മഴപെയ്ത് ഇടയ്ക്കൊന്നു തണുത്തെങ്കിലും പാലക്കാട് ഇപ്പോഴും ചൂടിൽ തന്നെ. പൊള്ളുന്ന ചൂട് മൂലം ജനം വലയുകയാണ്. പാലക്കാടിന്റെ ചൂട് വ്യക്തമാക്കുന്ന ഒരു വാർത്തയാണ് ഇപ്പോൾ പുറത്തുവരുന്നത്. വിൽപ്പനയ്ക്കായി എത്തിച്ച കാടക്കോഴി മുട്ട കവറിൽ ഇരുന്നു വിരിഞ്ഞു. നല്ലപ്പിള്ളി കമ്പിളിചുങ്കത്തെ കടയിലാണ് സംഭവം.
തമിഴ്നാട്ടിൽ നിന്നും എത്തിച്ച കാടക്കോഴി മുട്ടകളിൽ രണ്ടെണ്ണമാണ് കൊടുംചൂടിൽ കവറിൽ ഇരുന്ന് വിരിഞ്ഞത്. വിൽപ്പനയ്ക്കായി എത്തിച്ച കാടമുട്ട കവറിനുള്ളിൽ അനക്കം കണ്ടാണ് നാട്ടുകാർ ഇത് ശ്രദ്ധിക്കുന്നത്. കവർ തുറന്ന് നോക്കിയപ്പോൾ മുട്ട വിരിഞ്ഞ പുറത്തുവന്ന കാടകുഞ്ഞുങ്ങളെ ആണ് കണ്ടത്. പാലക്കാട്ടെ ചൂടിന്റെ കാഠിന്യം വിളിച്ചോതുന്ന സംഭവമാണിത്. വെന്തുരുകുന്ന ചൂടിൽ ആളുകൾ നെട്ടോട്ടം പായുന്ന കാഴ്ചയാണ് എങ്ങും കാണാനാവുക. ഏതായാലും അമ്മയുടെ ചൂട് ഏൽക്കാതെ വിരിഞ്ഞ ഈ കുഞ്ഞുങ്ങൾ പാലക്കാട്ടെ ചൂടിനെ അതിജീവിക്കുമോ എന്ന് കാത്തിരുന്നു കാണാം.
