ചൈനയ്ക്ക് മറുപടി; റഷ്യയുടെ അഞ്ചാം തലമുറ സ്റ്റെൽത്ത് വിമാനം ‘സുഖോയ്-57ഇ’ ഇന്ത്യ വാങ്ങുന്നു!
ഡൽഹി:
അമേരിക്കയുടെ സമ്മർദ്ദത്തെ തുടർന്ന് റഷ്യൻ എണ്ണ വാങ്ങൽ നിർത്തിയെങ്കിലും, റഷ്യയുടെ അഞ്ചാം തലമുറ സ്റ്റെൽത്ത് യുദ്ധവിമാനമായ സുഖോയ്-57ഇ (SU-57E) സോഴ്സ് കോഡ് ഉൾപ്പെടെ വാങ്ങാനുള്ള നീക്കവുമായി ഇന്ത്യ മുന്നോട്ട് പോകുന്നു.
40 വിമാനങ്ങൾ വാങ്ങുന്നതിനുള്ള ഫയലിന് ഉടൻ ഡിഫൻസ് അക്വിസിഷൻ കൗൺസിൽ (DAC) അനുമതി നൽകുമെന്നാണ് സൂചന.
സാങ്കേതിക കൂടിയാലോചനകൾ അന്തിമഘട്ടത്തിലാണെന്ന് നിർമ്മാതാക്കളായ United Aircraft Corporation (UAC) സ്ഥിരീകരിച്ചു.
ഇന്ത്യ നിലവിൽ ഉപയോഗിക്കുന്ന സുഖോയ്-30 എം.കെ.ഐ വിമാനങ്ങൾ നിർമ്മിക്കുന്ന പ്ലാന്റുകളിലാണ് പുതിയ വിമാനങ്ങളും നിർമ്മിക്കുക.
സോഴ്സ് കോഡ് ലഭിക്കുന്നതോടെ വിമാനങ്ങളിൽ തദ്ദേശീയ സാങ്കേതിക പരിഷ്കാരങ്ങൾ വരുത്താനും ഇന്ത്യക്ക് സാധിക്കും.
ശബ്ദത്തിന്റെ ഇരട്ടിവേഗതയിൽ പറക്കാൻ കഴിയുന്ന സുഖോയ്-57ഇ, അത്യാധുനിക റഡാറുകളെയും വെട്ടിച്ച് ദൗത്യം നിർവഹിക്കാൻ ശേഷിയുള്ള വിമാനമാണ്. അമേരിക്കയുടെ എഫ്-35 യുദ്ധവിമാനത്തിന് സമാനമായ ശേഷിയുള്ളതാണെന്ന വിലയിരുത്തലുമുണ്ട്.
കഴിഞ്ഞ ആഴ്ച ഫ്രാൻസ് നിർമ്മിത 114 റാഫേൽ യുദ്ധവിമാനങ്ങളുടെ കരാറിന് അംഗീകാരം ലഭിച്ചിരുന്നു. റാഫേൽ 4.5 ജനറേഷൻ വിഭാഗത്തിലുള്ള യുദ്ധവിമാനമാണ്.
ചൈനയുടെ ഭീഷണിക്ക് മറുപടി
ചൈനയുടെ ജെ-20, ജെ-35 സ്റ്റെൽത്ത് യുദ്ധവിമാനങ്ങൾ ഉയർത്തുന്ന സുരക്ഷാഭീഷണിക്ക് മറുപടിയായാണ് ഇന്ത്യ റഷ്യയുമായി സുഖോയ്-57ഇ കരാർ വേഗത്തിലാക്കുന്നത്.
ചൈന പാകിസ്ഥാനു അഞ്ചാം തലമുറ യുദ്ധവിമാനം വിൽക്കാൻ ഒരുങ്ങുന്ന സാഹചര്യവും ഇന്ത്യയുടെ നീക്കത്തിന് പിന്നിലുണ്ട്.
സുഖോയ്-57ഇയിൽ ആസ്ത്ര എം.കെ-1, എം.കെ-2 മിസൈലുകൾ, രുദ്രം ആന്റി-റേഡിയേഷൻ മിസൈലുകൾ, റഷ്യൻ ആർ-77 മിസൈൽ എന്നിവ ഘടിപ്പിക്കാൻ കഴിയും. ഇന്ത്യ തദ്ദേശീയമായി വികസിപ്പിക്കുന്ന സ്റ്റെൽത്ത് യുദ്ധവിമാനം 2035ഓടെയാണ് യാഥാർത്ഥ്യമാകുക.
അമേരിക്കൻ പ്രസിഡന്റ് ഡോണൾഡ് ട്രംപ് ഇന്ത്യക്ക് എഫ്-35 നൽകാൻ സന്നദ്ധത പ്രകടിപ്പിച്ചിട്ടുണ്ടെങ്കിലും, സുഖോയ്-57ഇയുമായി താരതമ്യം ചെയ്യുമ്പോൾ എഫ്-35ന്റെ വില വളരെ കൂടുതലാണ്.
ഒരു എഫ്-35 വിമാനത്തിന് ഏകദേശം 900–950 കോടി രൂപ വില വരുമെന്നാണ് കണക്ക്. സുഖോയ്-57ഇയ്ക്ക് ഏകദേശം 650 കോടി രൂപ മതിയാകുമെന്നാണ് വിലയിരുത്തൽ. അതോടൊപ്പം സോഴ്സ് കോഡ് നൽകാൻ അമേരിക്ക തയ്യാറല്ലെന്നതും ഇന്ത്യയുടെ തീരുമാനത്തിൽ നിർണായക ഘടകമാണ്.
സാങ്കേതിക പ്രത്യേകതകൾ
▪ ഇരട്ട എൻജിൻ, മൾട്ടി റോൾ ശേഷി
▪ പരമാവധി വേഗത – ഏകദേശം 2130 കിലോമീറ്റർ/മണിക്കൂർ
▪ 10,000 കിലോ പേലോഡ് ശേഷി
▪ എസ്.എച്ച്-121 മൾട്ടി ട്രാക്കിംഗ് റഡാർ
▪ ഏത് കാലാവസ്ഥയിലും ദൗത്യനിർവഹണ ശേഷി
English Summary
India is moving ahead with plans to procure 40 Russian fifth-generation Su-57E stealth fighter jets along with source code access. The deal is nearing approval by India’s Defence Acquisition Council, and the aircraft will be manufactured in India’s existing Sukhoi production facilities. The move is aimed at countering China’s growing stealth fighter capability, while offering a more affordable and flexible alternative to the US F-35.
india-to-buy-su57e-stealth-fighter-jets-with-source-code-dac-approval-soon
India defence deal, Sukhoi 57E fighter jet, Defence Acquisition Council, United Aircraft Corporation, China stealth fighter threat, F-35 comparison, Rafale deal India, fifth generation fighter aircraft, Indian Air Force modernization
