അതിർത്തിയിൽ വ്യാപകമായി പാക് സൈന്യം ആക്രമണം നടത്തിയെന്ന് ഇന്ത്യൻ സൈന്യം ഔദ്യോഗികമായി സ്ഥിരീകരിച്ച സാഹചര്യത്തിൽ
ഗുജറാത്തിലെ പാക്ക് അതിർത്തിയോട് ചേർന്നുള്ള മുഴുവൻ സൈനിക കേന്ദ്രങ്ങൾക്കും അതീവ സുരക്ഷ ഏർപ്പെടുത്തി സൈന്യം.
ഇത്തരം കേന്ദ്രങ്ങൾക്ക് രണ്ട് കിലോമീറ്റർ ചുറ്റളവിലുള്ള മുഴുവൻ വാഹനങ്ങളും മാറ്റിയിരിക്കുകയാണ്. പൊതു ജനങ്ങൾ ഈ പ്രദേശത്തുകൂടെ യാത്ര ചെയ്യരുതെന്ന പ്രത്യേക നിർദേശവും നൽകിയിട്ടുണ്ട്.
അമൃത്സറിൽ സായുധ ഡ്രോൺ പറക്കുന്നതിന്റെ ദൃശ്യങ്ങൾ സൈന്യം പുറത്ത് വിട്ടു. ഇന്ത്യയുടെ അതിർത്തി കടന്നെത്തുന്ന ഇത്തരം ആക്രമണങ്ങളെ ശക്തമായി ഇന്ത്യ നേരിടുമെന്നും സൈന്യം വ്യക്തമാക്കി.
പഞ്ചാബിലും സംഘർഷ സാധ്യത നിലനിൽക്കുകയാണ്. പഞ്ചാബ് ഭരണകൂടം ജനങ്ങൾക്ക് പ്രത്യേക നിർദേശങ്ങൾ നൽകിയിട്ടുണ്ട്. ആളുകൾ കൂട്ടം കൂടരുത്, കൂട്ടം കൂടി പുറത്തിറങ്ങരുത്, മാളുകൾ പോലുള്ള ഇടങ്ങളിലെ സന്ദർശനം ഒഴിവാക്കണം തുടങ്ങിയ നിർദേശങ്ങളാണ് നൽകിയിരിക്കുന്നത്.
പാകിസ്ഥാന്റെ സൈനികപോസ്റ്റുകളും ലോഞ്ച്പാഡും തകര്ത്തു: കനത്ത തിരിച്ചടിയുമായി ഇന്ത്യൻ സേന
ഇന്ത്യക്ക് നേരെ പാകിസ്താന്റെ തുടർച്ചയായുള്ള ആക്രമണത്തിന് കനത്ത തിരിച്ചടി നല്കി ഇന്ത്യന് സൈന്യം. പാക് സൈന്യത്തിന്റെ ഒട്ടേറെ സൈനിക പോസ്റ്റുകളും ലോഞ്ച്പാഡും ഇന്ത്യന് സൈന്യം തകര്ത്തതായുള്ള റിപ്പോര്ട്ട് ആണ് ഇപ്പോൾ പുറത്തുവരുന്നത്.
പാകിസ്താന്റെ നിരവധി സൈനികപോസ്റ്റുകളാണ് ഇന്ത്യന് സൈന്യം തകര്ത്തത്. ഇന്ത്യയെ ലക്ഷ്യമിട്ടുവന്ന പാകിസ്താന്റെ അന്പതോളം ഡ്രോണുകളും സൈന്യം വെടിവെച്ചിട്ടിരുന്നു
ഡ്രോണുകള് വിക്ഷേപിക്കാന് ഉപയോഗിച്ചിരുന്ന ലോഞ്ച്പാഡും ഇന്ത്യന് സൈന്യം തകർത്തു. ജമ്മുവിന് സമീപത്തായി നിലയുറപ്പിച്ച സൈനികരാണ് ഈ നീക്കത്തിനു പിന്നിൽ. സൈനികവൃത്തങ്ങളെ ഉദ്ധരിച്ച് വാര്ത്താ ഏജന്സിയായ എഎന്ഐ റിപ്പോര്ട്ട് ചെയ്തു.
രജൗരിയില് പാക് ഷെല്ലാക്രമണത്തില് ജമ്മു കശ്മീരിലെ മുതിര്ന്ന ഉദ്യോഗസ്ഥന് കൊല്ലപ്പെട്ടതായി വിവരമുണ്ട്. ജമ്മു കശ്മീര് മുഖ്യമന്ത്രി ഒമര് അബ്ദുള്ളയും ഈ വിവരം സ്ഥിരീകരിച്ചിട്ടുണ്ട്.
ശനിയാഴ്ച രാവിലെയും പാകിസ്താന്റെ പ്രകോപനം തുടരുന്നതായാണ് റിപ്പോര്ട്ട്. ശനിയാഴ്ച രാവില ശ്രീനഗറില് സ്ഫോടനശബ്ദം കേട്ടതായി ദേശീയ മാധ്യമങ്ങളുടെ റിപ്പോര്ട്ടുണ്ട്. അതിര്ത്തിയില് കഴിഞ്ഞരാത്രി മുഴുവന് പാകിസ്താന് ഷെല്ലാക്രമണം തുടര്ന്നിരുന്നു. കുപ് വാരയില് ബ്ലാക്ക്ഔട്ട് ഏര്പ്പെടുത്തിയിരിക്കുകയാണ്.
