തൊപ്പി ഭാരമാകുമ്പോൾ.സമ്മർദം താങ്ങാനാകാതെ ആത്മഹത്യ

തിരുവനന്തപുരം : 12 മുതൽ 16 മണിക്കൂർ വരെ തുടർച്ചയായി ഡ്യൂട്ടി , പെറ്റി കേസുകളുണ്ടാക്കാനുള്ള സമർദം എല്ലാത്തിനും ഉപരി അസഭ്യവർഷം നടത്തുന്ന മേലുദ്യോഗസ്ഥർ. കേരള പോലീസിലെ ഐ.പി.എസ് റാങ്കിന് താഴെയുള്ള ഉദ്യോഗസ്ഥർ അനുഭവിക്കുന്ന പ്രശ്നങ്ങളാണ് ഇതൊക്കെ. ഗ്രാജുവേഷനും പോസ്റ്റ് ഗ്രാജുവേഷനും പൂർത്തിയാക്കി പി.എസ്.സി റാങ്ക് ലിസ്റ്റ് വഴി കേരള പോലീസിലേയ്ക്ക് തിരഞ്ഞെടുക്കപ്പെടുന്ന മിടുക്കൻമാരെ കാത്തിരിക്കുന്നത് ദുരിതകാലം. ജോലിഭാരവും സമർദവും പ്രഫഷണലിസത്തിന്റെ അഭാവവും കാരണം സേന വിടാൻ ആഗ്രഹിക്കുന്നവരുടെ എണ്ണം വർദ്ധിക്കുന്നു. വിവിധ ജില്ലകളിൽ നിന്നായി കേരള പോലീസിൽ നിന്നും സ്വയം വിരമിക്കലിന് അപേക്ഷ നൽകി കാത്തിരിക്കുന്നവരുടെ എണ്ണം 800 കടന്നുവെന്ന് മാധ്യമങ്ങൾ റിപ്പോർട്ട് ചെയ്യുന്നു. വി.ആർ.എസ് അപേക്ഷ നൽകുന്നവരുടെ കാര്യത്തിൽ തീരുമാനം എടുക്കേണ്ടത് ജില്ലാ പോലീസ് മേധാവിമാരാണ്. ഇത് പ്രകാരം 65 പേർ തൃശൂർ ജില്ലയിൽ മാത്രം വിരമിക്കൽ അപേക്ഷ നൽകിയിട്ടുണ്ട്. ഇതിൽ 26 വർഷത്തെ സേവനമുള്ള ഈസ്റ്റ് പോലീസ് സ്റ്റേഷൻ സബ് ഇൻസ്പകടറും ഉൾപ്പെടുന്നു. ഇയാൾക്ക് വിരമിക്കാൻ ജില്ലാ പോലീസ് മേധാവി അനുമതി നൽകി.
സംസ്ഥാനത്തെ മുഴുവൻ കണക്കും പരിശോധിച്ചാൽ സിപിഒ മുതൽ സബ് ഇൻസ്പെക്ടർ വരെയുള്ള റാങ്കുകളിൽപ്പെട്ടവരാണു വിരമിക്കൽ അപേക്ഷ ലിസ്റ്റിൽ കൂടുതലായി ഉള്ളത്. മറ്റ് പി.എസ്.സി റാങ്ക് ലിസ്റ്റിൽ ഉൾപ്പെടുന്നവർ അതിവേഗം നിലവിലുളള പോലീസ് ജോലി ഒഴിവാക്കുകയാണ്. ശബളം കുറവുള്ള മറ്റ് ജോലികൾ തിരഞ്ഞെടുക്കുന്നവരും ഉണ്ട്.

സമ്മർദം താങ്ങാനാകാതെ ആത്മഹത്യ

പോലീസ് അസോസിയേഷൻ ഭാരവാഹികൾ നൽകുന്ന അനൗദ്യോഗിക വിവര പ്രകാരം സമർദം താങ്ങാനാവാതെ നിരവധി പോലീസുകാർ ആത്മഹത്യ ചെയ്യുന്നുണ്ട്. വർഷത്തോറും ശരാശരി മുപ്പതിലേറെ പേരെങ്കിലും ജീവനൊടുക്കുന്നുണ്ട്. ഇത് ആശങ്കയുണ്ടാക്കുന്നതായി സംസ്ഥാന പോലീസ് മേധാവി തന്നെ സമ്മതിക്കുന്നതായി ഉദ്യോഗസ്ഥർ ചൂണ്ടികാട്ടുന്നു. ആത്മഹത്യാ വിവരങ്ങളുടെ കണക്കെടുക്കാൻ ഡിജിപി നിർദേശിച്ചിട്ടുണ്ട്. കേസുകളുടെ എണ്ണം വർദ്ധിക്കുന്നതിനുസരിച്ച് പോലീസ് ഉദ്യോഗസ്ഥരുടെ തസ്തിക ഉയർന്നിട്ടില്ല. കോടതിയിൽ ഹാജരാകൽ, വി.ഐ.പി ഡ്യൂട്ടി എല്ലാം കഴിഞ്ഞിട്ട് സ്റ്റേഷൻ ജോലിയ്ക്കായി പോലീസുകാരെ കിട്ടാനില്ല എന്നത് വസ്തുതയാണ്.ഓന്നോ രണ്ടോ പേർക്ക് മാത്രമാണ് ദിനംപ്രതിയുള്ള കേസുകൾ പരിശോധിക്കാനായി സാധിക്കുന്നത്. പ്രഫഷണൽ സമീപനം ഇല്ലാത്ത മേലുദ്യോഗസ്ഥരും കാര്യങ്ങൾ ഗുരുതരമാക്കുന്നു. അടിമ – ഉടമ മനോഭാവം പുലർത്തുന്ന ഉദ്യോഗസ്ഥർ അസഭ്യവർഷത്തോടെ കീഴ് ജിവനക്കാരോട് പെരുമാറുന്നു. മികച്ച അക്കൗദമിക് പിൻബലമുള്ള പോലീസുകാർക്ക് ഇത് വലിയ മാനസിക ആഘാതം സൃഷ്ട്ടിക്കുന്നു.രാഷ്ട്രിയ സമർദവും ശക്തമാണ്. രോഗങ്ങൾ മൂലം അവധി ആവശ്യപ്പെട്ടാലും ലഭിക്കാത്ത സാഹചര്യവും ഉണ്ട്.
കേരള പോലീസ് സേനയെ നവീകരിക്കാനുള്ള കമ്മീഷൻ റിപ്പോർട്ടുകൾ നിരവധി ഉണ്ട്. പോലീസ് സേനേയുടെ ആകെ നവീകരണത്തിനായി സുപ്രീംകോടതി മാർഗനിർദേശങ്ങളും വന്നിട്ടുണ്ട്.പക്ഷെ ഇതൊന്നും ഫലപ്രാപ്തിയിലെത്തിയിട്ടില്ല.