സംസ്ഥാന മന്ത്രിസഭയിൽ നിന്നും കെ.കൃഷ്ണൻകുട്ടി പുറത്തേയ്ക്കോ? മുഖം രക്ഷിക്കാൻ നിരന്തരം വാർത്താസമ്മേളനം വിളിച്ച് ദൾ.

തിരുവനന്തപുരം :മുൻ പ്രധാനമന്ത്രി ദേവ​ഗൗഡ വെള്ളിയാഴ്ച്ച വൈകുന്നേരം ബെം​ഗളൂരുവിൽ നടത്തിയ വാർത്താസമ്മേളനം, കെ.കൃഷ്ണൻകുട്ടിയുടെ മന്ത്രിസ്ഥാനം തെറിപ്പിച്ചേയ്ക്കും. കർണാടകത്തിൽ ബിജെപിയുമായി സഖ്യമുണ്ടാക്കുന്നതിൽ കേരള മുഖ്യമന്ത്രി പിണറായി വിജയന്റെ പിന്തുണ ലഭിച്ചുവെന്നായിരുന്നു ദേവ​ഗൗഡയുടെ വെളിപ്പെടുത്തൽ. ദേശിയ തലത്തിലും സംസ്ഥാനത്തലത്തിലും ബിജെപിയുമായി നേർക്ക്നേർ പോരാടുന്നുവെന്ന് അവകാശപ്പെടുന്ന സിപിഐഎംന്റെ രാജ്യത്തെ ഏകമുഖ്യമന്ത്രിയാണ് പിണറായി വിജയൻ. അദേഹം ബിജെപി സഖ്യത്തെ പിന്തുണച്ചുവെന്നതിന് ഉദാഹരണമായി ദേവ​ഗൗഡ ചൂണ്ടികാട്ടിയത് കേരള മന്ത്രിസഭ. ബിജെപിയുമായി സഖ്യമുണ്ടാക്കിയതിന് ശേഷവും പിണറായി സർക്കാരിൽ പാർട്ടിയ്ക്ക് മന്ത്രിസ്ഥാനമുണ്ട്. ഇടത്പക്ഷ മുന്നണിയിൽ നിന്നും പാർട്ടിയെ പുറത്താക്കിയില്ല. ഇതോടെ വെട്ടിലായത് പിണറായി വിജയനവും കേരളത്തിലെ ജനതാദൾ സെക്കുലർ പാർട്ടിയും. ജനതാദളിനെ മന്ത്രിസഭയിൽ നിലനിറുത്തിയാൽ ദേവ​ഗൗഡയുടെ വെളിപ്പെടുത്തൽ ശരി വയ്ക്കുന്ന നടപടിയാകുമെന്ന് സിപിഐഎം ലെ ഉന്നത നേതൃത്വവും കരുതുന്നു. പതിറ്റാണ്ടായി എൽഡിഎഫ് മുന്നണിയുടെ ഭാ​ഗമായിട്ടുള്ള നിരവധി പാർട്ടികളെ മന്ത്രിസ്ഥാനം നൽകാതെ പുറത്ത് നിറുത്തിയിരിക്കുകയാണ്. അവർക്ക് ആർക്കും നൽകാത്ത പരി​ഗണന ജനതാദളിന് നൽകേണ്ടതില്ലെന്നും വിമർശനം ഉണ്ട്. മുഖ്യമന്ത്രി പിണറായി വിജയനെ പ്രതികൂട്ടിലാക്കിയ ദേവ​ഗൗഡയുടെ പ്രസ്ഥാവന സംസ്ഥാന നേതാക്കൾ തള്ളി പറഞ്ഞ് പ്രശ്നം പരിഹരിക്കാനും ശ്രമിക്കുന്നുണ്ട്. ഇതിന്റെ ഭാ​ഗമായി മന്ത്രി കെ.കൃഷ്ണൻകുട്ടി പാലക്കാട് തിരക്കിട്ട് മാധ്യമങ്ങളെ കണ്ടു. ബിജെപി സഖ്യത്തെ പിന്തുണയ്ക്കുന്നില്ല എന്ന് വ്യക്തമാക്കി. പിന്നാലെ തിരുവനന്തപുരത്ത് മാധ്യമങ്ങളെ കണ്ട സംസ്ഥാന സെക്രട്ടറി മാത്യു ടി തോമസ് അതിരൂക്ഷമായ ഭാഷയിലാണ് ദേവ​ഗൗഡയ്ക്കെതിരെ രം​ഗത്ത് വന്നത്. പ്രായാധിക്യം മൂലമാണ് ദേവ​ഗൗഡ അങ്ങനെ പറഞ്ഞത്. പിണറായി വിജയൻ പാർട്ടിയുടെ ദേശിയ അദ്ധ്യക്ഷൻ ദേവ​ഗൗഡയുമായി സംസാരിച്ചിട്ട് ഒരു വർഷമായി. ബിജെപിയുമായി സഖ്യത്തിലായ പാർട്ടിയുടെ നിലപാടിനെ കേരള നേതൃത്വം തള്ളി കളയുന്നു. പാർട്ടി നിലപാടല്ല ദേശിയ അദ്ധ്യക്ഷൻ ദേവ​ഗൗഡ പറഞ്ഞതെന്നും മാത്യു ടി തോമസ് പറഞ്ഞു.
അതേ സമയം ബിജെപിയുമായി സിപിഐഎം സഖ്യമുണ്ടെന്ന് വ്യക്തമായെന്ന് പ്രതിപക്ഷനേതാവ് വി.ഡി.സതീഷൻ പരിഹസിച്ചു. നിയമസഭ തിരഞ്ഞെടുപ്പിൽ സിപിഐഎം വിജയിച്ചത് ബിജെപി പിന്തുണയോടെയാണന്ന് രമേശ് ചെന്നിത്തലയും കുറ്റപ്പെടുത്തി. ഇരുപാർട്ടികളും തമ്മിൽ അടുത്ത ബന്ധം. മുൻപ്രധാനമന്ത്രിയായ ദേവ​ഗൗഡ കള്ളം പറയില്ലെന്നും ചെന്നിത്തല പറഞ്ഞു.

നവംബർ മാസം മന്ത്രിസഭയുടെ പുനസംഘടന നിശ്ചയിച്ചിട്ടുണ്ട്. ഏക എം.എൽ.എ മാർ മാത്രമുള്ള പാർട്ടികളുടെ മന്ത്രിമാരെ മാറ്റി നിയമിക്കും. ​ഗതാ​ഗതവകുപ്പിൽ മാറ്റം വരുമെന്ന് ഉറപ്പായി. ഇതിനോടൊപ്പം ജനതാദൾ സെക്കുലർ മന്ത്രിയായ കെ.കൃഷ്ണൻകുട്ടിയേയും മാറ്റണമെന്നാണ് ഒരുവിഭാ​ഗത്തിന്റെ ആവിശ്യം. പക്ഷെ അത് വരെ കാത്തിരിക്കേണ്ട എന്ന അഭിപ്രായം പാർട്ടിയുടെ ദേശിയ സമിതി അം​ഗങ്ങൾക്കുണ്ട്. തീരുമാനം എടുക്കേണ്ടത് സംസ്ഥാന സമിതിയാണ്. ദേവ​ഗൗഡയുടെ പ്രസ്ഥാവന ലോക്സഭ തിരഞ്ഞെടുപ്പിലും കേരളത്തിൽ തിരിച്ചടിയാകും.അത് കൊണ്ട് എത്രയും വേ​ഗം കൃഷ്ണൻകുട്ടിയെ മാറ്റി മുഖം രക്ഷിക്കാനുള്ള മാർ​ഗങ്ങളും പിണറായി പക്ഷം ആലോചിക്കുന്നു.
ദേവ​ഗൗഡയുടെ പ്രസ്ഥാവനയിൽ ഇത് വരെ സിപിഐഎം നേതാക്കൾ പ്രതികരിച്ചിട്ടില്ല. എല്ലാ വിഷയത്തിലും സംസാരിക്കാറുള്ള എൽഡിഎഫ് കൺവീനർ ഇ.പി. ജയരാജനും മാധ്യമങ്ങളെ കാണാൻ തയ്യാറായിട്ടില്ല. ദേവ​ഗൗഡ ജനതാദൾ എസ് ന്റെ ദേശിയ അദ്ധ്യക്ഷനായതിനാൽ സിപിഐഎംന്റെ ദേശിയ ഘടകം ദില്ലിയിൽ മറുപടി നൽകുമെന്ന് ചില നേതാക്കൾ അനൗദ്യോ​ഗികമായി അറിയിക്കുന്നു.

Read Also :ഇത് എന്റെ കരിയറിൽ തന്നെ മറക്കാനാവാത്ത സംഭവം ; ഹണിയുടെ പോസ്റ്റ് ഏറ്റെടുത്ത്‌ സോഷ്യൽ മീഡിയ