അയർലണ്ടിൽ വാടകവീടുകളുടെ പേരിൽ നടക്കുന്ന തട്ടിപ്പുകളിൽ വന്‍ വര്‍ദ്ധനവ്; പിന്നിൽ മലയാളിസംഘവും, ഗാര്‍ഡ നൽകുന്ന മുന്നറിയിപ്പ് ഇങ്ങനെ:
ഡബ്ലിൻ: അയർലണ്ടിൽ വിദേശ വിദ്യാർത്ഥികളെ ലക്ഷ്യമിട്ട് നടക്കുന്ന തട്ടിപ്പുകൾ വർധിച്ചുവരുന്നു. കഴിഞ്ഞ ആറുമാസത്തിനിടെ മാത്രം ഇത്തരം കേസുകളിൽ 22% വർധനവാണ് ഉണ്ടായത്.
ഓഗസ്റ്റ്, സെപ്റ്റംബർ മാസങ്ങളിലാണ് കൂടുതൽ പരാതികളും വഞ്ചനകളും നടക്കുന്നത്. പുതുതായി എത്തിയ വിദ്യാർത്ഥികൾ താമസസൗകര്യം തേടുന്ന സമയമായതിനാലാണ് ഈ സാഹചര്യമെന്ന് ഗാർഡ നാഷണൽ ഇക്കണോമിക് ക്രൈം ബ്യൂറോ മുന്നറിയിപ്പ് നൽകി.
ഗാർഡയുടെ കണക്കുകൾ പ്രകാരം ഇരകളിലേറെയും ചെറുപ്പക്കാരാണ്. താമസസൗകര്യത്തിന്റെ പേരിൽ ഡെപ്പോസിറ്റ് തട്ടിയെടുക്കുന്നതാണ് മുഖ്യ രീതി.
“ഉടമ വിദേശത്താണ്, ഡെപ്പോസിറ്റ് അടച്ചാൽ മാത്രം വീട് കാണാൻ പറ്റും” എന്ന വ്യാജവാദം വിശ്വസിപ്പിച്ച് വിദ്യാർത്ഥികളിൽ നിന്ന് പണം കൈക്കലാക്കും.
പലപ്പോഴും നിലവിലില്ലാത്ത വീടുകൾ കാണിച്ചും, വ്യാജ താക്കോലുകൾ നൽകി കൊണ്ടും, ലാൻഡ്‌ലോഡ് പിന്നീട് കാണാതാകുന്ന രീതിയിലും തട്ടിപ്പുകൾ നടക്കുന്നു.
മലയാളികളും ഉൾപ്പെടുന്ന ചില ഇന്ത്യൻ സംഘങ്ങൾ തന്നെ ഇത്തരം പ്രവർത്തനങ്ങളിൽ സജീവമാണെന്ന് റിപ്പോർട്ടുണ്ട്. ഡബ്ലിനിൽ മാത്രം നൂറോളം ഇന്ത്യൻ വിദ്യാർത്ഥികൾ ഇവരുടെ വലയിലായതായി പറയുന്നു.
ഗാർഡ മുന്നറിയിപ്പ് നൽകുന്നത്ഒരിക്കലും പണം നേരിട്ട് കൈമാറരുത്.
റിവോൾട്ട് വഴിയുള്ള പേയ്‌മെന്റും ഒഴിവാക്കണം.
ട്രാക്ക് ചെയ്യാനും തിരികെ ലഭിക്കാനും കഴിയുന്ന പേയ്‌മെന്റ് മാർഗങ്ങൾ മാത്രം ഉപയോഗിക്കുക.
വീടുകൾ അന്വേഷിക്കേണ്ടത് കോളേജ് അക്കോമഡേഷൻ പോർട്ടൽ വഴിയോ അംഗീകൃത ലെറ്റിംഗ് ഏജൻസികൾ മുഖേനയോ മാത്രം. ക്ലോൺ ചെയ്ത വെബ്‌സൈറ്റുകൾക്കും സോഷ്യൽ മീഡിയ പരസ്യങ്ങൾക്കും ഇരയാകരുത്.
ആറ് മാസത്തിനിടെ 160 കേസുകൾ രജിസ്റ്റർ ചെയ്തു. ഇരകളിൽ 34% പേർക്ക് 25 വയസ്സിനു താഴെയാണ്, 66% പേർക്ക് 33 വയസ്സിനു താഴെയും. ഇതിലൂടെ 3,85,000 യൂറോയാണ് നഷ്ടമായത്. 2024-ൽ മുഴുവൻ 6,17,000 യൂറോ വിലമതിക്കുന്ന തട്ടിപ്പുകളാണ് നടന്നത്.
ഓൺലൈൻ വഴിയാണ് മിക്കവാറും തട്ടിപ്പുകൾ നടക്കുന്നത്. വാട്ട്‌സ്ആപ്പ് പോലുള്ള സോഷ്യൽ മീഡിയയാണ് ഇടപാടുകളുടെ പ്രധാന മാർഗം. അതിനാൽ ഇത്തരം പരസ്യങ്ങളോട് പ്രത്യേകം ജാഗ്രത പുലർത്തണമെന്ന് ഗാർഡ അഭ്യർത്ഥിച്ചു.
തട്ടിപ്പുകാരെ തിരിച്ചറിയാൻ ശ്രദ്ധിക്കേണ്ട ചില സൂചനകൾ:
- വ്യാകരണ-അക്ഷര പിശകുകൾ നിറഞ്ഞ പരസ്യങ്ങൾ
- ‘ഒറ്റത്തവണ ഓഫർ’ തരത്തിലുള്ള പരസ്യങ്ങൾ
- അനാവശ്യമായ തിടുക്കം
- നേരിട്ട് എത്താൻ കഴിയാത്ത വീട്ടുടമസ്ഥർ
- ചോദ്യങ്ങളൊന്നും ചോദിക്കാതെ വിശ്വാസം പിടിക്കാൻ ശ്രമിക്കൽ
- മുൻകൂട്ടി പണം ചോദിക്കാതെ ‘വിശ്വാസ്യത’ ഉറപ്പിക്കൽ
എല്ലാ വിഭാഗം വിദ്യാർത്ഥികളും വാടകക്കാരും ഇത്തരം വഞ്ചനകൾക്ക് ഇരയായേക്കാമെങ്കിലും, അന്താരാഷ്ട്ര വിദ്യാർത്ഥികളാണ് ഏറ്റവും കൂടുതൽ അപകടസാധ്യതയുള്ളവർ എന്ന് ഐറിഷ് കൗൺസിൽ ഫോർ ഇന്റർനാഷണൽ സ്റ്റുഡന്റ്സ് വ്യക്തമാക്കി.
Summary:
Ireland: Rental fraud cases have seen a sharp rise, with reports suggesting the involvement of a Malayali group. Garda (Irish police) has issued a strong warning to the public to stay alert against such scams.
