് പുതിയ പൊലീസ് മേധായിയായി മന്ത്രിസഭ തീരുമാനിക്കുന്നതെങ്കിൽ അദ്ദേഹം ചുമതലയേൽക്കാൻ കുറച്ചു ദിവസങ്ങൾ വേണ്ടിവരുമെന്നാണ് റിപ്പോർട്ട്.
അദ്ദേഹത്തിന്റെ മാറ്റം സംബന്ധിച്ച് ഡൽഹിയിലെ നടപടി ക്രമങ്ങൾ പൂർത്തിയാക്കുന്നതിനാണ് കൂടുതൽ സമയം വേണ്ടിവരിക.
റാവാഡയെ നിശ്ചയിക്കുകയാണെങ്കിൽ ഉത്തരവിറങ്ങിയാൽ മാത്രമേ ന്യൂഡൽഹിയിൽ നടപടിക്രമങ്ങൾക്കു തുടക്കമിടുകയുള്ളു.
അദ്ദേഹം വരുന്നതുവരെ പൊലീസ് ആസ്ഥാനത്തിന്റെ ചുമതലയുള്ള എഡിജിപിയെ താൽക്കാലിക ചുമതലയേൽപിക്കും.
യുപിഎസ്സി നൽകിയ പട്ടികയിലെ മറ്റു രണ്ടുപേരും തിരുവനന്തപുരത്തു തന്നെയുള്ളവരാണ്. അതുകൊണ്ട് തന്നെ, അവരിൽ ആരെയെങ്കിലുമാണ് മന്ത്രിസഭായോഗം പുതിയ പൊലീസ് മേധാവിയായി തീരുമാനിക്കുന്നതെങ്കിൽ ഇന്നു തന്നെ ചുമതലയേൽക്കാനാവും.
നിലവിലെ പൊലീസ് മേധാവിയുടെ കാലാവധി ഇന്ന് പൂർത്തിയാകും. റോഡ് സുരക്ഷാ കമ്മിഷണർ നിതിൻ അഗർവാളും ഫയർഫോഴ്സ് മേധാവി യോഗേഷ് ഗുപ്തയുമാണ് പട്ടികയിൽ ഇനി ബാക്കിയുള്ളവർ.
റാവാഡയാണ് പൊലീസ് മേധാവിയെങ്കിൽ എഡിജിപി എം.ആർ.അജിത്കുമാറിന്റെ ഡിജിപി തസ്തികയിലേക്കുള്ള വരവ് ഇനിയും ഒരു വർഷം വൈകും.
യുപിഎസ്സിയുടെ ചുരുക്കപ്പട്ടിക വാങ്ങിയ ശേഷം അതിനു പുറത്ത് മറ്റൊരാൾക്ക് സംസ്ഥാന പൊലീസ് മേധാവിയുടെ താൽക്കാലിക ചുമതല നൽകുന്നതിലെ സാധ്യതകൾ ആഭ്യന്തരവകുപ്പിലെ ഉന്നതർ തള്ളിക്കളഞ്ഞു.
അതേസമയം അയൽ സംസ്ഥാനങ്ങളായ കർണാടകയിലും തമിഴ്നാട്ടിലും ഇന്നാണ് പൊലീസ് മേധാവി മാറേണ്ടതെങ്കിലും ഇരു സംസ്ഥാനങ്ങളും യുപിഎസ്സിക്ക് പട്ടിക അയച്ചിട്ടുമില്ല.
സർക്കാരിനു താൽപര്യമുള്ളയാളെ പൊലീസ് മേധാവിയാക്കുന്നതിനാണ് ഇത്തരത്തിലുള്ള നടപടി. കേരളം സുപ്രീംകോടതിയുടെ നിർദേശങ്ങൾ കൃത്യമായി പാലിച്ചാണ് ഇതുവരെ പൊലീസ് മേധാവിമാരെ നിശ്ചയിച്ചിട്ടുള്ളതെന്നതിനാൽ ഇക്കുറിയും നടപടികളിൽ മാറ്റം വരുത്തിയില്ല.
പൊലീസ് മേധാവി ഡോ.എസ്.ദർവേഷ് സാഹിബിന് പൊലീസ് സേന നൽകുന്ന വിടവാങ്ങൽ പരേഡ് ഇന്നു രാവിലെ 8.30ന് എസ്എപി പരേഡ് ഗ്രൗണ്ടിൽ നടക്കും.
കേരള പൊലീസിന്റെ ഔദ്യോഗിക യാത്രയയപ്പു ചടങ്ങ് ഇന്ന് ഉച്ചയ്ക്ക് 12ന് പൊലീസ് ആസ്ഥാനത്ത് സംഘടിപ്പിച്ചിട്ടുണ്ട്.
English Summary :
Kerala’s new Police Chief will be announced today. The decision will be made during the Cabinet meeting scheduled for this morning
