ന്യൂഡൽഹി: യാത്രക്കാരുടെ എണ്ണത്തിൽ റെക്കോർഡ് ഇട്ട് ഇന്ത്യൻ റെയിൽവേ. നവംബർ നാലിന് ഇന്ത്യയൊട്ടാകെ മൂന്ന് കോടി യാത്രക്കാരാണ് ഇന്ത്യൻ റെയിൽവേയെ ആശ്രയിച്ചത്. ഇത് ചരിത്ര നേട്ടമാണെന്ന് റെയിൽവേ മന്ത്രാലയം പ്രസ്താവനയിൽ അറിയിച്ചു.
നവംബർ 4ന്, രാജ്യമൊട്ടാകെ 1.20 കോടി നോൺ സബർബൻ യാത്രക്കാരാണ് ട്രെയിനിൽ സഞ്ചരിച്ചത്. ഇതിൽ 19.43 ലക്ഷം റിസർവ്ഡ് യാത്രക്കാരും 1.01 കോടി ജനറൽ കംപാർട്ട്മെന്റ് യാത്രക്കാരും ഉൾപ്പെടും. സബർബൻ മേഖലയിൽ 1.80 കോടി യാത്രക്കാരാണ് ഇന്ത്യൻ റെയിൽവേയെ ആശ്രയിച്ചത്.
ഒക്ടോബർ 1 മുതൽ നവംബർ 5 വരെ ബിഹാർ, കിഴക്കൻ ഉത്തർപ്രദേശ്, ഝാർഖണ്ഡ് എന്നിവിടങ്ങളിലേക്ക് ഷെഡ്യൂൾ ചെയ്ത ട്രെയിനുകൾ വഴി ഏകദേശം 6.85 കോടി യാത്രക്കാരാണ് സഞ്ചരിച്ചത്.
യാത്രക്കാരുടെ എണ്ണം ഓസ്ട്രേലിയ, ന്യൂസിലൻഡ് തുടങ്ങിയ രാജ്യങ്ങളിലെ മൊത്തം ജനസംഖ്യയുടെ മുകളിൽ വരും. തിരക്കേറിയ ഉത്സവ സമയങ്ങളിൽ വർധിച്ച ആവശ്യം നിറവേറ്റുന്നതിനും യാത്ര എളുപ്പമാക്കുന്നതിനും എല്ലാവർക്കും കൂടുതൽ ആക്സസ് ചെയ്യുന്നതിനും ഇന്ത്യൻ റെയിൽവേയുടെ പ്രതിബദ്ധതയാണ് ഈ നേട്ടം കാണിക്കുന്നതെന്നും മന്ത്രാലയം ചൂണ്ടിക്കാണിച്ചു.
