കണ്ണൂർ: എടിഎം കുത്തിത്തുറക്കാൻ ഹെൽമെറ്റും ധരിച്ച് തൂമ്പയുമായി എത്തിയ യുവാവിനെ പിടികൂടി കണ്ണൂർ പോലീസ്. പെരിങ്ങത്തൂരിൽ സൗത്ത് ഇന്ത്യൻ ബാങ്കിൻ്റെ എടിഎം കൗണ്ടർ കുത്തിതുറന്ന് മോഷണം നടത്താൻ ശ്രമിച്ചയാളാണ് പൊലീസിന്റെ പിടിയിലായത്.
എടിഎമ്മിലെ സിസിടിവിയിൽ നിന്ന് ദൃശ്യങ്ങൾ ലഭിച്ചതിന് പിന്നാലെ നടത്തിയ അന്വേഷണത്തിലാണ് യുവാവ് പോലീസ് പിടിയിലായത്. ക്രിസ്മസ് ദിവസം രാത്രിയിലായിരുന്നു സംഭവം.
ഹെൽമറ്റ് ധരിച്ച് മുഖം മറച്ചെത്തിയ യുവാവ് തൂമ്പ ഉപയോഗിച്ച് എടിഎമ്മിന്റെ രണ്ട് വശത്തും കുത്തി തുറക്കാൻ ശ്രമിച്ചെങ്കിലും പരാജയപ്പെടുകയായിരുന്നു. തുടർന്ന് ഇയാൾ പദ്ധതി ഉപേക്ഷിച്ച് മടങ്ങുകയായിരുന്നു.
സിസിടിവി ദൃശ്യങ്ങൾ കണ്ട അധികൃതർ പൊലീസിനെ വിവരം അറിയിക്കുകയായിരുന്നു. എസ്.ഐ വിനീതിന്റെ നേതൃത്വത്തിൽ നടത്തിയ അന്വേഷണത്തിൽ വെള്ളിയാഴ്ചയോടെ പ്രതിയെ പിടികൂടി.
