കാലിലെ ഷൂസ് ലഞ്ച് ബോക്സാക്കി ഇൻസ്റ്റഗ്രാം ഇൻഫ്ലുവൻസർ; ‘ബട്ടർ ചിക്കൻ ഷൂസ്’ സോഷ്യൽ മീഡിയയിൽ വൈറൽ
ഇന്റർനെറ്റ് തുറന്നാൽ ഇതുവരെ ആരും ചിന്തിക്കാത്ത വിചിത്ര ആശയങ്ങളുടെ വലിയ ലോകമാണ് മുന്നിൽ തുറക്കപ്പെടുന്നത്.
ഫാഷൻ ആക്സസറികളുമായി ബന്ധപ്പെട്ട ഇത്തരത്തിലുള്ള ആശയങ്ങൾ പലപ്പോഴും വൈറലാകാറുണ്ടെങ്കിലും, ഇൻസ്റ്റഗ്രാം ഇൻഫ്ലുവൻസറായ ജൂലിയറ്റ് പങ്കുവച്ച പുതിയ ഐഡിയ സോഷ്യൽ മീഡിയയെ അമ്പരപ്പിച്ചിരിക്കുകയാണ്.
കാലിൽ ഇടുന്ന ഷൂസിനെ തന്നെ ഫുഡ് സ്റ്റോറേജാക്കി മാറ്റിയതാണ് ജൂലിയറ്റിനെ വൈറലാക്കിയത്.
ആദ്യനോട്ടത്തിൽ സാധാരണ വെളുത്ത നിറത്തിലുള്ള ഹീലുള്ള ഒരു ഷൂ പോലെ തോന്നുമെങ്കിലും, സുതാര്യമായ ബേസാണ് ഇതിന്റെ പ്രത്യേകത.
എന്നാൽ ഈ ബേസ് വെറും ഭംഗിക്കായി മാത്രമുള്ളതല്ലെന്ന് ജൂലിയറ്റ് തന്റെ വിഡിയോയിൽ വിശദീകരിക്കുന്നു. ഷൂസിന്റെ മുകൾ ഭാഗവും അടിഭാഗവും വേർതിരിച്ച് എടുക്കാവുന്ന രീതിയിലാണ് ഡിസൈൻ ചെയ്തിരിക്കുന്നത്.
ബേസ് ഭാഗം തുറന്നാൽ അതിനുള്ളിൽ ഭക്ഷണം ഉൾപ്പെടെ എന്തും സൂക്ഷിക്കാനാവും. ഇത് പ്രായോഗികമാണെന്ന് തെളിയിക്കാൻ, ജൂലിയറ്റ് ഷൂസിനുള്ളിൽ ബട്ടർ ചിക്കൻ നിറച്ച് കാണിക്കുകയും ചെയ്യുന്നു.
അടിഭാഗത്ത് ബട്ടർ ചിക്കൻ നിറച്ച ശേഷം മുകൾഭാഗം സ്ക്രൂ ചെയ്ത് ഉറപ്പിച്ച്, അത് ധരിച്ചുകൊണ്ട് നടക്കുന്നതും വിഡിയോയിൽ കാണാം. ഭക്ഷണം കഴിക്കണമെന്നുണ്ടെങ്കിൽ ഷൂസിന്റെ അടിഭാഗത്തുള്ള പ്രത്യേക ദ്വാരം തുറന്ന് നേരിട്ട് കഴിക്കാനും കഴിയും.
തുറസ്സായ സ്ഥലത്ത് ബെഞ്ചിലിരുന്ന് ഷൂസ് ഊരി അതിനുള്ളിൽ നിന്നുള്ള ബട്ടർ ചിക്കൻ കഴിക്കുന്ന ദൃശ്യങ്ങളും വിഡിയോയിൽ ഉൾപ്പെടുത്തിയിട്ടുണ്ട്.
ഈ ആശയം കണ്ടെത്തിയതോടെ ലഞ്ച് പായ്ക്ക് ചെയ്യുന്നത് വളരെ എളുപ്പമായെന്ന് പറഞ്ഞുകൊണ്ടാണ് ജൂലിയറ്റിന്റെ വിഡിയോ അവസാനിക്കുന്നത്.
ബട്ടർ ചിക്കൻ മാത്രമല്ല, ഇറ്റാലിയൻ ഡെസേർട്ടുകളും വിവിധ സ്നാക്കുകളും ഷൂസിനുള്ളിൽ സൂക്ഷിക്കുന്ന വിഡിയോകൾ ജൂലിയറ്റ് മുമ്പും പങ്കുവച്ചിട്ടുണ്ട്.
അതേസമയം, ഈ വ്യത്യസ്ത ഫാഷൻ പരീക്ഷണത്തിനെതിരെ സോഷ്യൽ മീഡിയയിൽ നിരവധി വിമർശനങ്ങളുമുണ്ട്. കാലിൽ ഇടുന്ന ചെരുപ്പിനുള്ളിൽ ഭക്ഷണം സൂക്ഷിച്ച് കഴിക്കുന്നത് ഉൾക്കൊള്ളാനാവുന്നില്ലെന്നാണ് പലരുടെയും അഭിപ്രായം.
ഷൂസിന്റെ അടിഭാഗത്ത് തുറക്കുന്ന ദ്വാരം വഴിയായി പൊടിയും ചെളിയും ഭക്ഷണത്തിലേക്ക് വീഴില്ലേ എന്ന ആശങ്കയും ചിലർ ഉന്നയിക്കുന്നു.
ലഞ്ച് ബാഗ് ചുമക്കാൻ എത്ര ബുദ്ധിമുട്ടുണ്ടായാലും ഇത്തരമൊരു ആശയം സ്വീകരിക്കില്ലെന്ന് വ്യക്തമാക്കുന്നവരും കുറവല്ല. ഫാഷൻ എന്ന പേരിൽ ഈ പരീക്ഷണം അതിരുകടന്നുവെന്നാണ് പൊതുവായ വിലയിരുത്തൽ.
English Summary
Instagram influencer Juliette has gone viral after turning footwear into food storage. Her specially designed shoes feature a detachable transparent base that can store food like butter chicken, desserts, and snacks. While she claims it makes carrying lunch easier, many social media users have criticized the idea, calling it unhygienic and impractical, and questioning whether fashion experimentation has gone too far.
instagram-influencer-turns-shoes-into-food-storage-viral-fashion-idea
Instagram viral, weird fashion, food storage shoes, Juliette influencer, viral video, fashion experiment, social media trends
