കൊല്ലം കുണ്ടറയിൽ ദുരൂഹ സാഹചര്യത്തിൽ വീട്ടമ്മയെവീട്ടിനുള്ളിൽ മരിച്ച നിലയിൽ കണ്ടെത്തി. പടപ്പക്കര പുഷ്പവിലാസം വീട്ടിൽ പുഷ്പലത (55) ആണ് മരിച്ചത്. പുഷ്പലതയുടെ മകൻ അഖിൽ ഒളിവിലാണ്. (Housewife found dead in Kollam Kundera under mysterious circumstances)
പുഷ്പലതയുടെ അച്ഛൻ ആന്റണിക്കും ഗുരുതര പരിക്കുണ്ട്. പുഷ്പലതയുടെ മകൻ അഖിൽ ഒളിവിലാണ്. അഖിൽ പണത്തിനായി ഇരുവരെയും നിരന്തരം ശല്യം ചെയ്തിരുന്നതായാണ് പൊലീസ് പറയുന്നത്. ആന്റണിയെ തിരുവനന്തപുരം മെഡിക്കൽ കോളജ് ആശുപത്രിയിൽ പ്രവേശിപ്പിച്ചിച്ചിരിക്കുകയാണ്.
പുഷ്പലതയെയും ആന്റണിയെയും അഖിൽ ഉപദ്രവിക്കുന്നു എന്ന് പറഞ്ഞു വെള്ളിയാഴ്ച രാവിലെ 10ന് ഇവർ പൊലീസ് കൺട്രോൾ റൂമിൽ വിളിച്ച് പരാതി പറഞ്ഞിരുന്നു.
ഇതേത്തുടർന്ന് പൊലീസ് എത്തി അഖിലിന് താക്കീത് നൽക യിരുന്നു. ഇന്ന് രാവിലെ ചണ്ഡീഗഡിൽ പഠിക്കുന്ന മകൾ അഖില പുഷ്പലതയെ ഫോണിൽ വിളിച്ചിട്ട് കിട്ടാത്തതിനെത്തുടർന്ന് സമീപവാസിയായ ബന്ധുവിനോട് പറഞ്ഞു.
ബന്ധു വീട്ടിൽ എത്തി നോക്കിയപ്പോഴാണ് കിടപ്പുമുറിയിൽ തറയിൽ അനക്കമില്ലാതെ കിടക്കുന്ന പുഷ്പലതയെ കണ്ടത്.
ആന്റണിയെ തലയിലെ മുറിവിൽ നിന്ന് ചോര വാർന്ന് അബോധാവസ്ഥയിൽ സമീപത്തെ മുറിയിൽ കണ്ടെത്തി.
തുടർന്ന് ആന്റണിയെ ആദ്യം കുണ്ടറ താലൂക്ക് ആശുപത്രിയിലും തുടർന്ന് തിരുവനന്തപുരം മെഡിക്കൽ കോളജ് ആശുപത്രിയിലും പ്രവേശിപ്പിച്ചു.
