ബിജെപി ആസ്ഥാനത്തേക്ക് ഡല്ഹി മുഖ്യമന്ത്രി അരവിന്ദ് കെജരിവാളിന്റെ നേതൃത്വത്തില് ആം ആദ്മി പാര്ട്ടി നടത്തുന്ന പ്രതിഷേധ മാര്ച്ച് പൊലീസ് തടഞ്ഞു. ബിജെപി ഓഫീസിലേക്കുള്ള വഴി ബാരിക്കേഡ് വെച്ചാണ് പൊലീസ് തടഞ്ഞത്. പ്രവര്ത്തകരോട് പിരിഞ്ഞു പോകണമെന്ന് പൊലീസ് ആവശ്യപ്പെട്ടെങ്കിലും സമരക്കാര് തയ്യാറായില്ല. ബാരിക്കേഡിന് മുന്നില് കെജരിവാളും പ്രവര്ത്തകരും കുത്തിയിരിക്കുകയാണ്.
പാര്ട്ടിയെ തകര്ക്കാന് ഓപ്പറേഷന് ചൂലിന് ബിജെപി ശ്രമം നടത്തുകയാണെന്നും ഒരു കെജരിവാളിനെ അറസ്റ്റ് ചെയ്താല് നൂറ് കേജ്രിവാളുമാര് ജന്മമെടുക്കുമെന്നും മുഖ്യമന്ത്രി പറഞ്ഞു. മാര്ച്ചിന് മുന്നോടിയായി ഡല്ഹിയില് 144 പ്രഖ്യാപിച്ചിരുന്നു. സമരത്തിന്റെ ഭാഗമായി ഐടിഒയിലെ മെട്രോ സ്റ്റേഷനുകള് അടച്ചു. ആം ആദ്മി പാര്ട്ടിയുടെ ആസ്ഥാനത്തിനു മുന്നില് കേന്ദ്രസേനയെ വിന്യസിച്ചിട്ടുണ്ട്.
അതേസമയം മുഖ്യമന്ത്രി അരവിന്ദ് കെജരിവാളിന്റെ വീട്ടില് ഡല്ഹി പൊലീസ് എത്തി. സ്വാതി മലിവാളിന്റെ പരാതിയുമായി ബന്ധപ്പെട്ട അന്വേഷണത്തിനാണ് പൊലീസ് എത്തിയിരിക്കുന്നത്. വീട്ടിലെ സിസിടിവി ഡിവിആർ ഡല്ഹി പൊലീസ് പിടിച്ചെടുത്തു. കേസില് അരവിന്ദ് കെജ്രിവാളിന്റെ പിഎ ബിഭവ് കുമാര് അറസ്റ്റിലായിരുന്നു. സ്വാതിയുടെ ദേഹത്ത് പരിക്കുകളുണ്ടെന്നാണ് മെഡിക്കല് റിപ്പോര്ട്ട്.
സ്വാതി മലിവാളിന്റെ ദേഹത്ത് മൂന്നിടത്ത് പരിക്കുണ്ട്. ഇടത് കാലിലും കീഴ്ത്താടിയിലും കണ്ണിന് താഴെയും ചതവുണ്ടെന്ന് മെഡിക്കല് റിപ്പോര്ട്ടില് പറയുന്നു. ഡല്ഹി എയിംസ് ആശുപത്രിയിലാണ് വൈദ്യപരിശോധന നടത്തിയത്.
Read More: കാണാൻ പോകുന്നത് മഴയുടെ രൗദ്ര ഭാവം; അതിതീവ്രമഴയ്ക്ക് സാധ്യത; ഈ 4 ജില്ലകളിൽ റെഡ് അലർട്ട്
Read More: മെത്രാപ്പൊലീത്ത മാർ അത്തനേഷ്യസ് യോഹാന്റെ മൃതദേഹം കൊച്ചിയിലെത്തിച്ചു; വിലാപയാത്ര ആരംഭിച്ചു
